Wanem God Spikbaut Blad?

Blad i mina impotant. Ip yumi nogad blad wea bodi, wi nogad laip. God bin meke yumpla, so em gad da rait po spik wiskain po yuze blad. Wanem em bin spikbaut blad? Wiswei, ken yumi kaikai blad o pute blad insaid bodi a? Ane, wiskain yumi ken suze da raitwei wen i kam po yuze blad?

1. Wanem Zeoba spikbaut blad?

Zeoba bin spik po dempla uda wosip em lo Baibol taim: “Da blad blo ebri laipsamting i laip blo em.” (Labitikas 17:14) Po Zeoba, blad i min laip. Da laip God bin gibe yumi i mina spesil, o oli, ane blad i mina spesil tu.

2. Wanem God spik i rongwei po yuze blad?

Notlong apta da Bigplad Wata wea taim blo Noa, Zeoba bin gibe lo po demwan uda wosip em, ol mas no kaikai blad. Em bin gibe dis lo gen, po dem pipol blo Izrael. (Rid Zenasis 9:4 ane Labitikas 17:10.) Den, taim blo da Kristian kongrigeisin, Zeoba bin spik da seimting gen po dempla, “no kaikai . . . blad.”​—Rid Pas Misnare Wok 15:28, 29.

Wanem dis skripsa i min? Ip wan dokta spik yu po stap prom dringk wain, yu mas stap prom dringk. Bat, yu tingk yu go laue yuselp po kaikai eniting wea i gad wain insaid, o yuze nidol po pute wain insaid bodi? Nono! So, wen God spik no po kaikai blad, i min yumi mas no dringk blad, o kaikai eni mit wea i stil gad blad insaid. Da blad mas kapsaid ausaid prom da mit pas. Yumi mas no kaikai eniting wea sambodi kukem wea blad tu.

So wiswei wen ol dokta yuze blad po trite pipol? Sam tritment wea ol i yuze blad, da lo blo God prapa no lauem. Wanwei, i wen ol yuze nidol po pute blad insaid bodi, wase blad transfusion. Nadawei, i wen ol splitemap blad po gede 4 dipren pat​—red cell, white cell, platelet, ane plasma​—ane yuzem po meke blad transfusion tu. Bat den, sam nada tritment, Baibol no eksplein ip i gense lo blo God. Dem tritment yuze fraction prom da blad. Fraction i dem nadakain smolpat ol i gedem prom dem 4 dipren pat blo blad apta ol separeitem mo. Den, sam nada tritment, pipol mait yuze blad blo demplaselp. Wen yumi tingbaut dem dipren tritment, i aptu miplaselp, po meke main po sabe wanem wi go mekem.a​—Galasia 6:5.

TINGBAUT MO NAU

3. Yuze tritment prom dokta dat ken plize Zeoba

Wiskain yu ken suze tritment dat lainap wea tingking blo God? Plei da BIDYO, ane tokbaut aukam i impotant po pole dem samting wea da list ya:

BIDYO: Wanem Tritment Yu Ken Yuzem Wen I Kam Po Blad (5:47)

• Prea po elp po bi waiz.​—Zemes 1:5.

• Stadi Baibol po lukraun skripsa wea i soe tingking blo God, po sabe wiskain i ken elpe yu.​—Proberb 13:16.

• Paindaut wiskain tritment i gad, klostu wea yu stap.

• Meikso yu sabe wanem tritment yu no wande tekem.

• Meikso wanem yu suzem, meke yu pilgud insaid bikoz i rait wea God.​—Pas Misnare Wok 24:16.b

• Meikso nobodi​—no iben maretmet blo yu, o Kristian elda, o Baibol tisa blo yu—​spik yu wanem po mekem bikoz i aptu yu po suzem.​—Rom 14:12.

• Raitemdaun wanem yu suz po mekem sole dokta ane pamle go sabe tu.

4. Ol Zeoba Witnis mata wande da bes tritment prom dokta

Yu ken obei lo blo God baut blad ane stil gede da bes tritment wea i no yuze blad. Plei da BIDYO.

BIDYO: Dokta Massimo P. Franchi, M.D. Tokbaut Blad (1:36)

Rid Taitas 3:2, ane tokbaut dis kwestin ya:

• Aukam yumi mas soe rispekt ane gudpasin wen yumi tok po dokta?

Ol Kristian no tekem	Ol Kristian mait suzem
1. Blood plasma	Fraction ol tekem prom plasma
2. White cell	Fraction ol tekem prom ol white cell
3. Platelet	Fraction ol tekem prom ol platelet
4. Red cell	Fraction ol tekem prom ol red cell

5. Wen i yuze ol blad fraction

Blad gad 4 mein pat​—red cell, white cell, platelet, ane plasma. Dem dipren pat gad plenti smolsmol pat insaid em, wea ol i kolem blad fraction.c Sam dem fraction i yuzem insaid ol nada mersin dat elp trite siknis ane diziz, o elp stap prom luze tumas blad.

Wen i kam po dem blad fraction, ebri Kristian mas meke main po demplaselp, prom wanem em bin lan prom Baibol. Sam pipol mait suz po no gede wan tritment, o mersin wea i gad blad fraction insaid. Nada pipol mait go pil rait insaid, ip ol wande gede tritment wea i yuze dem fraction.

Wen yu mas suz wanem yu go mekem, tingbaut dis kwestin ya:

• Aukam ai nogo teke sam blad fraction, bat nada taim ai mait suz po yuze dipren blad fraction? Wiskain ai go ekspleinem po mai dokta?

WANEM YU BI LAN

Zeoba wande yumi po rimemba dat blad i oli, so em no wande yumi po yuze blad rongwei.

Wiskain Yu Go Spik

• Aukam Zeoba spik blad i mina spesil, o oli?

• Wiskain yumi sabe, da lo God bin gibem baut blad, i min no po teke blad transfusion tu?

• Wiskain yu ken suze da rait tritment o mersin, wen i kam po blad?

PAINDAUT MO

Wanem go elpe yu po meke main, baut tritment wea i yuze blad blo yu?

“Questions From Readers” (The Watchtower, October 15, 2000)

Wanem go elpe yu meke main, ip yu go yuze blad fraction?

“Questions From Readers” (The Watchtower, June 15, 2004)

Wanem bin elpe wan dokta gri wea tingking blo Zeoba baut blad?

“I Accepted Godʼs View of Blood” (Awake!, December 8, 2003)

Lanbaut wiskain ol elda wea da Hospital Liaison Committee elpe ol amenbala ane sisi blo dempla.

Zeoba Lugaut Ol Sikwan (10:23)