Primeiru Samuel

22 Nuneʼe David sai husi neʼebá,+ no halai ba fatuk-kuak Adulam.+ Bainhira ninia maun sira no ninia aman nia umakain tomak rona kona-ba neʼe, sira bá hasoru nia. 2 Kona-ba ema hotu neʼebé iha susar laran, ema neʼebé atan ba debe, no ema neʼebé moris la kontente,* sira halibur hamutuk ho David, no nia sai sira-nia xefe. Iha mane maizumenus naʼin-400 hamutuk ho nia.

3 Depois neʼe, David sai husi neʼebá hodi laʼo ba Mizpe iha Moab no nia dehan ba liurai Moab:+ “Favór ida, husik haʼu-nia inan-aman hela ho imi toʼo haʼu hatene saida mak Maromak halo ba haʼu.” 4 Entaun nia husik ninia inan-aman ho liurai Moab, no sira hela ho liurai Moab durante tempu hotu neʼebé David subar iha fatin seguru.+

5 Liutiha tempu balu, profeta Gad+ dehan ba David: “Keta subar deʼit iha fatin seguru. Sai husi neʼe hodi laʼo ba rai-Judá.”+ Entaun David husik fatin neʼe no laʼo ba ai-laran Heret.

6 Saul rona katak ema hetan ona David no ema sira neʼebé hamutuk ho nia. Iha tempu neʼebá Saul tuur hela iha ai-tamargeira ida nia okos iha fatin neʼebé aas iha Gibea.+ Nia kaer hela diman iha nia liman, no ninia atan hotu hamriik haleʼu nia. 7 Depois neʼe, Saul dehan ba ninia atan sira neʼebé hamriik haleʼu nia: “Favór ida, rona mai haʼu, imi ema Benjamim sira. Jessé nia oan-mane+ mós sei fó toʼos no toʼos-uvas ba imi hotu ka? Nia sei hili imi hotu atu sai nuʼudar xefe ba tropa naʼin-1.000 no xefe ba tropa naʼin-100 ka?+ 8 Imi hotu halo ona planu aat ba haʼu! Imi ida mós la fó sai mai haʼu bainhira haʼu-nia oan-mane rasik halo aliansa ho Jessé nia oan-mane!+ Imi ida mós la hanoin haʼu no la fó sai mai haʼu katak haʼu-nia oan-mane rasik book haʼu-nia atan atu kontra haʼu hodi subar no ataka haʼu, hanesan agora akontese daudaun.”

9 Tuirmai Doeg,+ ema Edom, neʼebé nuʼudar xefe ba Saul nia atan sira iha neʼebá, hatán:+ “Haʼu haree Jessé nia oan-mane bá toʼo Nob hodi hasoru Ahitub+ nia oan-mane Ahimelec. 10 Ahimelec husu ba Jeová kona-ba David nia diʼak no fó ai-han ba David. Ahimelec mós fó surik ba David, surik neʼe Golias ema Filístia nian.”+ 11 Ho ida-neʼe, liurai haruka kedas ema atu bolu amlulik Ahimelec, Ahitub nia oan-mane, no mós amlulik sira hotu husi ninia aman nia umakain, neʼebé iha Nob. Entaun sira hotu bá hasoru liurai.

12 Saul hatete: “Favór ida, rona mai haʼu, ó Ahitub nia oan-mane!” Ahimelec hatán: “Sin, haʼu-nia naʼi.” 13 Saul dehan ba nia: “Tanbasá mak ó no Jessé nia oan-mane halo planu aat ba haʼu? Ó fó paun, surik no husu Maromak atu ajuda nia. Nia kontra haʼu no subar hodi ataka haʼu, hanesan agora akontese daudaun.” 14 Ahimelec hatán ba liurai: “Husi Ita-nia atan sira hotu, sé mak hanesan David+ neʼebé Ita bele tau fiar?* Nia mak liurai nia mane-foun,+ xefe ba Ita-nia guarda sira, no mós ema-boot iha Ita-nia umakain.+ 15 Neʼe laʼós dala primeiru neʼebé haʼu husu Maromak ba David nia diʼak,+ loos ka lae? Haʼu sei nunka halo planu aat ba Ita! Entaun liurai labele duun Ita-nia atan neʼe ka haʼu-nia aman nia umakain tomak katak ami halo sala ruma, tanba Ita-nia atan neʼe la hatene buat ida kona-ba situasaun sira-neʼe.”+

16 Maibé liurai hatete: “Ó sei mate duni+ Ahimelec. Ó hamutuk ho ó-nia aman nia umakain tomak+ sei mate.” 17 Tuirmai, liurai hatete ba guarda* sira neʼebé hamriik haleʼu nia: “Oho tiha Jeová nia amlulik sira, tanba sira apoia David! Sira hatene katak nia halai husi haʼu, no sira la fó-hatene mai haʼu!” Maibé liurai nia atan sira lakohi foti liman atu oho Jeová nia amlulik sira. 18 Entaun liurai dehan ba Doeg:+ “Ó oho amlulik sira bá!” Nuneʼe Doeg, ema Edom,+ bá kedas no nia rasik oho amlulik sira. Iha loron neʼebá nia oho mane naʼin-85 neʼebé hatais efod* neʼebé halo husi kabas liñu.+ 19 Nia mós oho ema iha Nob,+ sidade amlulik nian. Nia oho mane, feto, labarik no mós bebé, no oho karau, kuda-burru no bibi, nia oho sira hotu ho surik.

20 Maibé, Ahimelec nia oan-mane ida, Ahitub nia bei-oan, naran Abiatar,+ konsege halai hodi bá tuir David. 21 Abiatar hatete ba David: “Saul oho ona Jeová nia amlulik sira.” 22 Ho ida-neʼe, David hatete ba Abiatar: “Haʼu hatene ona iha loron neʼebá,+ bainhira Doeg, ema Edom, iha neʼebá, katak nia sei fó-hatene duni neʼe ba Saul. Haʼu rasik mak lori responsabilidade ba ema* hotu neʼebé mate husi ó-nia aman nia umakain. 23 Hela ho haʼu. Keta taʼuk, tanba sira neʼebé buka ó-nia moris, sira mós buka haʼu-nia moris. Haʼu sei proteje ó.”+