Primeiru Samuel

15 Tuirmai Samuel dehan ba Saul: “Uluk Jeová haruka haʼu atu hili* ó nuʼudar liurai ba ninia povu Izraél.+ Agora, rona bá buat neʼebé Jeová hatete.+ 2 Jeová neʼebé ukun tropa lalehan nian dehan nuneʼe: ‘Haʼu sei fó kastigu ba ema Amalec tanba buat neʼebé sira halo ba ema Izraél bainhira ema Izraél sai husi rai-Ejitu.+ 3 Agora bá, oho ema Amalec+ no halakon sira+ hamutuk ho buat hotu neʼebé sira iha. Imi labele husik sira moris.* Imi tenke oho sira hotu,+ katak mane, feto, labarik no bebé, karau, bibi, kuda-kamelu no mós kuda-burru.’”+ 4 Saul bolu tropa sira no sura sira iha Telaim: Iha tropa naʼin-200.000 neʼebé laʼo ain no mós mane Judá hamutuk naʼin-10.000.+

5 Saul laʼo toʼo sidade Amalec no haruka tropa sira subar besik mota* hodi hein atu ataka. 6 Tuirmai Saul hatete ba ema Keneu:+ “Laʼo bá, no sai husi ema Amalec nia leet, atu nuneʼe haʼu la halakon imi hamutuk ho sira.+ Tanba imi hatudu ona domin neʼebé laran-metin ba povu Izraél tomak+ iha tempu neʼebé sira sai husi rai-Ejitu.” Entaun ema Keneu sai husi ema Amalec nia leet. 7 Depois neʼe, Saul oho ema Amalec+ husi Havila+ toʼo Sur,+ neʼebé besik rai-Ejitu. 8 Nia kaer moris deʼit Agag,+ liurai Amalec, maibé nia oho ema seluk hotu ho surik.+ 9 Maibé, Saul no ninia tropa sira la oho* Agag no la oho bibi no karau-lubun sira neʼebé diʼak, animál neʼebé bokur, bibi-malae aman no buat hotu neʼebé diʼak.+ Sira lakohi halakon buat sira-neʼe. Maibé sira halakon hotu buat sira seluk neʼebé folin-laek no la diʼak.

10 Tuirmai Jeová fó sai ninia liafuan ba Samuel: 11 “Haʼu sente triste hili Saul sai liurai, tanba nia fila kotuk hodi la halo tuir haʼu no la kumpre ona haʼu-nia liafuan.”+ Samuel sai laran-taridu loos, no nia kontinua harohan ba Jeová kalan tomak.+ 12 Bainhira Samuel hadeer sedu iha dadeer atu bá hasoru Saul, ema fó-hatene ba Samuel dehan: “Saul bá ona Karmel,+ no nia harii monumentu ida ba nia an iha neʼebá.+ Depois neʼe, nia fila hodi tun ba Gilgal.” 13 Ikusmai Samuel toʼo iha neʼebá hodi hasoru Saul, no Saul dehan ba nia: “Haʼu hein katak Jeová sei haraik bensaun ba Ita. Haʼu halo tuir ona Jeová nia liafuan.” 14 Maibé Samuel dehan: “Se nuneʼe, tanbasá mak haʼu rona hela bibi no karau nia lian iha neʼe?”+ 15 Saul hatán: “Ami lori animál sira-neʼe husi ema Amalec. Tropa sira la oho* bibi no karau neʼebé diʼak atu bele hasaʼe neʼe nuʼudar sakrifísiu ba Jeová, ó-nia Maromak. Maibé buat sira seluk ami halakon hotu.” 16 Rona tiha neʼe, Samuel hatete ba Saul: “Toʼo ona! Husik haʼu fó sai ba ó buat neʼebé Jeová hatete ona ba haʼu horikalan.”+ Entaun Saul dehan: “Koʼalia bá!”

17 Samuel hatutan tan: “Uluk bainhira ó sai nuʼudar ulun-naʼin ba Izraél nia suku sira no bainhira Jeová hili* ó nuʼudar liurai ba Izraél,+ ó haree ó-nia an nuʼudar folin-laek,+ loos ka lae? 18 Tuirmai Jeová haruka ó halaʼo knaar ida, hodi dehan: ‘Bá, no ó tenke halakon ema Amalec neʼebé halo ona sala barak.+ Halo funu hasoru sira toʼo ó halakon tiha sira.’+ 19 Se nuneʼe, tanbasá mak ó la halo tuir Jeová nia liafuan? Duké halo tuir, ó ansi atu hadau sasán sira ho kaan-teen+ no halo buat neʼebé aat tuir Jeová nia haree!”

