Apóstolu sira-nia atividade

4 Kuandu sira naʼin-rua koʼalia hela ho povu, derrepente deʼit ulun-naʼin amlulik sira, xefe templu nian no ema Saduseu sira+ mai hasoru sira. 2 Sira hirus tanba apóstolu naʼin-rua neʼe hanorin povu no fó sai iha ema nia oin kona-ba Jesus nia moris-hiʼas husi mate.+ 3 Entaun, sira kaer apóstolu naʼin-rua neʼe no hatama iha komarka laran+ toʼo loron tuirmai tanba rai kalan ona. 4 Maibé povu barak neʼebé rona liafuan sira-neʼe sai fiar-naʼin, no fiar-naʼin sira-neʼe maizumenus hamutuk mane naʼin-5.000.+

5 Loron tuirmai, ema Judeu nia ukun-naʼin sira, katuas no eskriba sira halibur hamutuk iha Jeruzalein, 6 inklui mós ulun-naʼin amlulik nian naran Anas,+ Caifás,+ João, Alexandre, no mós sira hotu husi família ulun-naʼin amlulik nian. 7 Sira bolu Pedro no João hodi hamriik iha sira-nia klaran no sira hahú husu: “Sé mak fó imi kbiit atu halo ida-neʼe? Hodi sé-nia naran mak imi halo ida-neʼe?” 8 Tuirmai, Pedro nakonu ho espíritu santu,+ dehan ba sira:

“Povu nia ukun-naʼin no katuas sira, 9 se ohin imi husu ami tanba hakarak hatene kona-ba hahalok diʼak neʼebé ami hatudu ba mane ain-aat neʼe+ no kona-ba sé mak halo nia sai isin-diʼak, 10 entaun, imi hotu no mós povu Izraél hotu hatene bá katak liuhusi Jesus Kristu ema Nazaré+ nia naran mak mane neʼe hamriik iha imi-nia oin ho isin-diʼak. Jesus Kristu neʼe mak ida neʼebé imi oho ona iha ai-riin+ maibé Maromak halo nia moris fali husi mate.+ 11 Nia mak ‘fatuk neʼebé imi badaen sira la simu, maibé sai ona fatuk prinsipál’.*+ 12 La iha salvasaun liuhusi ema seluk, tanba la iha naran seluk+ iha lalehan nia okos neʼebé Maromak hili tiha ona atu salva ita.”+

13 Kuandu sira haree Pedro no João nia aten-brani, no mós hatene katak sira naʼin-rua mak ema la eskola* no ema baibain deʼit,+ sira sai hakfodak. No sira foin hatene katak ema sira-neʼe uluk hamutuk ho Jesus.+ 14 Bainhira sira hateke ba mane neʼebé hetan ona isin-diʼak hamriik hela ho apóstolu naʼin-rua neʼe,+ sira la iha tan liafuan ida atu koʼalia.+ 15 Entaun sira haruka mane naʼin-tolu neʼe sai husi fatin Sinédriu* no sira hahú koʼalia ba malu, 16 hodi dehan: “Ita tenke halo saida ba mane sira-neʼe?+ Tuir loloos sira halo milagre* ida neʼebé la hanesan baibain, no ema hotu neʼebé hela iha Jeruzalein haree;+ no ita labele nega ida-neʼe. 17 Maski nuneʼe, atu ida-neʼe la habelar tan iha povu nia leet, mai ita ameasa sira atu sira labele koʼalia tan ba ema seluk hodi naran neʼe.”+

18 Ho ida-neʼe, sira bolu apóstolu naʼin-rua neʼe no haruka sira atu labele koʼalia tan buat ruma ka hanorin hodi Jesus nia naran. 19 Maibé Pedro no João dehan ba sira: “Se imi hanoin katak rona ba imi duké rona ba Maromak mak buat loos iha Maromak nia oin, imi rasik deside bá. 20 Maibé ba ami, ami labele para atu koʼalia kona-ba buat neʼebé ami haree no rona ona.”+ 21 Entaun sira ameasa apóstolu naʼin-rua neʼe dala ida tan, depois neʼe sira husik livre tanba la hetan razaun ida hodi fó kastigu no mós sira taʼuk povu,+ tanba povu hotu fó glória ba Maromak kona-ba buat neʼebé foin akontese. 22 Mane neʼebé hetan isin-diʼak liuhusi milagre* neʼe mak tinan 40 liu.

23 Bainhira apóstolu sira-neʼe sai livre ona, sira bá hasoru dixípulu sira seluk no konta buat neʼebé ulun-naʼin amlulik sira no katuas sira dehan ba sira. 24 Rona tiha ida-neʼe, sira hotu ho laran ida deʼit harohan ba Maromak, dehan:

“Naʼi Ukun-Naʼin Boot Liu, Ita-Boot mak kria lalehan, rai, tasi no buat hotu neʼebé iha laran,+ 25 no hodi espíritu santu mak Ita koʼalia liuhusi Ita-nia atan David,+ ami-nia beiʼala, nia ibun, hodi dehan: ‘Tanbasá mak nasaun sira sai hirus no povu sira hanoin kona-ba buat neʼebé folin-laek? 26 Liurai sira iha mundu sai prontu ona no ukun-naʼin sira halibur hamutuk ho hanoin ida deʼit hodi kontra Jeová* no kontra ema neʼebé nia hili ona.’*+ 27 Tuir loloos, Herodes no Pónsio Pilatos,+ hamutuk ho ema husi nasaun sira no mós povu Izraél halibur iha sidade neʼe hodi kontra Ita-nia atan santu, Jesus, neʼebé Ita hili* ona.+ 28 Sira halibur hamutuk atu halo buat neʼebé Ita fó-hatene nanis ona.+ Buat sira-neʼe akontese tanba Ita iha kbiit* no tanba Ita-nia konsellu. 29 Agora, Jeová,* haree ba sira-nia ameasa, no fó aten-brani ba Ita-nia atan sira atu kontinua haklaken Ita-nia liafuan, 30 no kontinua lolo Ita-nia liman atu kura ema no mós kontinua hatudu sinál no milagre sira+ liuhusi Ita-nia atan santu, Jesus, nia naran.”+

31 Kuandu sira harohan hotu ona,* fatin neʼebé sira halibur hamutuk sai nakdoko, no sira hotu sai nakonu ho espíritu santu+ no fó sai Maromak nia liafuan ho aten-brani.+

32 Liután neʼe, ema barak neʼebé sai ona fiar-naʼin, sira hotu iha laran no neon ida deʼit, no la iha ema ida mak dehan katak sasán neʼebé nia iha mak ninian rasik, maibé sira fahe buat hotu ba malu.+ 33 Ho kbiit boot apóstolu sira kontinua fó sasin kona-ba Naʼi Jesus nia moris-hiʼas,+ no Maromak hatudu laran-diʼak neʼebé boot ba sira hotu. 34 Tuir loloos, iha sira-nia leet la iha ema ida mak falta buat ruma,+ tanba sira hotu neʼebé iha toʼos ka uma, sira faʼan buat sira-neʼe no lori folin husi buat neʼebé sira faʼan 35 hodi fó ba apóstolu sira,+ tuirmai apóstolu sira fahe ba ema tuir sira ida-idak nia presiza.+ 36 No iha neʼebá iha ema Levi ida husi rai-Xipre naran José, neʼebé apóstolu sira hanaran Barnabé,+ neʼe katak “Ida neʼebé fó kmaan ba ema seluk”.* 37 Nia iha rai ida, no nia mós faʼan rai neʼe no lori osan hodi fó ba apóstolu sira.+