LESEN 28
Soe Eso Gobaigen Po Wanem Zeoba ane Zizas bin Mekem po Yu
Wiskain i meke yu pil wen wan pren gibe yu wan nais gipt? I mas meke yu pil mina api ane yu go wande eso pren blo yu po dat gipt. Zeoba ane Zizas gibe yumi mina nambawan gipt—da laip Zizas bin sakripais—i mobeta den eni nada gipt yumi ken gedem. Wiskain yumi go eso demtu gobaigen ane soe yumi i api po dis gipt?
1. Wanem wanwei po soe eso gobaigen po wanem Zeoba ane Zizas bin mekem po yumi?
Da Baibol meke promis dat “ebriwan uda i mata bilib wea [Zizas]” ken stap laip poeba. (Zon 3:16) Wanem yumi ken mekem po soe yumi mata bilib wea Zizas? I no nap po mata sabebaut Zizas. Yumi mas soe bilib blo yumi lo wanem wi mekem ane suzem. (Zemes 2:17) Wen wi soe bilib blo yumi wea demting wi mekem ane wanem wi spik, yumi go kam moklostu pren wea Zizas ane Papa blo em, Zeoba.—Rid Zon 14:21.
2. Wanem spesil samting yumi mas gopo, po soe eso gobaigen po wanem Zeoba ane Zizas bin mekem?
Da nait bipo Zizas bin ded, em bin tok po em klostuman baut wan nadawei ol mas soe eso gobaigen ane tingbaut em sakripais. Zizas bin aske dempla po kam tugeda po wan spesil kaikai, ane da Baibol kolem “da Las Sapa”. Nada neim po diswan i da Memorial, po rimemba ded blo Zizas. (1 Korint 11:20) Zizas bin wande dem klostuman blo em, ane ol prapa Kristian apta dempla tu, po rimemba em bin gibe laip blo em po yumpla. So, em gibe oda: “Yupla mas mata meke disting sole yupla go tingbaut wanem ai bin mekem po yupla.” (Luk 22:19) Wen yu gopo dis spesil amenmiting po Rimemba Ded blo Zizas, o Memorial, yu soe yu prapa api po eso Zeoba ane Zizas po da biglab demtu gad po mipla.
TINGBAUT MO NAU
Lanbaut ol nadawei po soe eso gobaigen po da biglab blo Zeoba ane Zizas. Tingbaut aukam i mina impotant po gopo da Memorial po rimemba ded blo Zizas.
3. Wanem yumi ken mekem po soe dat eso gobaigen?
Trai tingbaut ip yu poldaun prom bot insaid lo solwata ane yu no sabe swim. Den, samwan kam po seibe yu prom draun. Yu go piged dempla a? No, yu go luk po wei po soe eso gobaigen po wanem em bin mekem po yu.
Zeoba bin seibe laip blo yumi. Rid 1 Zon 4:8-10 NWT, ane tokbaut dem kwestin ya:
Aukam sakripais blo Zizas i wan spesil gipt?
Wiskain yu pil baut wanem Zeoba ane Zizas bin mekem po yu?
Wiskain yumi ken soe eso gobaigen po wanem Zeoba ane Zizas bin mekem po yumpla? Rid 2 Korint 5:15 ane 1 Zon 4:11; 5:3. Apta yu ride dem skripsa, tokbaut dis kwestin ya:
Prom wanem dem skripsa i spik, wiskain yumi go soe eso gobaigen?
4. Pole wei blo Zizas
Wan nadawei po soe eso gobaigen i po pole wei blo Zizas. Rid 1 Pita 2:21 NWT, ane tokbaut dis kwestin ya:
Lo wanem wei ken yu pole wei blo Zizas klostuwan?
Zizas labe Wod blo God, prise da gudniuz, ane elpe ol nada pipol
5. Gopo da Memorial po rimemba ded blo Kraist
Po luk wanem bin apen melen wea da pastaim ol bin gad da Las Sapa blo da Lod, rid Luk 22:14, 19, 20. Den tokbaut dem kwestin ya:
Wanem bin apen wea da Las Sapa?
Wanem da bred ane wain i min?—Rid Luk 22:19, 20.
Zizas bin wande ol klostuman blo em po rimemba da Las Sapa blo da Lod, wan taim ebri iya lo da seim taim ane deit wen em bin ded. So, ol Witnis blo Zeoba mit tugeda ebri iya po rimemba ded blo Kraist lo da seimwei em bin wandem. Po lanbaut dis impotant amenmiting, plei da BIDYO. Den tokbaut dis kwestin ya.
Wanem apen wea da Memorial?
Da bred ane wain i gad mining. Da bred min Zizas bodi wea i nogad sin dat em bin sakripais po yumpla. Da wain min blad blo em
SAM PIPOL SPIK: “Ol yu mas mekem po bi seib i po bilib lo Zizas.”
Wiskain yu ken yuze Zon 3:16 ane Zemes 2:17 po soe i gad mo po mekem po bi seib?
WANEM YU BI LAN
Yumi ken soe eso gobaigen po wanem Zizas bin mekem wen yumi prapa soe bilib wea em, ane wen yumi gopo da Memorial po rimemba ded blo em.
Wiskain Yu Go Spik
Wanem i min po soe bilib lo Zizas?
Wanem yu wande mekem po soe eso gobaigen po wanem Zeoba ane Zizas bin mekem po yu?
Aukam i mina impotant po gopo da Memorial po rimemba ded blo Kraist?
PAINDAUT MO
Wanem ded blo Kraist mube yumi po mekem?
Lan mo baut bilib blo Kristian ane wiskain yumi ken soem.
“Exercise Your Faith in Jehovahʼs Promises” (The Watchtower, October 2016)
Lo da stori “I Feel Clean, Alive, and Whole,” rid wiskain laip blo wan oman bin kam mobeta, wen em bin sabe wanem sakripais blo Kraist bin min po emselp.
Tingbaut aukam mata lelbet pipol kaikai bred ane dringk da wain wea da Memorial.