Apóstolu sira-nia atividade
28 Kuandu ami toʼo iha tasi-ibun ho seguru, ami foin hatene katak illa neʼe naran Malta.+ 2 Rai-naʼin sira hatudu laran-diʼak* ba ami. Sira sunu ahi no simu ami hotu ho laran-diʼak tanba udan tau no rai-malirin. 3 Maibé kuandu Paulo halibur ai lubuk ida no tau ba ahi, samea neʼebé iha venenu halai sai tanba manas, no samea neʼe tata metin Paulo nia liman. 4 Kuandu rai-naʼin sira haree samea neʼe tata metin hela nia liman, sira hahú dehan ba malu: “Mane neʼe ohodór duni, tanba maski nia toʼo tasi-ibun ho seguru, maibé Justisa* la husik nia atu kontinua moris.” 5 Maski nuneʼe, nia liki samea neʼe ba ahi laran no nia la hetan moras ida. 6 Maibé sira hein katak nia sei hetan bubu ka derrepente deʼit nia sei mate. Kuandu sira hein kleur ona no haree katak la iha buat ida mak akontese ba nia, sira troka sira-nia hanoin no dehan katak nia mak maromak ida.
7 Besik iha fatin neʼe, iha toʼos balu, no toʼos-naʼin mak ema-boot iha illa neʼe, no nia naran Públio. Nia simu ami ho laran-diʼak no tau matan ba ami durante loron tolu. 8 Iha momentu neʼe, Públio nia aman toba hela tanba isin-manas no tee-raan, entaun Paulo tama hodi hasoru nia no halo orasaun, no tau liman ba nia no kura nia.+ 9 Bainhira ida-neʼe akontese ona, ema moras seluk iha illa neʼe mai hasoru nia no nia kura sira.+ 10 Sira mós hatudu agradese ba ami hodi fó prezente barak, no kuandu ami atu saʼe ró, sira fó ami sasán barak neʼebé ami presiza.
11 Fulan tolu liutiha, ami saʼe ró ida neʼebé iha símbolu “Zeus nia Oan sira”.* Ró neʼe husi Alexandria no para iha illa neʼe durante tempu malirin. 12 Kuandu toʼo iha ponte-kais Sirakuza, ami hela iha neʼebá ba loron tolu. 13 Husi neʼebá ami bá toʼo iha Régio. Liutiha loron ida, anin husi parte súl huu no ami halo viajen toʼo iha Putéoli iha loron segundu. 14 Ami hetan maun-alin sira iha fatin neʼe no sira husu ami atu hela ho sira ba loron hitu. Depois neʼe, ami husik hela sira hodi bá Roma. 15 Kuandu maun-alin sira iha Roma rona katak ami atu bá neʼebá, sira mai hasoru ami iha merkadu Ápio, no mós iha fatin ida naran Uma Tolu.* Bainhira haree tiha sira, Paulo fó agradese ba Maromak no sai aten-brani.+ 16 Ikusmai ami toʼo iha Roma, no Paulo simu lisensa atu hela mesak iha uma hamutuk ho tropa neʼebé halo seguransa ba nia.
17 Maibé liutiha loron tolu, Paulo bolu ema-boot Judeu nian atu halibur hamutuk. Kuandu sira halibur hamutuk ona, nia dehan ba sira: “Maun-alin sira, maski haʼu la halo sala ida hasoru povu ka hasoru ita-nia beiʼala sira-nia toman,+ maibé husi Jeruzalein ema entrega haʼu ba ema Roma nuʼudar dadur.+ 18 Bainhira ema sira-neʼe buka-hatene didiʼak+ tiha kona-ba haʼu, sira hakarak atu husik haʼu livre tanba sira la iha razaun ida atu fó kastigu-mate ba haʼu.+ 19 Maibé kuandu ema Judeu sira la simu ida-neʼe, haʼu tenke husu atu lori kazu neʼe ba César,*+ maibé neʼe la dehan katak haʼu iha kazu ruma hodi duun haʼu-nia nasaun. 20 Entaun, tan razaun neʼe mak haʼu husu atu hasoru imi no koʼalia ho imi. Korrente sira-neʼe bobar haleʼu haʼu tanba Izraél nia esperansa.”+ 21 Sira dehan ba nia: “Ami seidauk simu karta ida husi Judeia kona-ba ó, no mós la iha maun-alin ida neʼebé mai husi fatin neʼebá mak konta ka koʼalia buat aat ruma kona-ba ó. 22 Maibé ami hanoin katak diʼak atu rona husi ó kona-ba ó-nia hanoin, tanba ami rona ona katak ema koʼalia kontra grupu relijiaun foun*+ neʼe iha fatin hotu.”+
23 Entaun, sira marka loron ida atu hasoru Paulo, no ema barak loos bá iha ninia hela-fatin. Hahú husi dadeer toʼo kalan, nia esplika ba sira hodi fó sasin ho didiʼak kona-ba Maromak nia Ukun.* Nia koko atu halo sira fiar kona-ba Jesus+ hodi hanorin husi Moisés nia Ukun-Fuan+ no Profeta sira-nia liafuan.+ 24 Ema balu hahú fiar buat neʼebé nia dehan, maibé balu seluk la fiar. 25 Entaun, tanba sira iha hanoin neʼebé la hanesan, Paulo koʼalia liafuan tuirmai neʼe bainhira sira komesa laʼo sai daudaun. Paulo dehan:
“Espíritu santu fó-hatene ho loloos liuhusi profeta Isaias ba imi-nia beiʼala sira, 26 hodi dehan: ‘Laʼo bá, no hatete ba povu neʼe: “Imi sei rona, maibé sei la komprende, no imi sei hateke, maibé sei la haree momoos.+ 27 Tanba povu neʼe taka sira-nia laran, sira rona maibé la halo tuir. Sira taka sira-nia matan hodi la haree no taka sira-nia tilun hodi la rona buat ida. Tan neʼe, sira-nia laran la komprende no la fila fali ba haʼu atu haʼu kura sira.”’+ 28 Tan neʼe, imi hatene bá katak mensajen kona-ba dalan neʼebé Maromak salva ema, fó sai daudaun ona ba nasaun sira seluk,+ no sira sei rona duni ida-neʼe.”+ 29 *——
30 Paulo hela iha neʼebá durante tinan rua iha uma neʼebé nia aluga,+ no ho laran-diʼak nia simu ema hotu neʼebé mai hasoru nia. 31 Nia la husik buat ida hanetik nia atu haklaken Maromak nia Ukun ba sira no hanorin kona-ba Naʼi Jesus Kristu ho aten-brani.*+