Primeiru Samuel
8 Bainhira Samuel katuas ona, nia hili ninia oan-mane sira atu sai juís ba Izraél. 2 Nia oan-mane primeiru naran Joel, no oan-mane segundu naran Abias.+ Ninia oan sira-neʼe mak juís iha Beer-Seba. 3 Maibé ninia oan-mane sira la halo tuir ninia ezemplu. Sira hakarak atu manán buat ruma ho laran-makerek,+ sira simu prezente hodi bobar lia-loos,+ no sira la halo tuir justisa.+
4 Liutiha tempu balu, Izraél nia katuas hotu halibur hamutuk no bá hasoru Samuel iha Ramá. 5 Sira hatete ba nia: “Ita sai katuas ona, maibé Ita-nia oan-mane sira la halo tuir Ita-nia ezemplu. Agora hili liurai ida atu tesi-lia ba ami hanesan nasaun sira seluk.”+ 6 Maibé Samuel la kontente bainhira sira hatete: “Fó liurai ida atu tesi-lia ba ami.” Tuirmai Samuel halo orasaun ba Jeová, 7 no Jeová hatete ba Samuel: “Rona ba liafuan hotu neʼebé povu neʼe koʼalia ba ó, tanba laʼós ó mak sira la simu, maibé haʼu mak ida neʼebé sira la simu nuʼudar sira-nia liurai.+ 8 Sira halo daudaun buat neʼebé sira halo beibeik ona husi loron neʼebé haʼu lori sira sai husi rai-Ejitu toʼo agora. Sira kontinua husik haʼu+ no serbí maromak sira seluk,+ no agora sira mós halo hanesan neʼe ba ó. 9 Agora rona ba sira. Maibé, ó tenke fó avizu ho momoos ba sira, no fó-hatene ba sira katak liurai neʼebé sei ukun sira iha direitu atu husu buat oioin husi sira.”
10 Nuneʼe Samuel fó sai Jeová nia liafuan hotu ba povu neʼebé husu liurai ida. 11 Nia hatete: “Tuirmai neʼe mak buat neʼebé liurai neʼebé ukun imi iha direitu atu husu:+ Nia sei lori imi-nia oan-mane sira+ no halo sira saʼe ninia kuda-karreta sira+ no halo sira sai nuʼudar tropa neʼebé saʼe ninia kuda,+ no imi-nia oan balu sei halai iha ninia kuda-karreta sira-nia oin. 12 Nia sei hili ba ninia an rasik xefe sira ba tropa naʼin-1.000+ no xefe sira ba tropa naʼin-50,+ no imi-nia oan balu sei fila ninia rai,+ koʼa ai-han sira iha ninia toʼos,+ no halo ninia armas funu nian no halo sasán oioin ba ninia kuda-karreta.+ 13 Nia sei hili imi-nia oan-feto sira atu halo mina-morin oioin, atu teʼin no tunu paun.+ 14 Nia sei foti buat diʼak hotu husi imi-nia toʼos, imi-nia toʼos-uvas, no imi-nia toʼos-oliveira,+ no nia sei fó buat sira-neʼe ba ninia atan sira. 15 Nia sei foti porsentu sanulu husi imi-nia toʼos-trigu no toʼos-uvas, no nia sei fó buat sira-neʼe ba ninia ema-boot no atan sira. 16 Nia sei foti imi-nia atan-mane no atan-feto, imi-nia karau neʼebé diʼak, imi-nia kuda-burru, no nia sei uza sira atu halo ninia serbisu.+ 17 Nia sei foti porsentu sanulu husi imi-nia bibi sira,+ no imi sei sai ninia atan. 18 Loron sei toʼo mai bainhira imi sei halerik tanba liurai neʼebé imi hili ona ba imi-nia an rasik,+ maibé Jeová sei la rona imi iha loron neʼebá.”
19 Maibé, povu neʼe lakohi rona ba buat neʼebé Samuel hatete. Sira dehan: “Lae, ami deside ona atu liurai ida mak ukun ami. 20 Ho ida-neʼe mak ami sei sai hanesan nasaun sira seluk, no ami-nia liurai sei tesi-lia ba ami, dirije ami no halo funu hodi defende ami.” 21 Bainhira Samuel rona tiha povu nia liafuan hotu neʼe, nia fó sai fali liafuan sira-neʼe ba Jeová. 22 Jeová dehan ba Samuel: “Rona ba sira, no hili liurai ida atu ukun sira.”+ Tuirmai Samuel hatete ba ema Izraél: “Imi ida-idak tenke fila fali ba imi-nia sidade.”