Marcos

6 No nia sai husi fatin neʼe no laʼo hodi tama ba ninia rai, no ninia dixípulu sira tuir nia. 2 Iha loron Sábadu, nia tama iha sinagoga no hahú hanorin, no ema barak neʼebé rona nia sai hakfodak no dehan: “Mane neʼe aprende buat sira-neʼe husi neʼebé? Oinsá mak nia simu matenek neʼe no simu kbiit atu halo milagre? 3 Laʼós nia mak badain-ai ida? Ninia inan mak Maria, no ninia alin sira mak Tiago, José, Judas, no Simão, loos ka lae? No ninia feton sira hamutuk ho ita, loos ka lae?” Tan neʼe sira lakohi fiar nia. 4 Maibé Jesus dehan ba sira: “Ema hatudu respeitu ba profeta ida iha rai sira seluk, só deʼit iha ninia rai rasik no iha ninia família nia leet no iha ninia uma rasik mak ema la respeitu nia.” 5 Entaun nia la halo milagre barak iha neʼebá, só deʼit tau liman ba ema balu neʼebé moras hodi kura sira. 6 No nia sai hakfodak tan sira la iha fiar. Tuirmai, nia laʼo husi knua ida ba knua seluk iha área neʼe hodi hanorin.

7 Tuirmai nia bolu sira naʼin sanulu-resin-rua no haruka sira rua-rua, no nia fó sira kbiit atu duni sai anju aat sira. 8 Nia mós haruka sira atu la lori buat ida iha dalan, katak la lori paun ka fatin ai-han nian, no mós la lori osan-riti iha osan-fatin, só lori deʼit ai-tonka ida 9 no sira bele uza sandálias, maibé labele uza roupa tahan rua. 10 Liután neʼe, nia hatete ba sira: “Kuandu imi tama iha uma ida, hela iha neʼebá toʼo imi husik fatin neʼe. 11 No iha fatin hotu neʼebé ema la simu imi ka la rona ba imi, kuandu imi sai husi fatin neʼe liki tiha rai-rahun husi imi-nia ain okos hodi sai nuʼudar sasin ba sira.” 12 Tuirmai sira bá no haklaken hodi ema bele hakribi sala. 13 No sira duni sai anju aat barak no kose mina ba ema barak neʼebé moras no kura sira.

14 No Liurai Herodes rona kona-ba neʼe tanba Jesus nia naran sai boot, basá ema dehan: “João Batista moris hiʼas ona husi mate, no tan neʼe mak nia iha kbiit atu halo milagre sira.” 15 Maibé ema seluk dehan: “Nia Elias.” No ema seluk tan dehan: “Nia mak profeta ida hanesan profeta sira husi tempu uluk.” 16 Maibé kuandu Herodes rona, nia hatete: “Neʼe mak João neʼebé haʼu tesi ona nia ulun. Nia moris hiʼas ona husi mate.” 17 Basá uluk Herodes rasik haruka ema atu kaer João no kesi hodi hatama iha komarka laran tanba Herodia, ninia maun Filipe nia feen; basá Herodes kaben ona ho feto neʼe. 18 No uluk João hatete beibeik ba Herodes: “Tuir ukun-fuan Ita-Boot labele kaben ho Ita-nia maun nia feen.” 19 Tan neʼe, Herodia rai odi ba João no hakarak atu oho nia, maibé la bele. 20 Basá Herodes taʼuk João, tanba nia hatene katak João mak ema loos no santu, no nia proteje João. Dala ida-idak neʼebé Herodes rona João koʼalia, nia la hatene atu halo saida ho João, maski nuneʼe nia kontinua atu rona ba João ho laran-kontente.

21 Maibé tempu diʼak ba Herodia atu halaʼo ninia hakarak mosu kuandu Herodes halo tinan. Iha tempu neʼe Herodes halo festa ba ninia ema-boot sira no komandante tropa sira no sira neʼebé naran boot iha Galileia. 22 No Herodia nia oan-feto tama hodi dansa, no ida-neʼe halo kontente Herodes no mós sira hotu neʼebé tuur hamutuk ho nia. Entaun liurai hatete ba feto neʼe: “Husu buat naran deʼit neʼebé ó hakarak, no haʼu sei fó ba ó.” 23 Sin, nia jura ba feto neʼe: “Buat naran deʼit neʼebé ó husu, haʼu sei fó ba ó toʼo haʼu-nia ukun nia sorin balun.” 24 Entaun nia sai hodi husu ba ninia inan: “Saida mak haʼu sei husu?” Ninia inan dehan: “João Batista nia ulun.” 25 Tuirmai, feto neʼe tama lalais hodi hasoru liurai no husu: “Haʼu hakarak Ita atu fó kedas ba haʼu João Batista nia ulun iha bikan ida.” 26 Maski ida-neʼe halo liurai laran-susar, maibé nia simu buat neʼebé feto neʼe husu, tanba nia jura tiha ona iha ninia bainaka sira-nia oin. 27 Tan neʼe liurai haruka kedas soldadu ida bá atu lori João nia ulun mai. Nuneʼe soldadu neʼe bá hodi tesi João nia ulun iha komarka. 28 No nia lori João nia ulun iha bikan ida, no fó ba feto neʼe, no feto neʼe fó ba ninia inan. 29 Kuandu João nia dixípulu sira rona kona-ba neʼe, sira bá hodi foti ninia mate-isin no hakoi iha rate.

