LESEN 17

Wanem Wei Blo Zizas?

Samting Yu Ken Printem

Wen yumi lanbaut demting Zizas bin spik ane mekem ya lo ert, wi paindaut pasin blo em ane i mube yumi po kam pren blo Zizas ane em Papa, Zeoba. Wanem sam dem nais pasin em soem? Ane wiskain yumi ken pole wei blo Zizas lo laip blo yumi?

1. Wanem wei blo Zizas, i seimkain wase Papa blo em?

Antap eben, po plenti bilion iya, Zizas luk labing Papa blo em klostuwan, ane em bin lan prom em. So daswai, Zizas tingk, pil, ane meke seimkainwei wase em Papa. (Rid Zon 5:19.) Wa, Zizas mina kopi seimkainwei blo em Papa, so em ken prapa spik: “Demwan uda bin luk mi, wa, dempla i bin luk PapaGod.” (Zon 14:9) Wen yu lanbaut pasin blo Zizas, yu go kam po sabe Zeoba mobeta tu. Wase wen Zizas bin soe sorewei po pipol, yu ken lan wiskain Zeoba mas pil baut yu.

2. Wanem Zizas bin mekem po soe em labe Zeoba?

Zizas spik: “I mas bi demkain solong ebri pipol blo dis wold i prapa sabe dat ai prapa labe PapaGod. Daswai ebriting wanem PapaGod i oda mi po mekem, ai mata mekem.” (Zon 14:31) Ya lo ert, Zizas bin soe dat biglab em gad po em Papa wen em bi mata obei em, nomata i gad taim wen i bin ad. Ane, em ebritaim tokbaut Papa blo em, bikoz em mina labem ane wande nada pipol po labem Papa tu.—Zon 14:23.

3. Wanem Zizas bin mekem po soe em labe ol pipol?

Da Baibol spik Zizas prapa labe ol pipol blo da wold. Em bin soe dis lab wen em inkariz pipol, ane em pute ol nada pipol pas bipo emselp, sole em ken elpe dempla. Em bin meke ol mirikal po soe da paua em gad ane wiskain em mina kea tu. (Mak 1:40-42) Em bin trite pipol lo mina naiswei ane trite pipol seimwei, nomata uda dempla. Tok blo em meke pipol pilgud ane gibe oup po demwan uda ambol ane wande lisen. Zizas bin redi po sapa ane gibe laip blo em, bikoz em bin labe yumpla. Bat, lab blo em, i mina po demwan uda pole tising blo em.—Rid Zon 15:13, 14.

TINGBAUT MO NAU

Lan mo baut pasin ane wei blo Zizas. Ane tingbaut wiskain po soe lab, ane wiskain po sere wanem yu gad, seimkainwei wase em.

4. Zizas labe Papa blo em

Wei blo Zizas tise yumi wiskain po soe lab po God. Rid Luk 6:12 ane Zon 15:10; 17:26. Apta yu pinis ride dem skripsa, tokbaut dis kwestin ya:

Wiskain yumi ken pole wei blo Zizas, ane soe lab po Zeoba?

Zizas prea. — Zizas labem Papa antap eben ane em ebritaim tok po em wea prea

5. Zizas kea po pipol uda nide elp

Zizas kea mo baut ol nada pipol, moden emselp. Nomata em bin taiat, em bin gibe taim ane strong blo em po elpe pipol. Rid Mak 6:30-44, ane tokbaut dem kwestin ya:

Lo dis stori, wanem Zizas bin mekem po soe em kea baut ol nada pipol?—Rid Mak 6:31, 34, 41-43.
Wanem mina mube Zizas po elpe pipol?—Rid Mak 6:34.
Bikoz Zizas pole wei ane pasin blo Zeoba, wanem i tise yu baut Zeoba emselp?
Wanem yumi ken mekem, po pole wei blo Zizas, ane kea po ol nada pipol?

Zizas pide plenti tauzen pipol wen em meke mirikal lo dem paib dampa ane tu smol pis. Dem klostuman blo em seremaut dem kaikai po dem man, oman ane pikinini.

6. Zizas oltaim sere samting blo em

Nomata Zizas no bin gad plenti samting, em bin sere wanem em bin gad wea ol nada pipol. Em spik yumi po sere wanem wi gad tu. Rid Pas Misnare Wok 20:35, ane tokbaut dis kwestin ya:

Prom wanem Zizas bin spik, wanem yumi ken mekem po bi moapi?

Plei da BIDYO, ane tokbaut dis kwestin ya.

BIDYO: “Wen Yu Gibe Samting po Sambodi, i Meke Yu Moapi”—Smol Pat (4:00)

Nomata yu mait nogad plenti samting, wiskain wei yu ken stil gibe samting?

Yu bin sabe a?

Da Baibol tise yumi po prea po Zeoba ane mekem wea neim blo Zizas. (Rid Zon 16:23, 24.) Wen yumi prea lo diskainwei, i soe dat yumi sabe wanem Zizas bin mekem i impotant, sole yumi kam pren blo Zeoba.

SAM PIPOL SPIK: “Yumpla sapa bikoz God panise yumi.”