Ageu
1 Iha loron primeiru fulan-neen tinan segundu husi Liurai Dário nia ukun, Jeová fó sai liafuan liuhusi profeta Ageu*+ ba Sealtiel nia oan-mane Zorobabel,+ neʼebé nuʼudar governadór iha rai-Judá, no mós ba Jeozadak nia oan-mane Josué, neʼebé serbí nuʼudar amlulik boot, hodi dehan:
2 “Jeová neʼebé ukun tropa lalehan nian dehan nuneʼe: ‘Povu neʼe hatete: “Tempu seidauk toʼo atu harii fali Jeová nia uma.”’”*+
3 Jeová fó sai tan liafuan liuhusi profeta Ageu,+ hodi dehan: 4 “Imi hela iha imi-nia uma neʼebé furak, maibé haʼu-nia uma sei rahun hela, agora mak tempu atu imi halo nuneʼe ka?+ 5 Agora Jeová neʼebé ukun tropa lalehan nian dehan: ‘Hanoin didiʼak kona-ba* imi-nia hahalok sira. 6 Imi kuda fini barak, maibé koʼa uitoan deʼit.+ Imi han, maibé la bosu. Imi hemu, maibé imi-nia tua-uvas la toʼo. Imi hatais roupa, maibé la sente manas. Serbisu-naʼin halo serbisu makaʼas, maibé nia tau ninia kolen iha pasta neʼebé kuak.’”
7 “Jeová neʼebé ukun tropa lalehan nian dehan nuneʼe: ‘Hanoin didiʼak kona-ba* imi-nia hahalok sira.’
8 “Jeová hatete: ‘Saʼe ba foho no lori ai mai.+ Harii fali haʼu-nia uma+ atu haʼu bele sai kontente kona-ba neʼe no haʼu bele simu glória.’”+
9 “Jeová neʼebé ukun tropa lalehan nian dehan: ‘Imi buka buat barak maibé hetan uitoan deʼit. Bainhira imi lori buat sira-neʼe ba imi-nia uma, haʼu huu lakon tiha.+ Tan razaun saida? Tanba haʼu-nia uma rahun hela, maibé imi ida-idak halai bá-mai hodi tau matan ba imi-nia uma rasik.+ 10 Tan neʼe, lalehan la hatún mahobeen, no rai la fó fuan. 11 Haʼu halo rai sai maran-dekor, no neʼe kona foho sira, trigu, tua-uvas foun, mina, buat neʼebé moris iha rai, ema no animál-hakiak, no mós buat hotu neʼebé imi halo ho imi-nia liman.’”
12 Sealtiel+ nia oan-mane Zorobabel,+ no Jeozadak+ nia oan-mane Josué, neʼebé serbí nuʼudar amlulik boot, no mós povu hotu rona ba Jeová, sira-nia Maromak, nia liafuan no rona ba profeta Ageu nia liafuan, tanba Jeová, sira-nia Maromak, mak haruka nia. No povu komesa hamtaʼuk Jeová.
13 Depois neʼe, Ageu, neʼebé lori Jeová nia mensajen, hatoʼo liafuan tuirmai neʼe ba povu hodi halo tuir knaar neʼebé Jeová fó ba nia. “Jeová dehan: ‘Haʼu hamutuk ho imi.’”+
14 Entaun, Jeová book Sealtiel nia oan-mane Zorobabel nia laran,+ neʼebé serbí nuʼudar governadór iha rai-Judá,+ no book Jeozadak nia oan-mane Josué+ nia laran, neʼebé serbí nuʼudar amlulik boot, no book povu hotu nia laran. Nuneʼe sira mai no komesa halo serbisu atu harii fali uma ba sira-nia Maromak Jeová neʼebé ukun tropa lalehan nian.+ 15 Neʼe akontese iha loron 24 fulan-neen tinan segundu husi Liurai Dário nia ukun.+