Primeiru Krónikas
10 Iha tempu neʼebá ema Filístia halo funu hasoru ema Izraél. Ema Izraél sira halai husi ema Filístia nia oin, no ema Izraél barak mate iha Foho Gilboa.+ 2 Ema Filístia duni tuir no besik atu toman Saul ho ninia oan-mane sira. Ikusmai ema Filístia oho Saul nia oan-mane sira, Jonatan, Abinadab no Malkisua.+ 3 Funu sai boot liután hasoru Saul, no tropa Filístia sira neʼebé hana rama hetan nia, no sira hana nia toʼo nia kanek.+ 4 Tuirmai Saul dehan ba ninia atan neʼebé lori ninia armas: “Losu ó-nia surik no sona borus haʼu, atu nuneʼe ema sira neʼebé la hetan sirkunsizaun* labele mai no halo aat ba haʼu.”+ Maibé ninia atan neʼe lakohi, tanba nia taʼuk tebes. Entaun Saul losu surik no hamonu nia an ba surik neʼe nia leten.+ 5 Bainhira atan neʼe haree katak Saul mate ona, nia mós hamonu nia an ba ninia surik no mate. 6 Ho ida-neʼe, Saul no ninia oan-mane naʼin-tolu mate, no mós ema hotu iha ninia umakain neʼebé hamutuk ho nia mate.+ 7 Bainhira povu Izraél hotu iha rai-tetuk haree tropa hotu halai ona no Saul ho ninia oan-mane sira mate ona, sira komesa husik hela sira-nia sidade no halai. Depois neʼe, ema Filístia mai hela fali iha sidade sira-neʼe.
8 Loron tuirmai, bainhira ema Filístia mai atu foti ema mate sira-nia sasán, sira haree Saul no ninia oan-mane sira mate ona iha Foho Gilboa.+ 9 Nuneʼe sira tesi Saul nia ulun no hasai ninia roupa funu nian* no sira habelar lia-menon ba sira-nia estátua*+ no povu sira iha ema Filístia nia rai tomak. 10 Tuirmai sira tau Saul nia roupa funu nian iha sira-nia maromak nia templu no tara ninia ulun iha Dagon nia templu.+
11 Bainhira ema hotu neʼebé hela iha Jabes+ iha Gilead rona kona-ba buat hotu neʼebé ema Filístia halo ona ba Saul,+ 12 funu-naʼin hotu hamriik no bá foti Saul nia mate-isin no mós ninia oan-mane sira-nia mate-isin. Sira lori ba Jabes no hakoi mate-isin sira-neʼe iha ai-hun boot ida nia okos iha Jabes,+ no sira halo jejún ba loron hitu.
13 Ho ida-neʼe, Saul mate tanba nia la hatudu laran-metin ba Jeová no la halo tuir Jeová nia liafuan,+ no mós tanba nia husu matadalan husi ema neʼebé koko atu koʼalia ho ema mate+ 14 duké husu matadalan husi Jeová. Tan neʼe, Nia oho Saul no entrega fali pozisaun nuʼudar liurai ba Jessé nia oan-mane David.+