3 João
3 João
1 Haʼu nuʼudar katuas ida, hakerek ba Gaio, haʼu-nia maluk doben, ida neʼebé haʼu hadomi tebes.
2 Haʼu-nia maluk doben, haʼu harohan katak ó sei iha saúde diʼak no katak buat hotu iha ó-nia moris sei laʼo ho diʼak hanesan uluk. 3 Haʼu haksolok tebes kuandu maun-alin sira fó sasin katak ó kaer metin ba lia-loos, no haʼu haksolok katak ó kontinua laʼo iha lia-loos neʼe. 4 La iha buat ida neʼebé halo haʼu haksolok* liu fali ida-neʼe, katak haʼu rona haʼu-nia oan sira kontinua laʼo iha lia-loos.
5 Haʼu-nia maluk doben, ó hatudu daudaun ó-nia laran-metin iha buat sira neʼebé ó halo ba maluk fiar-naʼin sira, maski ó la koñese sira. 6 Sira fó sasin ona iha kongregasaun nia oin kona-ba ó-nia domin. Kuandu sira husik hela ó-nia fatin, favór ida ajuda sira iha dalan neʼebé diʼak tuir Maromak nia haree. 7 No tanba Maromak nia naran mak sira bá atu haklaken, hodi la simu buat ida husi ema nasaun sira-nian. 8 Tan neʼe, ita iha knaar atu hatudu laran-diʼak ba ema sira hanesan neʼe, atu nuneʼe ita bele sai nuʼudar maluk serbisu-naʼin iha lia-loos.
9 Haʼu hakerek ona liafuan ruma ba kongregasaun, maibé Diótrefes, neʼebé hakarak atu sai uluk iha sira-nia leet, lakohi atu simu buat ida husi ami ho respeitu. 10 Tan neʼe mak kuandu haʼu toʼo neʼebá, haʼu sei hatudu sai buat neʼebé nia halo, basá nia koʼalia liafuan aat oioin kona-ba ami. No nia la kontente deʼit ho buat sira-neʼe, maibé nia lakohi simu maun-alin sira ho respeitu, no mós ema sira neʼebé hakarak simu maun-alin sira-neʼe, nia koko atu hanetik no hasai tiha husi kongregasaun.
11 Haʼu-nia maluk doben, keta banati-tuir buat neʼebé aat, maibé banati-tuir buat neʼebé diʼak. Ema neʼebé halo diʼak mai husi Maromak. Ema neʼebé halo aat seidauk haree Maromak. 12 Iha ona sasin barak kona-ba Demétrius nia hahalok diʼak liuhusi maun-alin sira hotu no liuhusi lia-loos. Tuir loloos, ami mós fó sasin kona-ba nia, no ó hatene katak sasin neʼebé ami fó mak loos.
13 Haʼu iha buat barak atu hakerek ba ó, maibé haʼu lakohi atu hakerek tan ba ó ho tinta no lapizeira. 14 Basá haʼu hein katak lakleur tan haʼu sei haree ó, no ita sei koʼalia oin ba oin.
Haʼu harohan katak ó iha dame.
Belun sira haruka sira-nia kumprimentus ba ó. Fó haʼu-nia kumprimentus ba belun sira ida-idak.