Primeiru Korinto
4 Ami hakarak atu ema haree ami nuʼudar ajudante ba Kristu no atan* neʼebé tau matan ba Maromak nia segredu santu.+ 2 Kona-ba ema sira neʼebé sai nuʼudar atan, sira tenke laran-metin. 3 Se haʼu hetan tesi-lia husi imi ka husi ema nia tribunál, neʼe la iha folin ba haʼu. Tuir loloos, haʼu mós la tesi-lia ba haʼu-nia an rasik. 4 Haʼu rasik la hanoin katak haʼu halo ona sala ruma.* Maibé neʼe la dehan katak haʼu ema laran-loos ona. Ida neʼebé tesi-lia ba* haʼu mak Jeová.*+ 5 Tan neʼe, keta tesi-lia+ ba buat ida antes ninia tempu, toʼo Naʼi mai. Naʼi sei hatudu sai iha naroman buat neʼebé subar iha nakukun laran no sei hatudu sai ema ida-idak nia hanoin neʼebé iha sira-nia laran, no tuirmai ema ida-idak sei simu gaba husi Maromak tuir buat neʼebé nia merese.+
6 Maun-alin sira, haʼu koʼalia* buat sira-neʼe kona-ba haʼu-nia an rasik no Apolo,+ nuʼudar ezemplu ba imi-nia diʼak, atu nuneʼe imi bele aprende ukun-fuan tuirmai neʼe: “Keta halo liu fali buat neʼebé hakerek tiha ona”, hodi nuneʼe imi labele sai foti an+ no haree ema ida diʼak liu fali ema seluk. 7 Sé mak halo imi la hanesan ho ema seluk? Loloos, buat hotu neʼebé imi iha ona, imi simu neʼe husi Maromak,+ loos ka lae? Se imi simu ida-neʼe husi Maromak, tanbasá mak imi gaba an hanesan imi simu ida-neʼe ho imi-nia kbiit rasik?
8 Imi bosu ona ka? Imi riku ona ka? Imi ukun ona hanesan liurai+ maski la ho ami ka? Haʼu hakarak tebes katak imi hahú ukun ona hanesan liurai atu nuneʼe ami mós bele ukun hamutuk ho imi.+ 9 Tanba haʼu sente katak Maromak halo ona ami apóstolu sira sai hanesan grupu ikus neʼebé tama ba fatin teatru,* hanesan ema neʼebé atu simu kastigu-mate.+ Mundu tomak+ no anju sira no mós ema hateke ba ami. 10 Ema hanoin katak ami beik+ tanba Kristu, maibé imi matenek iha Kristu. Ami fraku, maibé imi iha kbiit. Imi simu respeitu, maibé ami hetan moe. 11 Toʼo oras neʼe ami kontinua hamlaha+ no hamrook+ no ladún iha roupa* no ema baku ami+ no ami la iha uma 12 no ami serbisu makaʼas ho ami-nia liman rasik.+ Kuandu ema koʼalia aat ami, ami fó bensaun ba sira.+ Kuandu ema fó-terus ba ami, ami tahan ho pasiénsia.+ 13 Kuandu ema koʼalia aat hodi hafoʼer ami-nia naran, ami hatán ho laran-maus.*+ Toʼo agora ami sai ona hanesan buat foʼer* ba mundu neʼe, no buat hotu nia foʼer.
14 Haʼu hakerek buat sira-neʼe, laʼós atu hamoe imi, maibé atu hanorin* imi nuʼudar haʼu-nia oan doben sira. 15 Tanba maski imi iha mestre naʼin-10.000 iha Kristu, maibé loloos imi ladún iha aman barak, tanba iha Kristu Jesus haʼu sai ona imi-nia aman liuhusi liafuan diʼak.+ 16 Tan neʼe, haʼu husu imi atu halo tuir haʼu-nia ezemplu.+ 17 Tan razaun neʼe mak haʼu haruka Timóteo ba imi, tanba nia mak ida neʼebé haʼu hadomi no oan neʼebé serbí Naʼi ho laran-metin. Nia sei fó-hanoin imi kona-ba haʼu-nia dalan sira atu serbí Kristu Jesus,+ hanesan haʼu hanorin ona iha fatin oioin iha kongregasaun hotu.
18 Ema balu husi imi hanoin katak haʼu sei la bá vizita imi, tan neʼe sira foti an. 19 Maibé lakleur tan haʼu sei bá vizita imi, se neʼe tuir Jeová* nia hakarak, no haʼu lakohi rona ema foti an sira-nia koʼalia, maibé haʼu hakarak atu hatene sira-nia kbiit.* 20 Tanba Maromak nia Ukun* laʼós kona-ba liafuan, maibé kbiit. 21 Entaun imi hakarak hili ida-neʼebé? Imi hakarak haʼu bá vizita imi ho rota,+ ka ho domin no laran-maus?