Ezequiel

3 Tuirmai nia dehan ba haʼu: “Oan-mane husi ema, han buat neʼebé iha ó-nia oin.* Han surat-tahan lulun neʼe no bá fó-hatene umakain Izraél.”+

2 Entaun haʼu loke haʼu-nia ibun, no nia fó surat-tahan lulun neʼe ba haʼu atu han. 3 Nia hatutan tan: “Oan-mane husi ema, han surat-tahan lulun neʼe neʼebé haʼu fó ba ó, no halo ó-nia kabun bosu.” Nuneʼe haʼu komesa han, no neʼe midar hanesan bani-been iha haʼu-nia ibun.+

4 Nia dehan ba haʼu: “Oan-mane husi ema, bá hasoru umakain Izraél no fó sai haʼu-nia liafuan ba sira. 5 Tanba haʼu haruka ó ba umakain Izraél, laʼós ba povu ida neʼebé ninia língua mak susar no ninia liafuan* susar atu komprende. 6 Haʼu la haruka ó ba povu neʼebé ninia língua mak susar no ninia liafuan susar ba ó atu komprende. Se haʼu haruka ó ba sira, sira sei rona ó.+ 7 Maibé umakain Izraél sei la rona ó, tanba sira lakohi rona haʼu.+ Ema hotu iha umakain Izraél mak ulun-toos no laran-toos.+ 8 Haʼu halo ona ó-nia oin sai toos hanesan sira-nia oin no ó-nia reen-toos sai toos hanesan sira-nian.+ 9 Haʼu halo ona ó-nia reen-toos sai hanesan fatuk-diamante,* toos liu fali fatuk-ahi.+ Keta taʼuk ba sira no keta nakdedar bainhira ó haree sira-nia oin,+ tanba sira mak umakain neʼebé kontradór.”

10 Nia dehan tan ba haʼu: “Oan-mane husi ema, rona didiʼak ba haʼu-nia liafuan hotu neʼebé haʼu koʼalia ba ó no rai ida-neʼe iha ó-nia laran. 11 Bá hasoru ó-nia povu neʼebé sai ona dadur*+ no koʼalia ba sira. Maski sira rona ka lakohi rona,+ ó tenke hatete ba sira: ‘Jeová, Naʼi Ukun-Naʼin Boot Liu, mak dehan.’”

12 Tuirmai espíritu* ida lori haʼu+ no haʼu rona lian boot husi kotuk neʼebé dehan: “Fó hahiʼi ba Jeová nia glória husi ninia fatin.” 13 Haʼu rona lian husi kriatura moris sira-nia liras neʼebé kona malu,+ no haʼu rona lian husi roda sira neʼebé besik sira,+ no rona mós tarutu boot. 14 No espíritu neʼe foti haʼu no lori haʼu. Haʼu bá ho laran-triste no laran-nakali, no haʼu sente Jeová nia forsa neʼebé boot.* 15 Entaun haʼu bá hasoru povu neʼebé sai ona dadur iha Tel-Abib, neʼebé hela besik Mota Kebar,+ no haʼu hela iha neʼebá iha sira-nia leet ba loron hitu. Durante loron sira-neʼe haʼu tuur hodi hanoin.*+

16 Liutiha loron hitu, Jeová koʼalia ba haʼu:

17 “Oan-mane husi ema, haʼu hili ó nuʼudar guarda* ba umakain Izraél.+ Kuandu ó rona liafuan husi haʼu-nia ibun, ó tenke fó sai haʼu-nia avizu ba sira.+ 18 Bainhira haʼu dehan ba ema aat: ‘Ó sei mate duni’, maibé ó la fó avizu ba ema aat neʼe, no ó la koʼalia hodi fó avizu ba nia atu sees husi ninia hahalok aat hodi bele kontinua moris,+ ema aat neʼe sei mate tanba ninia sala,+ maibé haʼu sei kastigu ó tanba ninia raan.*+ 19 Maibé se ó fó avizu ba ema aat no nia la sees husi ninia hahalok aat, ema neʼe sei mate tanba ninia sala, maibé ó sei salva duni ó-nia moris rasik.+ 20 Maibé kuandu ema laran-loos ida husik tiha ninia hahalok loos no halo fali buat neʼebé sala,* haʼu sei tau fatuk sidi nian iha ninia oin no nia sei mate.+ Se ó la fó avizu ba nia, nia sei mate tanba ninia sala no haʼu sei la hanoin-hetan ninia hahalok loos, maibé haʼu sei kastigu ó tanba ninia raan.*+ 21 Maibé se ó fó avizu ona ba ema laran-loos atu la halo sala, no nia la halo sala, nia sei kontinua moris tanba ó fó ona avizu ba nia,+ no ó mós sei salva ó-nia moris rasik.”

22 Jeová fó forsa mai* haʼu iha neʼebá, no nia dehan: “Hamriik, laʼo ba rai-tetuk, no haʼu sei koʼalia ho ó iha neʼebá.” 23 Entaun haʼu hamriik no laʼo ba rai-tetuk, no haʼu haree Jeová nia glória iha neʼebá,+ hanesan glória neʼebé haʼu haree ona besik Mota Kebar,+ no haʼu hakneʼak ho oin ba rai. 24 Tuirmai haʼu sai nakonu ho espíritu no espíritu neʼe halo haʼu hamriik,+ no Maromak dehan ba haʼu:

“Bá, sulan an iha ó-nia uma laran. 25 Kona-ba ó, oan-mane husi ema, sira sei kesi metin ó ho tali, atu nuneʼe ó labele laʼo iha sira-nia leet. 26 Haʼu sei halo ó-nia nanál belit ba ibun laran, no ó sei sai monok, hodi nuneʼe ó labele korrije sira, tanba sira mak umakain neʼebé kontradór. 27 Maibé bainhira haʼu koʼalia ho ó, haʼu sei loke ó-nia ibun, no ó tenke dehan ba sira:+ ‘Jeová, Naʼi Ukun-Naʼin Boot Liu, mak dehan.’ Husik ema neʼebé rona, rona bá,+ no ema neʼebé lakohi rona, lalika rona, tanba sira mak umakain neʼebé kontradór.+