LESEN 59
Yu Ken Bi Redi po Mata Kipgo Wen Trabol i Kam
Ebri Kristian, maitbi nau o bambai, go sapa nugud tritment prom pipol uda go kamap, gense dempla bikoz ol serbe Zeoba. Wiswei, mas yu prait a?
1. Aukam yumi no atzamp wen pipol gense mipla?
Da Baibol tok stret: “Ebriwan uda wande meke ebriting wanem Zizas Kraist i wandem, dempla tu go go tru olkain trabol.” (2 Timoti 3:12) Pipol bin gense Zizas bikoz em no bin tekesaid blo wold blo Satana. Mipla no zoin wea eniting da wold i mekem tu, so mipla no sapraiz wen gabman o rilizan gense mipla.—Zon 15:18, 19.
2. Wiskain wi go meke redi nau po wen pipol gense mipla?
I mina impotant po trase Zeoba mo nau. Meke taim ebridei po prea ane ride Wod blo em tu. Ebritaim gopo amenmiting. Demting go redi yu, sole yu ken stanap strong ane no prait wen pipol go meke trabol po yu, iben ip i kam prom pamle. Misnareman Pol bin gad pipol kamap gense em plentitaim, bat em spik: “Diswan da AntapGod [Zeoba] uda i elpe mi, so ai nomo go prait nau.”—Ibrupipol 13:6.
Wen yumi go amenwok ebritaim, i lane yumi sole wi no prait po tok. Wa, i lane yumi po trase Zeoba ane no prait prom wanem pipol i tingk. (Proberb 29:25) Ip yu lan nau po stanap po pris, no prait, yu go redi yuselp, bambai wen gabman gense wok blo mipla, yu nogo laue dempla po stape yu.—1 Tesalonika 2:2.
3. Wanem blesing go kam bikoz yumi mata kipgo?
Mipla sabe i no izi po sapa nugud tritment bikoz pipol gense mipla, bat wen wi mata kipgo, bilib blo yumi go kam mostrong. Wa, yumi kam moklostu po Zeoba bikoz wi gede elp prom em wen wi no pil strong. (Rid Zemes 1:2-4.) Zeoba pil sore wen em luk yumi sapa, bat i meke em api wen yumi no gibap. Baibol i spik: “Bat ip yupla meke raitting ane trabol i kam po yupla, no meke at blo yupla kamap. Wen yu mekem diskain yupla meke God prapa api.” (1 Pita 2:20) Zeoba go blese demwan uda kip serbe em. Ol go stap lo ert poeba ane nobodi go stape dempla prom wosip God.—Matiu 24:13.
TINGBAUT MO NAU
Lan aukam yumi ken sabe, wi ken kiptru po Zeoba nomata pipol meke mipla sapa, ane luk da blesing em go gibem bambai.
4. Yu ken stap strong nomata ol pamle gense yu
Zizas bin prapa sabe dat sam pamle blo mipla mait no wande yumi po serbe Zeoba. Rid Matiu 10:34-36, ane tokbaut dis kwestin ya:
Wanem pamle mait spik o mekem, wen samwan prom dempla pamle suz po serbe Zeoba?
Po luk wan stori baut diskain samting, plei da BIDYO, den tokbaut dis kwestin ya.
Wanem yu go mekem ip pamle o pren go trai po stape yu prom serbe Zeoba?
Rid Song blo Sam 27:10 ane Mak 10:29, 30. Apta yu ride dem skripsa, tokbaut dis kwestin ya:
Wiskain dem promis go elpe yu wen pamle o pren blo yu trai stape yu prom serbe Zeoba?
5. No laue eni nugud tritment po stape yu prom wosip Zeoba
Wen nada pipol trai po stape yu prom serbe Zeoba, yu nid po bi strong ane yu kan prait. Plei da BIDYO, den tokbaut dis kwestin ya.
Wanem dem bala ane sisi lo da bidyo bin mekem, dat ken elpe yu pil mostrong?
Rid Pas Misnare Wok 5:27-29 ane Ibrupipol 10:24, 25. Apta yu ride dem skripsa, tokbaut dis kwestin ya:
Iben ip gabman trai stape yumi prom meke amenwok o amenmiting, aukam i mina impotant po mata wosip Zeoba?
6. Zeoba go elpe yu po mata kipgo
Ol Zeoba Witnis, yang ane oul, prom oloba da wold, stap longsaid Zeoba ane serbe em, nomata ol mait sapa rap tritment. Wanem bin elpe dempla, plei da BIDYO. Den tokbaut dis kwestin ya.
Lo da bidyo, wanem bin elpe dem amenbala ane sisi po kipgo ane no gibap?
Rid Rom 8:35, 37-39 ane Pilipi 4:13. Apta yu ride dem skripsa, tokbaut dis kwestin ya:
Wiskain dis skripsa ken elpe at blo yu pilgud po sabe, yu ken kipgo ane no gibap wen eni trabol i kam?
Rid Matiu 5:10-12, ane tokbaut dis kwestin ya:
Aukam yu ken bi api nomata pipol i eite yu??
Mina plenti milion Zeoba Witnis sapa nugud tritment wen pipol gense dempla, bat ol no laue demkainting po stape dempla prom serbe Zeoba. Yu ken tu!
SAM PIPOL SPIK: “Ai nogo gad nap strong po stanap ip gabman go gense mi.”
Wanem skripsa go meke dempla pil redi, sole ol ken stanap?
WANEM YU BI LAN
Zeoba tekenotis ane go kipe demwan uda sapa nugud tritment, bikoz ol kipgo ane wande serbe em. Wen elp i kam prom em, wi ken mata kipgo ane no gibap!
Wiskain Yu Go Spik
Aukam ol Kristian no atzamp wen pipol kam gense dempla?
Wanem yu ken mekem nau, po redi yuselp wen pipol o gabman kam gense yumi?
Wanem ken elpe yu pil mostrong, dat yu ken serbe Zeoba nomata eni trabol i kam?
PAINDAUT MO
Luk wan yangbala eksplein wiskain Zeoba bin elpe em po kipgo, wen ol bin sane em gopo zeil, bikoz em no tekesaid blo eni gabman.
Luk wanem bin elpe wan man ane oman serbe Zeoba, nomata pipol bin gense dempla po longtaim.
Lan wiskain yu ken pil redi ane no prait wen pipol go gense yu.
Wen pamle gense yumi, wanem yumi ken mekem po kipe pis ane stil serbe Zeoba?
“The Truth Brings, ‘Not Peace, But a Sword’” (The Watchtower, October 2017)