20 Saul hatán ba Samuel: “Maibé haʼu halo tuir ona Jeová nia liafuan! Haʼu bá hodi halaʼo knaar neʼebé Jeová haruka haʼu atu halo, no haʼu lori fali Agag, liurai Amalec, mai no haʼu halakon ema Amalec sira.+ 21 Maibé tropa sira foti bibi-malae no karau sira husi buat neʼebé ami hadau ona, katak parte diʼak liu husi buat neʼebé tenke halakon tiha, atu bele hasaʼe neʼe nuʼudar sakrifísiu ba Jeová, ó-nia Maromak, iha Gilgal.”+

22 Samuel dehan: “Saida mak Jeová hakarak? Nia hakarak liu atu ema halo tuir nia, ka hasaʼe sakrifísiu sunu nian no sakrifísiu sira seluk?+ Halo tuir Jeová mak diʼak liu fali hasaʼe sakrifísiu ida,+ no rona didiʼak mak diʼak liu fali fó bibi-malae aman nia bokur,+ 23 tanba hahalok kontra Maromak+ mak aat hanesan siʼik futuru,+ no hahalok ulun-toos no foti an* mak aat hanesan uza forsa masonik nian no adora estátua.* Jeová la simu ona ó nuʼudar liurai+ tanba ó lakohi rona ba ninia liafuan.”+

24 Tuirmai Saul hatete ba Samuel: “Haʼu halo ona sala, haʼu la halo tuir Jeová nia orden no mós ó-nia liafuan, tanba haʼu taʼuk ema no rona ba buat neʼebé sira dehan. 25 Agora, favór ida, perdua haʼu-nia sala, no fila fali hamutuk ho haʼu atu nuneʼe haʼu bele hakruʼuk ba Jeová.”+ 26 Maibé Samuel hatete ba Saul: “Haʼu sei la fila ho ó, tanba ó la rona ona ba Jeová nia liafuan, no Jeová la simu tan ó atu kontinua sai nuʼudar liurai ba ema Izraél.”+ 27 Bainhira Samuel fila oin atu bá, Saul kaer Samuel nia roupa ninin, katak roupa neʼebé la iha liman, maibé roupa neʼe lees sai tiha. 28 Ho ida-neʼe, Samuel hatete ba nia: “Ohin Jeová lees sai tiha ona knaar nuʼudar liurai iha Izraél husi ó, no nia sei fó ida-neʼe ba ó-nia maluk neʼebé diʼak liu fali ó.+ 29 Liután neʼe, Maromak neʼebé Kmanek Liu iha Izraél+ sei la koʼalia bosok+ ka troka ninia hanoin,* tanba nia la hanesan ema neʼebé presiza troka ninia hanoin.”*+

30 Ho ida-neʼe, nia dehan: “Haʼu halo ona sala. Maibé favór ida, hatudu respeitu ba haʼu iha Izraél nia katuas sira-nia oin no iha povu nia oin. Fila ho haʼu, no haʼu sei hakruʼuk ba Jeová, ó-nia Maromak.”+ 31 Entaun Samuel laʼo tuir fali Saul iha ninia kotuk, no Saul hakruʼuk ba Jeová. 32 No Samuel hatete: “Lori Agag, liurai Amalec, mai besik haʼu.” Tuirmai Agag laʼo ba nia ho taʼuk,* tanba uluk Agag hanoin: ‘Karik sira sei la oho haʼu.’ 33 Maibé Samuel hatete: “Hanesan ó-nia surik halo feto sira lakon sira-nia oan, nuneʼe mós ó-nia inan sei lakon boot liu iha feto hotu nia leet.” Depois neʼe, Samuel taa Agag sai pedasuk ba pedasuk iha Jeová nia oin iha Gilgal.+

34 Samuel fila ba Ramá, no Saul fila ba ninia uma rasik iha Gibea. 35 Samuel nunka haree tan Saul toʼo loron neʼebé nia mate, tanba Samuel sente triste tebes kona-ba Saul.+ No Jeová sente triste tanba hili Saul sai liurai iha Izraél.+