Primeiru Samuel
11 Tuirmai Nahas, ema Ammon,+ saʼe ba Jabes+ iha Gilead atu halo funu hasoru sira. Entaun mane Jabes hotu hatete ba Nahas: “Halo aliansa ida ho ami, no ami sei serbí Ita.” 2 Nahas, ema Ammon, hatete ba sira: “Haʼu sei halo aliansa ho imi se imi halo buat tuirmai neʼe: Imi hotu tenke losu sai tiha imi-nia matan sorin loos. Haʼu sei halo ida-neʼe atu hamoe ema Izraél hotu.” 3 Ema Jabes nia katuas sira hatán ba nia: “Fó ami loron hitu tan atu nuneʼe ami bele haruka lia-menon ba rai-Izraél tomak. Tuirmai se la iha ema ida atu salva ami, ami sei rende an ba Ita.” 4 Liutiha tempu balu, ema neʼebé lori lia-menon toʼo iha Gibea,+ sidade neʼebé Saul hela,* no sira fó sai liafuan sira-neʼe iha povu nia oin, no povu hotu tanis ho lian makaʼas.
5 Maibé Saul foin fila husi rai-luan no laʼo iha karau-lubun nia kotuk, no Saul husu: “Saida mak akontese ba povu neʼe? Tanbasá mak sira tanis?” Entaun sira konta ema Jabes nia liafuan ba Saul. 6 Bainhira Saul rona liafuan sira-neʼe, Maromak nia espíritu fó kbiit ba nia,+ no ninia hirus lakan makaʼas. 7 Entaun nia foti karau-aman rua no koʼa neʼe ba pedasuk. Nia haruka neʼe ba rai-Izraél tomak liuhusi ema sira neʼebé lori lia-menon, hodi dehan: “Ema naran deʼit neʼebé la laʼo tuir Saul no Samuel, ninia karau sira sei sai hanesan neʼe!” Jeová book povu neʼe atu sai taʼuk, nuneʼe sira sai mai ho hanoin* ida deʼit. 8 Tuirmai nia sura sira iha Bezek. Iha neʼebá ema Izraél hamutuk naʼin-300.000 no ema Judá hamutuk naʼin-30.000. 9 Depois neʼe, sira hatete ba ema neʼebé lori lia-menon mai, hodi dehan: “Imi tenke hatete ba ema Jabes iha Gilead: ‘Aban bainhira loron manas ona, imi sei hetan salvasaun.’” Ho ida-neʼe, ema neʼebé lori lia-menon bá fó-hatene ba ema Jabes sira, no sira sente kontente tebes. 10 Entaun ema Jabes hatete ba ema Ammon: “Aban ami sei rende an ba imi, no imi bele halo ba ami buat naran deʼit neʼebé imi hakarak.”+
11 Iha loron tuirmai, Saul fahe ninia ema ba grupu tolu, no sira tama ba tropa Ammon nia hela-fatin durante madrugada* no oho ema Ammon+ toʼo loron manas. Sira neʼebé moris hela halai namkari mesamesak. 12 Tuirmai povu neʼe dehan ba Samuel: “Sé mak uluk hatete: ‘Saul mak sei ukun ita nuʼudar liurai ka?’+ Entrega ema sira-neʼe mai, no ami sei oho sira.” 13 Maibé Saul dehan: “Labele oho ema ida iha loron neʼe,+ tanba ohin Jeová mak salva ona Izraél.”
14 Depois neʼe, Samuel hatete ba povu: “Mai ita bá Gilgal+ atu fó sai fali katak Saul mak liurai.”+ 15 Entaun povu hotu bá Gilgal, no iha neʼebá mak sira foti Saul atu sai liurai iha Jeová nia oin. Tuirmai sira hasaʼe sakrifísiu dame nian iha neʼebá iha Jeová nia oin.+ Saul no povu Izraél hotu selebra ho kontente tebes.+