Segundu Samuel
6 Dala ida tan David halibur tropa hotu neʼebé diʼak liu iha Izraél hamutuk naʼin-30.000. 2 Tuirmai David no ema hotu neʼebé hamutuk ho nia laʼo ba Baal-Judá atu foti fali Maromak loos nia Arka husi neʼebá.+ Iha Arka neʼe nia oin mak baibain povu bolu Jeová nia naran, Maromak neʼebé ukun tropa lalehan nian,+ neʼebé tuur iha kerubín sira-nia leten.*+ 3 Maibé sira tau Maromak loos nia Arka iha karrosa boot neʼebé foun+ atu lori Arka neʼe husi Abinadab nia uma+ neʼebé iha foho-oan leten. Abinadab nia oan-mane sira, Uzá no Ahio mak laʼo iha karrosa foun neʼe nia oin.
4 Entaun sira lori Maromak loos nia Arka husi Abinadab nia uma iha foho-oan leten, no Ahio mak laʼo iha Arka neʼe nia oin. 5 David no umakain Izraél hotu selebra ida-neʼe iha Jeová nia oin hodi uza instrumentu múzika oioin neʼebé halo husi ai-juníperu, arpa, instrumentu seluk neʼebé iha talin,+ tamborín,+ simbala+ no instrumentu sira seluk. 6 Maibé bainhira sira toʼo iha fatin sama trigu nian neʼebé hanaran Nakon,* Uzá lolo liman no kaer metin Maromak loos nia Arka,+ tanba karau sira halo Arka neʼe besik atu monu. 7 Ho ida-neʼe, Jeová sai hirus tebes hasoru Uzá, no Maromak loos oho nia+ tanba nia la hatudu respeitu,+ no nia mate iha neʼebá iha Maromak loos nia Arka sorin. 8 Maibé David sai hirus* tanba Jeová laran-nakali hasoru Uzá. Nuneʼe sira bolu fatin neʼe Peres-Uzá* toʼo ohin loron. 9 Entaun iha loron neʼe David sai taʼuk ba Jeová+ no dehan: “Oinsá mak haʼu bele lori Jeová nia Arka ba haʼu-nia sidade?”+ 10 David lakohi lori Jeová nia Arka ba ninia hela-fatin iha David nia Sidade.+ Maibé David haruka ema atu lori Arka neʼe ba Obed-Edom,+ ema Gat, nia uma.
11 Jeová nia Arka kontinua iha Obed-Edom nia uma ba fulan tolu, no Jeová nafatin fó bensaun ba Obed-Edom, ema Gat, no mós ba ninia umakain tomak.+ 12 Ema dehan ba Liurai David: “Jeová haraik ona bensaun ba Obed-Edom nia umakain no ba buat hotu neʼebé ninian tanba Maromak loos nia Arka neʼe.” Entaun David bá atu lori Maromak loos nia Arka husi Obed-Edom nia uma hodi muda ba David nia Sidade ho haksolok.+ 13 Bainhira ema neʼebé hulan+ Jeová nia Arka laʼo ona hakat neen, David hasaʼe karau-aman ida no animál ida neʼebé bokur nuʼudar sakrifísiu.
14 David dansa iha Jeová nia oin ho ninia forsa tomak. Iha tempu neʼebá, David hatais* efod* neʼebé halo husi hena-liñu.+ 15 David no umakain Izraél tomak lori Jeová nia Arka+ ho lian haklalak haksolok nian+ no ho lian husi dikur.+ 16 Maibé bainhira Jeová nia Arka toʼo iha David nia Sidade, Saul nia oan-feto Mical+ hateke tun liuhusi janela no haree Liurai David haksoit bá-mai no dansa iha Jeová nia oin, no Mical komesa hakribi David iha ninia laran.+ 17 Entaun, sira lori Jeová nia Arka no tau iha ninia fatin iha tenda neʼebé David harii ona ba Arka neʼe.+ Tuirmai David hasaʼe sakrifísiu sunu nian+ no sakrifísiu dame nian+ iha Jeová nia oin.+ 18 Bainhira David remata hasaʼe sakrifísiu sunu nian no sakrifísiu dame nian, nia haraik bensaun ba povu hodi Jeová nia naran, Maromak neʼebé ukun tropa lalehan nian. 19 Depois neʼe, David fahe ai-han tuirmai neʼe ba povu hotu, ba ema Izraél barak, ba mane no feto ida-idak: paun fuan ida hanesan kelu, dose ida husi ai-palmeira fuan no dose ida husi uvas-maran. Tuirmai povu hotu fila fali ba sira ida-idak nia uma.
20 Bainhira David fila atu fó bensaun ba ninia umakain rasik, Saul nia oan-feto Mical+ sai mai hasoru nia. Mical dehan: “Ohin liurai Izraél hamoe duni nia an iha ninia ema-boot nia atan-feto sira-nia oin hodi hatudu nia isin, hanesan ema beik-teen neʼebé hatudu nia isin-tanan!”+ 21 Rona tiha neʼe, David hatete ba Mical: “Haʼu halo selebrasaun neʼe iha Jeová nia oin, Maromak neʼebé hili haʼu duké hili ó-nia aman no ninia umakain tomak. Jeová foti haʼu nuʼudar ulun-naʼin ba ninia povu Izraél.+ Tan neʼe, haʼu sei selebra tempu neʼe iha Jeová nia oin, 22 no haʼu sei haraik an liu fali ida-neʼe no sai kiʼik liután iha haʼu-nia matan rasik. Maibé kona-ba atan-feto sira neʼebé ó temi, haʼu sei hetan glória husi sira.” 23 Entaun Saul nia oan-feto Mical+ la iha oan toʼo loron neʼebé nia mate.