Roma
2 Tan neʼe, haʼu-nia maluk, ó labele tesi-lia ba ema seluk.+ Tanba se ó tesi-lia ba ema kona-ba sala ruma, ó mós sei hetan tesi-lia kona-ba neʼe, tanba ó neʼebé tesi-lia ba ema, ó mós halo sala neʼebé sira halo.+ 2 Agora ita hatene katak Maromak tesi-lia ba ema sira neʼebé halo sala sira hanesan neʼe no Maromak tesi-lia tuir lia-loos.
3 Maibé, haʼu-nia maluk, se ó tesi-lia ba ema sira neʼebé moris hanesan neʼe no ó rasik mós halo buat sira-neʼe, ó hanoin katak ó sei halai husi Maromak nia tesi-lia ka? 4 Ó hakribi Maromak nia laran-diʼak,+ toleránsia+ no pasiénsia+ neʼebé boot ka? Ó la hatene katak Maromak ho laran-diʼak koko atu lori ó hodi arrepende ó-nia sala ka?+ 5 Maibé tanba ó ulun-toos no ó lakohi arrepende sala, Maromak rai hela ninia hirus ba ó. Nia sei hatudu sai ninia hirus neʼe iha loron neʼebé nia tesi-lia ba ema, no nia sei tesi-lia iha dalan neʼebé loos.+ 6 No nia sei selu fali ema ida-idak tuir sira-nia hahalok:+ 7 Nia sei fó moris rohan-laek ba sira neʼebé buka glória no hahiʼi no isin neʼebé labele dodok+ hodi halo nafatin serbisu neʼebé diʼak, 8 maibé Maromak sei hatudu ninia laran-nakali no hirus ba sira neʼebé gosta istori malu no la halo tuir lia-loos maibé halo tuir deʼit buat neʼebé la loos.+ 9 Iha tempu neʼebá ema hotu neʼebé halo aat sei hetan terus no susar, ulukliu ema Judeu no mós ema Gregu. 10 Maibé ema hotu neʼebé halo buat diʼak sei hetan glória no hahiʼi no dame, ulukliu ema Judeu+ no mós ema Gregu.+ 11 Tanba Maromak la todan ba sorin.+
12 Tanba ema hotu neʼebé la hatene ukun-fuan no halo sala, sira sei mate maski la hatene ukun-fuan,+ maibé ema hotu neʼebé hatene ukun-fuan no halo sala, sira sei hetan tesi-lia tuir ukun-fuan neʼe.+ 13 Tanba laʼós sira neʼebé rona ukun-fuan mak ema laran-loos tuir Maromak nia haree, maibé nia haree sira neʼebé halo tuir ukun-fuan nuʼudar ema laran-loos.+ 14 Tanba kuandu ema husi nasaun sira neʼebé la hatene ukun-fuan,+ halo tuir buat neʼebé ukun-fuan haruka, ema sira-neʼe hatudu katak iha ona ukun-fuan iha sira-nia laran. 15 Ema sira-neʼe hatudu sai katak ukun-fuan neʼe hakerek ona iha sira-nia laran, no sira-nia konxiénsia fó sasin hamutuk ho sira, no liuhusi* sira-nia hanoin rasik sira hatene katak buat neʼebé sira halo mak loos ka sala. 16 Buat sira-neʼe sei akontese kuandu Maromak, tesi-lia liuhusi Kristu Jesus kona-ba buat neʼebé ema hanoin no halo subasubar deʼit,+ no ida-neʼe tuir liafuan diʼak neʼebé haʼu haklaken.
17 Agora se ó bolu ó-nia an nuʼudar ema Judeu,+ no sadere ba ukun-fuan, no sente orgullu kona-ba ó-nia relasaun ho Maromak, 18 no ó hatene ninia hakarak, hatene buat neʼebé iha folin tebes tanba ema hanorin ó kona-ba Ukun-Fuan,+ 19 no ó fiar katak ó mak hatudu dalan ba ema matan-delek no fó naroman ba sira neʼebé iha nakukun laran, 20 ó korrije sira neʼebé beik, ó mak mestre ba labarik kiʼik sira, no liuhusi Ukun-Fuan ó hetan ona koñesimentu no lia-loos neʼebé báziku kona-ba Maromak, 21 se nuneʼe, ó neʼebé hanorin ema seluk, ó mós hanorin ó-nia an ka lae?+ Ó dehan: “Keta naʼok”,+ maibé ó rasik naʼok ka lae? 22 Ó dehan: “Labele halo sala seksuál ho ema neʼebé laʼós imi-nia kaben”,*+ maibé ó rasik halo sala seksuál ka lae? Ó hakribi estátua* sira, maibé ó rasik naʼok husi templu ka lae? 23 Ó sente orgullu kona-ba ukun-fuan, maibé ó rasik la respeitu Maromak hodi kontra Ukun-Fuan ka lae? 24 Neʼe hanesan hakerek nanis ona: “Ema koʼalia aat Maromak nia naran iha nasaun seluk nia leet tanba imi-nia hahalok.”+
25 Tuir loloos, sirkunsizaun*+ bele lori buat diʼak ba ó só deʼit se ó halo tuir ukun-fuan.+ Maibé se ó kontra ukun-fuan, ó-nia sirkunsizaun la iha folin. 26 Tan neʼe, se ema ida neʼebé la hetan sirkunsizaun+ mak halo tuir Maromak nia matadalan neʼebé hakerek iha Ukun-Fuan, Maromak sei sura nia nuʼudar ema neʼebé hetan ona sirkunsizaun, loos ka lae?+ 27 Kuandu ema husi nasaun seluk neʼebé la hetan sirkunsizaun mak halo tuir buat neʼebé Ukun-Fuan haruka, sira-nia hahalok neʼe sei tesi-lia ba ó neʼebé kontra ukun-fuan maski ó iha ona Ukun-Fuan no hetan ona sirkunsizaun. 28 Tanba sai ema Judeu neʼebé loos, neʼe laʼós deʼit kona-ba buat neʼebé iha liʼur,+ no sirkunsizaun neʼebé loos, neʼe laʼós deʼit halo ba isin.+ 29 Maibé buat neʼebé iha ema nia laran mak halo nia sai ema Judeu neʼebé loos,+ no sirkunsizaun neʼebé loos mak iha ema nia laran+ liuhusi espíritu santu, laʼós liuhusi ukun-fuan.+ Ema neʼe simu hahiʼi husi Maromak, laʼós husi ema.+