Primeiru Korinto

13 Se haʼu koʼalia ema nia língua oioin no anju nia língua, maibé haʼu la iha domin, haʼu sai hanesan sinu nia lian ka simbala nia lian. 2 Se haʼu simu kbiit atu fó sai profesia, se haʼu komprende segredu santu hotu no koñesimentu hotu,+ no se haʼu iha fiar boot toʼo bele muda foho, maibé haʼu la iha domin, haʼu la vale* buat ida.+ 3 Se haʼu fó haʼu-nia rikusoin tomak atu fó-han ba ema seluk,+ no se haʼu fó haʼu-nia moris atu nuneʼe haʼu bele gaba an, maibé haʼu la iha domin,+ haʼu la manán buat ida.

4 Domin+ mak pasiénsia+ no laran-diʼak.+ Domin la laran-moras,+ la gaba an, la foti an.+ 5 Domin la hatudu hahalok la respeitu,+ la buka diʼak ba ninia an rasik,+ la sai hirus lalais.+ Domin la hanoin fali buat aat neʼebé nia simu.*+ 6 Domin la haksolok ho hahalok la loos,+ maibé haksolok ho lia-loos. 7 Domin lori todan hotu,+ fiar buat hotu,+ tau esperansa ba buat hotu,+ no tahan buat hotu.+

8 Domin nunka lakon. Maibé se ita simu kbiit atu fó sai profesia, neʼe sei lakon; se ita simu kbiit atu koʼalia língua oioin,* neʼe sei para; se ita simu koñesimentu, neʼe sei lakon. 9 Tanba ita-nia koñesimentu la kompletu+ no ita fó sai profesia neʼebé la kompletu, 10 maibé kuandu buat neʼebé kompletu toʼo mai, buat neʼebé la kompletu sei lakon. 11 Bainhira haʼu sei labarik, haʼu koʼalia hanesan labarik, hanoin hanesan labarik, buka-hatene buat ruma hanesan labarik. Maibé agora haʼu sai boot ona, haʼu halakon tiha hahalok labarik nian. 12 Tanba agora ita haree la moos liuhusi espellu besi nian, maibé depois neʼe ita sei haree oin ba oin. Agora haʼu hatene buat balu deʼit, maibé depois neʼe haʼu sei hatene ho loloos* hanesan Maromak hatene haʼu ho loloos. 13 Maibé, buat tolu tuirmai neʼe mak sei hela: fiar, esperansa no domin. Maibé ida neʼebé boot liu mak domin.+