2 João
2 João
1 Haʼu, nuʼudar katuas ida, haʼu hakerek ba ó, feto neʼebé Maromak hili ona, no ba ó-nia oan sira neʼebé haʼu hadomi tebes, no laʼós deʼit haʼu, maibé mós sira hotu neʼebé hatene ona lia-loos. 2 Ami hadomi imi tanba lia-loos neʼebé hela iha ita, no neʼe sei hamutuk ho ita ba nafatin. 3 Maromak, neʼebé nuʼudar Aman iha lalehan, no mós ninia Oan-Mane, Jesus Kristu, sei fó lia-loos no domin ba ita. Sira sei hatudu laran-diʼak boot ba ita, no hatudu laran-sadiʼa, no fó dame ba ita.
4 Haʼu haksolok tebes tanba haʼu rona katak ó-nia oan balu laʼo iha lia-loos, hodi tuir ukun-fuan neʼebé ita simu ona husi Aman. 5 Entaun, ba ó, feto neʼebé Maromak hili ona, haʼu la husu ó atu halo tuir ukun-fuan foun ida, maibé haʼu husu ó atu halo tuir ukun-fuan neʼebé ita simu ona horiuluk kedas. Ukun-fuan neʼe dehan katak ita tenke hadomi malu. 6 No domin katak ita kontinua atu halo tuir ninia ukun-fuan sira. No hanesan imi rona ona horiuluk kedas, nia haruka imi atu kontinua hadomi malu. 7 Basá lohidór barak mosu ona iha mundu, no sira la fiar Jesus Kristu nuʼudar ida neʼebé mai iha isin. Ema neʼebé halo nuneʼe mak nuʼudar lohidór no Kristu nia inimigu.*
8 Kuidadu imi-nia an bá, atu nuneʼe imi la halakon buat neʼebé ami hakaʼas an atu halo iha imi-nia leet, maibé atu imi hetan kolen hotu neʼebé Maromak prepara ona ba imi. 9 Ema neʼebé laʼo sees husi Kristu nia hanorin no la hela iha hanorin neʼe, nia laʼós ida deʼit ho Maromak. Maibé, ema neʼebé hela nafatin iha hanorin neʼe mak ema neʼebé ida deʼit ho Aman no mós Oan. 10 Se ema ruma toʼo ba imi no la lori hanorin neʼe, imi keta simu nia iha imi-nia uma no keta kumprimenta nia. 11 Tanba ema neʼebé kumprimenta nia hola parte iha ninia hahalok aat sira.
12 Maski haʼu iha buat barak atu hakerek ba imi, maibé haʼu lakohi atu halo ida-neʼe ho surat-tahan no tinta, basá haʼu hein katak haʼu sei toʼo ba imi no koʼalia ba imi oin ba oin, atu nuneʼe imi-nia ksolok bele sai kompletu.
13 Kona-ba ó-nia biin neʼebé Maromak hili ona, ninia oan sira haruka sira-nia kumprimentus ba ó.