Wiskain Yu Ken Plize Zeoba Prom Da Wei Yu Tok?

Wen Zeoba bin meke yumi, em bin gibe yumi wan mina nais gipt—maut po tok. Wiswei, yu tingk em kea baut da wei wi yuze dat nais gipt a? Wa, i impotant po em! (Rid Zemes 1:26.) So wiskain wei wi ken tok sole wi plize Zeoba?

1. Wiskain yumi go gudwei yuze da gipt po tok?

Da Baibol spik, yumi “mas tok gudwei po wananada. Meke bilib blo wananada po kam mostrong.” (1 Tesalonika 5:11) Wiswei, yu sabe enibodi yu ken inkariz? Wanem yu ken mekem po meke dempla pil mobeta? Spik dempla yu kea baut dempla. Mait yu ken spik samting dat yu laik baut dempla. Ken yu tingbaut wan skripsa dat ken inkariz samwan yu sabe? I gad plenti skripsa yu ken yuzem. Rimemba, dem wod wi yuzem i impotant, bat i da wei wi tok, ken meke samwan mostrong tu. So oltaim trai po spik lo nais ane soptwei, no rapwei.—Proberb 15:1.

2. Yumi mas no tok lo wiskain wei?

Da Baibol spik: “Yupla mas no tok olkain nugudtok.” (Rid Episis 4:29.) Diswan i min yumi no swea o yuze nugud wod, o tok wailwei o sake tok wea i min po erte sambodi. Yumi mas no kareyan po daune o rabis sambodi po spoile neim blo dempla.—Rid Proberb 16:28.

3. Wanem go elpe yumi tok gudwei po inkariz nada pipol?

Demting wi tingbaut ane sidaun insaid at blo yumi, go kamaut prom maut bambai. (Luk 6:45) So i impotant po lane yumiselp po tingbaut ol gudsamting—wase demting wea i gud ane klin, ol naisting dat ken inkariz ane samting po gibe preiz. (Pilipi 4:8) Sole yumi pute main po demting, wi mas suze ol gudpren ane gudsamting wi mekem po pan. (Proberb 13:20) I gud po teke taim, tingk pas, bipo yumi spik samting. Trai po tingbaut wiskain dem wod yu yuzem go meke nada pipol pil. Da Baibol spik: “Eni tok wea i lego mata paipa wei, i wase sod wea i draibem, bat da tang blo da waizwan go ile em.”—Proberb 12:18.

TINGBAUT MO NAU

4. Tingk pas baut da wei yu go tok, ane wen yu go tok

Samtaim, mipla ken tok rongwei ane pil sem apta. (Zemes 3:2) Rid Galasia 5:22, 23, ane tokbaut dem kwestin ya:

• Po kontrol wiskain yu tok, wanem pasin ken yu prea baut po elpe yu? Wiskain i gud po yu, wen yu pole dem pasin?

Rid 1 Korint 15:33, ane tokbaut dis kwestin ya:

• Wiskain da wei yu tok ken seinz, prom uda yu angraun, o wanem yu wasem, o wanem yu mekem po pan?

Rid Iklaziastis 3:1, 7, ane tokbaut dis kwestin ya:

• Wanem taim i waiz po mata stap kuaiat o weitpas po nada beta taim po spik samting?

5. Mata spik ol gudting baut nada pipol

BIDYO: “Tok Gudtok po Elpe Pipol po Kam Strong” (4:07)

• Lo da bidyo, aukam dis bala bin wande seinze da wei em bin tokbaut nada pipol?

• Wanem em bin mekem po seinz?

Rid Iklaziastis 7:16, ane tokbaut dis kwestin ya:

• Wanem mas yu rimemba pas, ip yu pil redi po tok nugud baut samwan?

Rid Iklaziastis 7:21, 22, ane tokbaut dis kwestin ya:

• Wiskain dis skripsa ken elpe yu po no kam wail o apset wen samwan daune yu?

6. Tok naiswei po pamle blo yu

BIDYO: Lab ane Rispekt Elpe Pamle Stap Tugeda (3:08)

• Wanem go elpe yu po tok naiswei po pamle blo yu?

Rid Episis 4:31, 32, ane tokbaut dis kwestin ya:

• Wiskain yumi ken tok po pamle blo mipla lo wei wea i meke dempla pilgud?

Zeoba bin tok stret baut wiskain em pil baut em Boi, Zizas. Rid Matiu 17:5, ane tokbaut dis kwestin ya:

• Wiskain yu ken pole Zeoba wea da wei yu tok po pamle blo yu?

WANEM YU BI LAN

Dem wod wi yuzem ken elpe pipol o erte dempla. Yumi mas tingk pas baut wanem po spik, wen po tok, ane da wei po tok.

Wiskain Yu Go Spik

• Wanem sam wei yu ken tok po nada pipol po elpe dempla?

• Yumi mas no tok lo wiskain wei?

• Wanem ken elpe yumi po oltaim tok nais ane gudwei po pipol?

PAINDAUT MO

Wanem ken elpe yumi po tok lo gudwei po inkariz sambodi?

Develop the Tongue of the Wise Ones (8:04)

Lan wiskain yu kan stap prom swea ane yuze nugudtok.

“Is Cursing Really That Bad?” (Web article)

Lan wiskain yu ken stap prom kareyan po daune samwan.

Wiskain Ai Ken Stap Prom Kareyan? (2:36)

Lanbaut wiskain Zeoba bin elpe wan man uda bin stragal po stap swea.

“I Began to Think Seriously About Where My Life Was Headed” (The Watchtower, August 1, 2013)