30 No apóstolu sira halibur iha Jesus nia oin no konta ba nia buat hotu neʼebé sira halo no hanorin. 31 Nia hatete ba sira: “Mai ita laʼo mesamesak ba fatin fuik ida atu deskansa uitoan.” Basá ema barak mai no bá, no sira la iha tempu atu deskansa no mós atu han. 32 Entaun sira saʼe ró no bá fatin fuik ida hodi mesamesak. 33 Maibé ema haree sira kuandu sira bá, no ema barak mós rona kona-ba neʼe, entaun ema husi sidade hotu halai tuir sira, no ema sira-neʼe toʼo uluk iha fatin neʼebé sira atu bá. 34 Kuandu nia tun husi ró, nia haree ema-lubun boot, no nia hanoin tebetebes ba sira, tanba sira hanesan bibi neʼebé bibi-atan la iha. No nia hahú hanorin sira buat barak.

35 Bainhira rai besik kalan ona, ninia dixípulu sira hakbesik nia no dehan: “Fatin neʼe fuik, no rai kalan ona. 36 Haruka ema sira-neʼe fila hodi sira bele bá knua ka fatin sira neʼebé besik atu bele sosa buat ruma atu han.” 37 Nia hatán ba sira: “Imi mak fó sira buat ruma atu han.” Sira dehan ba nia: “Entaun, ami tenke bá no sosa paun ho osan denáriu* 200 hodi fó ba ema sira-neʼe atu han ka?” 38 Nia hatete ba sira: “Imi iha paun fuan hira? Bá haree toʼok!” Depois haree tiha, sira hatete: “Lima, no mós ikan rua.” 39 Tuirmai nia haruka ema hotu atu fahe ba grupu balu no tuur iha duʼut matak nia leten. 40 Nuneʼe sira tuur tuir grupu, balu atus ida no balu limanulu. 41 Foti tiha paun fuan lima no ikan rua neʼe, nia hateke ba lalehan no halo orasaun. Tuirmai nia silu paun no fó ba nia dixípulu sira atu fahe ba ema, no nia mós fahe ikan hodi fó ba sira hotu. 42 Nuneʼe sira hotu han toʼo bosu. 43 No sira halibur paun resin iha bote sanulu-resin-rua nakonu, no iha mós ikan resin. 44 Sira neʼebé han hamutuk mane naʼin-5.000.

45 Depois neʼe, nia haruka kedas ninia dixípulu sira atu saʼe ró no bá uluk tasi sorin hodi ba Betsaida, maibé nia rasik hela atu haruka ema-lubun fila. 46 No dehan tiha adeus ba sira, nia saʼe ba foho hodi halo orasaun. 47 Kuandu rai kalan ona, ró neʼe toʼo ona tasi klaran, maibé nia mesak deʼit mak iha rai-maran. 48 No besik tuku tolu dadeer nia haree katak susar tebes ba ninia dixípulu sira atu hean ró neʼe tanba anin huu hasoru sira. Entaun nia bá toʼo sira hodi laʼo iha tasi leten, maibé haree hanesan nia atu laʼo liu deʼit. 49 Kuandu haree nia laʼo iha tasi leten sira hakilar makaʼas dehan: “Neʼe mak vizaun ida!” 50 Sira hotu haree nia no sai taʼuk. Maibé nia koʼalia kedas ba sira dehan: “Aten-brani bá! Neʼe mak haʼu. Keta taʼuk.” 51 No nia tama ba ró laran hodi hamutuk ho sira, no anin para. Ho ida-neʼe, sira hakfodak tebes, 52 tanba sira seidauk komprende milagre paun nian katak sá, no sira-nia neon taka hela.

53 No kuandu sira toʼo ona rai-maran sira hatún ankor iha neʼebá, no tuirmai sira tama ba rai-Genesaré. 54 Maibé kuandu sira tun husi ró, ema hatene kedas nia, 55 no sira halai lalais hodi fó-hatene ema hotu neʼebé hela iha área neʼe, no sira hahú lori ba Jesus ema moras sira iha toba-fatin leten. 56 No kuandu nia tama ba sidade ida ka knua ida, sira tau ema moras sira iha merkadu no husu atu kaer deʼit ninia roupa ninin. No sira hotu neʼebé kaer ninia roupa hetan isin-diʼak.