Ezequiel

12 Jeová koʼalia tan mai haʼu, hodi dehan: 2 “Oan-mane husi ema, ó hela iha umakain kontradór nia leet. Sira iha matan, maibé labele haree, no sira iha tilun, maibé labele rona,+ tanba sira mak umakain kontradór.+ 3 Oan-mane husi ema, prepara pasta ida hanesan ó atu bá dadur. Durante loron bainhira sira haree hela, ó tenke laʼo ba fatin dadur nian. Ó tenke sai husi ó-nia uma hodi laʼo fali ba fatin seluk hanesan atu bá dadur* bainhira sira haree hela. Karik sira sei haree ó,* maski sira mak umakain kontradór. 4 Durante loron bainhira sira haree hela, ó tenke lori sai ó-nia pasta neʼebé haloot ona, no durante kalan bainhira sira haree hela, ó tenke laʼo sai hanesan ema neʼebé inimigu lori ba dadur.+

5 “Ó tenke halo kuak didin bainhira sira haree hela, no lori sai ó-nia sasán liuhusi kuak neʼe.+ 6 Ó tenke tau ó-nia sasán sira iha ó-nia kabaas no lori sai sasán neʼe iha nakukun laran bainhira sira haree hela ó. No ó tenke taka ó-nia oin atu nuneʼe ó labele haree rai, tanba haʼu halo ó sai nuʼudar sinál ba umakain Izraél.”+

7 Haʼu halo tuir duni Maromak nia mandamentu neʼe. Durante loron haʼu lori sai haʼu-nia pasta hanesan haʼu atu bá dadur, no durante kalan haʼu halo kuak didin ho haʼu-nia liman. No bainhira nakukun ona, haʼu foti haʼu-nia sasán sira, no tau iha haʼu-nia kabaas no lori sai iha sira-nia oin.

8 Iha dadeer Jeová koʼalia tan mai haʼu, hodi dehan: 9 “Oan-mane husi ema, umakain Izraél neʼebé kontradór husu ó ka lae, ‘Saida mak ó halo?’ 10 Dehan ba sira: ‘Jeová, Naʼi Ukun-Naʼin Boot Liu, dehan nuneʼe: “Neʼe mak avizu ba ulun-naʼin+ iha Jeruzalein no ba ema hotu husi umakain Izraél neʼebé iha sidade laran.”’

11 “Ó tenke hatete: ‘Haʼu mak sai sinál ba imi.+ Buat neʼebé sei akontese ba sira sei tuir buat neʼebé haʼu halo ona. Sira sei bá nuʼudar dadur.+ 12 Kona-ba ulun-naʼin neʼebé iha sira-nia leet, nia sei hulan ninia sasán iha ninia kabaas no laʼo sai iha nakukun laran. Nia sei halo kuak iha didin no lori sai ninia sasán liuhusi kuak neʼe.+ Nia sei taka ninia oin atu nuneʼe nia labele haree rai.’ 13 Haʼu sei soe haʼu-nia rede ba nia, no nia sei tama iha rede laran.+ Tuirmai haʼu sei lori nia ba Babilónia, ema Kaldeia nia rai, maibé nia sei la haree rai neʼe, no nia sei mate iha neʼebá.+ 14 Haʼu sei halo namkari ninia ajuda-naʼin no ninia tropa hotu neʼebé haleʼu nia,+ no haʼu sei losu surik hodi duni tuir sira.+ 15 Bainhira haʼu halo sira namkari iha nasaun sira-nia leet no iha rai oioin, sira sei hatene duni katak haʼu mak Jeová. 16 Maibé haʼu sei salva sira balu husi surik, hamlaha boot no moras-peste,* atu nuneʼe sira bele konta fali sira-nia hahalok aat hotu iha nasaun sira-nia leet neʼebé sira sei hela bá. Nuneʼe sira sei hatene duni katak haʼu mak Jeová.”

17 Jeová koʼalia tan ba haʼu, hodi dehan: 18 “Oan-mane husi ema, ó tenke han paun ho nakdedar no hemu bee ho laran-taʼuk no neon-susar.+ 19 Koʼalia ba povu iha rai neʼe: ‘Jeová, Naʼi Ukun-Naʼin Boot Liu, dehan nuneʼe kona-ba ema neʼebé hela iha Jeruzalein iha rai-Izraél: “Sira sei han sira-nia paun ho neon-susar no hemu sira-nia bee ho taʼuk, tanba sira-nia rai sei rahun hotu no sai mamuk+ tanba ema hotu halo violénsia iha sidade laran.+ 20 Sidade sira sei lakon, no rai neʼe sei sai fuik.+ Nuneʼe imi sei hatene duni katak haʼu mak Jeová.”’”+

21 Jeová koʼalia tan mai haʼu, hodi dehan: 22 “Oan-mane husi ema, tanbasá mak imi iha lia-dadolin iha rai-Izraél neʼebé dehan: ‘Loron sira liu ona, no vizaun hotu la sai loos’?+ 23 Entaun dehan ba sira: ‘Jeová, Naʼi Ukun-Naʼin Boot Liu, dehan nuneʼe: “Haʼu sei halakon lia-dadolin neʼe, no sira sei la temi tan lia-dadolin neʼe iha rai-Izraél.”’ No dehan ba sira: ‘Loron neʼe besik ona,+ no vizaun hotu sei sai loos.’ 24 Tanba ema sei la haree tan vizaun neʼebé la loos ka la siʼik tan futuru neʼebé bosok* iha umakain Izraél nia leet.+ 25 ‘Jeová, Naʼi Ukun-Naʼin Boot Liu, dehan: “Tanba haʼu, Jeová, mak sei koʼalia. Liafuan hotu neʼebé haʼu fó sai sei sai loos no la demora tan.+ Oh umakain kontradór, iha imi-nia tempu,+ haʼu sei fó sai no kumpre haʼu-nia liafuan.”’”

26 Jeová koʼalia tan ba haʼu, hodi dehan: 27 “Oan-mane husi ema, povu* Izraél dehan nuneʼe: ‘Vizaun neʼebé nia haree sei la akontese agora, no nia fó sai profesia neʼebé liutiha tempu kleur mak foin akontese.’+ 28 Tan neʼe, hatete ba sira: ‘Jeová, Naʼi Ukun-Naʼin Boot Liu, dehan nuneʼe: “‘Haʼu sei la demora atu kumpre haʼu-nia liafuan sira; haʼu sei kumpre buat hotu neʼebé haʼu fó sai’, Jeová, Naʼi Ukun-Naʼin Boot Liu mak dehan.”’”