Wiskain Yumi Ken Gad Klinwei Sole Yumi Plize God?

Tingbaut wan labing mama uda redi em smolboi po skul. Em meikso em swim pas ane klos blo em i nais ane klin. Dis pasin elpe dis smolboi po stap elti ane soe ol nada pipol, mama ane papa blo em mina lugaut em. Seimkainwei, labing Papa blo yumi, Zeoba, wande yumi po bi klin tu​—klin wea bodi ane klin wea tingking, lo wiskain wi tok, ane wanem wi mekem. Wen wi gad demkain klinwei, i mina gud po yumi ane gibe ona po Zeoba.

1. Wiskain yumi ken stap klin?

Zeoba spik yumi: “Yupla mas mata stap oli.” (1 Pita 1:16) Ip wi mas bi oli, i min mipla mas stap klin wea bodi ane klin wea tingking, wea wiskain wi tok, ane wanem wi mekem. Yumi ken stap klin wea bodi wen wi swim ebridei ane kipe klos, aus ane motoka nais ane klin. Yumi ken elp po klinap mipla Kingdom Aus tu. Bikoz mipla stap klin wea bodi, yumi gibe ona po Zeoba.​—2 Korint 6:3, 4.

2. Po stap klin, wanem nugud samting yumi mas no mekem?

Baibol spik: “Yumpla i mas meke yumpla laip po stap klin prom ebriting wea i go meke bodi ane spirit blo yumpla kam nugud.” (2 Korint 7:1) Dasmin, yumi mas traiad po stap prom meke eniting dat ken spoile bodi ane main blo yumi. Tingking blo yumi mas plize Zeoba, so wi mas trai mina ad po tekemaut eni nugudtot. (Song blo Sam 104:34) Yumi wok ad po no tok nugudwei tu.​—Rid Kolosi 3:8.

Wanem nada samting dat ken meke main ane bodi blo yumi dati? I gad sam ting dat ken spoile bodi blo yumi. Daswai yumi stap prom smok, o yuze nugudsmok, o kaikai betel nut, o teke eni drag wea i gense lo po yuzem ane yumi no luk po yuze mersin obamak wea i erte bodi blo yu. Wen yumi no meke demkainting, yumi go gad elti bodi ane soe rispekt po da laip God bin gibe yumi. Yumi ken stap klin tu, wen wi paite da ubi po meke dati samting wase masturbation, diswan i wen sambodi tase o rabe praibat pat blo demplaselp. Ane yumi mas no luk ol piksa o mubi wea i gad neket man o oman, wase pornography. (Song blo Sam 119:37; Episis 5:5) Wi mait pil dem nugudting kese mipla ane i no izi po stapem, bat Zeobe ken elpe mipla bite demting.​—Rid Aizaia 41:13.

TINGBAUT MO NAU

3. Klinwei wea laip gibe ona po Zeoba

Wen yumi ride dem lo, Zeoba bin gibe pipol blo Izrael, yumi lan i impotant po Zeoba dat em pipol i klin. Rid Eksodis 19:10 ane 30:17-19, ane tokbaut dem kwestin ya:

• Wiskain dem skripsa soe tingking blo Zeoba, baut wanem i min po bi klin?

• Wanem gudsamting yu sabe yu ken mekem, po kipe ebriting klin?

I teke taim ane adwok po kipe ebriting klin. Bat yumi ken mekem, nomata wea wi stap o nomata wi gad plenti mani o gad lelbet samting. Plei da BIDYO, ane tokbaut dis kwestin ya.

BIDYO: God Labe Klin Pipol (4:10)

• Aukam da pipol yumi mitem wea amenwok, go gad mo rispekt po Zeoba, wen ol luk ol samting blo mipla i nais ane klin?

4. Bite dem dati wei

Ip yu smok o yuze drag, wase nugudsmok, yu mait olredi sabe i ad po bite demting yu bin oltaim mekem. Wanem ken elp? Trai tingbaut wanem go apen po yu ip yu no stapem. Rid Matiu 22:37-39, ane ip sambodi smok o yuze drag, tokbaut wiskain i go spoile . . .

• dempla prom stap klostupren wea Zeoba.

• ol pamle ane pren raun wea dempla.

Meke plan, sole yu stap prom dem nugud samting ane bitem.a Plei da BIDYO.

BIDYO: I Impotant po Kontrol Yuselp (2:47)

Rid Pilipi 4:13 NWT, ane tokbaut dis kwestin ya:

• Wen sambodi ebritaim prea, Baibol stadi, ane gopo amenmiting, wiskain i go gibe dempla strong po stape dem nugud samting?

5. Paite ol nugudtot ane nugudwei

Rid Kolosi 3:5, ane tokbaut dem kwestin ya:

• Wiskain yumi sabe Zeoba eite ol dati ting wase pornography, masturbation, ane sexting​—diswan i wen sambodi sane neket piksa o dati mesiz lo pon?

• Wiswei, yu tingk yumi ken meke klinwei wea laip, wase da wei Zeoba i wandem a? Aukam?

Lan wanem yu ken mekem po paite eni nugudtot. Plei da BIDYO.

BIDYO: Tanewei ane Stap Klin (1:51)

Zizas bin yuze wan stori po soe yumi mas meke ebriting wi ken mekem, po stap klin. Rid Matiu 5:29, 30 NWT, ane tokbaut dis kwestin ya:

• Zizas no bin wande yumi po kate miplaselp, bat em bin min dat yumi mas wok ad po tekemaut da rong samting prom yumi laip. Wanem adwok mas sambodi mekem sole ol ken kamaut dem nugudtot?b

Ip yu olredi trai po paite dem nugudtot, rimemba dat Zeoba tekenotis wiskain yu trai mina ad. Rid Song blo Sam 103:13, 14, ane tokbaut dis kwestin ya:

• Ip yu stragal wea samting wea i no klinwei, wiskain dis skripsa gibe yu strong po no gibap?

Ip yu poldaun, yu ken gedap gen!

I maitbi izi po tingk diskain, ‘I ad po gibap dis rongting, so ai nogo boda.’ Bat tingbaut nau: Nomata wan man uda rane reis, mait paulap wea em traik ane poldaun, em no nid po gobaigen po state reis gen, wa, em stil ken win. Seimkainwei, ip yu poldaun ane meke da rongting gen, rimemba dat yu stil gad sans po bite dat nugud samting. I nogo waipemaut dem adwok yu bin olredi mekem. So, no wori tumas bikoz i pat blo dat rod po kam beta. Wa, no gibap! Yu ken bite dat nugud samting, bikoz Zeoba go elpe yu.

WANEM YU BIN LAN

Yumi plize Zoeba wen wi kipe klinwei wea yumi bodi, tingking, ane wanem wi mekem.

Wiskain Yu Go Spik

• Aukam i mina impotant po bi klin?

• Wiskain yu ken kipe klinwei wea bodi ane demting yu gad wase klos ane aus?

• Wiskain yu ken kipe klinwei wea tingking ane wanem yu mekem?

PAINDAUT MO

Wanem izi samting yu ken mekem po bi klin, nomata yu gad lelbet?

Stap Klin ane Elti—Wase An Blo Yu (3:01)

Lan wanem yu ken mekem po stap prom smok.

“How to Quit Smoking” (Awake!, May 2010)

Paindaut wiskain pornography ken spoile main.

“Pornography—Harmless or Toxic?” (The Watchtower, August 1, 2013)

Ridbaut wanem bin elpe wan man stap prom luk pornography.

“I Failed Many Times Before I Succeeded” (The Watchtower No. 4 2016)