Segundu Samuel

4 Bainhira Saul nia oan-mane Is-Boset*+ rona katak Abner mate ona iha Hebron,+ nia lakon ninia aten-brani* no ema Izraél hotu sai taʼuk. 2 Iha mane naʼin-rua neʼebé dirije Saul nia oan-mane nia grupu naʼok-teen neʼebé sempre ataka inimigu hodi hadau sasán. Mane sira-neʼe nia naran mak Baaná no Recab. Sira-nia aman mak Rimon ema Beerot husi suku Benjamim. Uluk ema sura Beerot+ nuʼudar parte husi rai-Benjamim. 3 Ema Beerot halai ba Gitaim,+ no sira hela nuʼudar ema estranjeiru iha neʼebá toʼo ohin loron.

4 Saul nia oan-mane Jonatan+ iha oan-mane ida neʼebé ain-kudeʼik.+ Nia tinan lima deʼit bainhira ema lori liafuan husi Jezreel katak Saul no Jonatan mate ona,+ no atan-feto neʼebé hein nia koʼus nia hodi halai, maibé tanba feto neʼe halai ho taʼuk, labarik neʼe monu no sai ain-kudeʼik. Labarik neʼe nia naran mak Mefiboset.+

5 Rimon ema Beerot nia oan-mane sira, Recab no Baaná, bá Is-Boset nia uma iha oras neʼebé rai-manas loos, no nia toba hela iha meiudia. 6 Sira tama ba uma hodi finje katak sira foti trigu, no sira sona Is-Boset nia kabun, tuirmai Recab no Baaná+ halai tiha. 7 Bainhira sira tama ba uma neʼe, Is-Boset toba hela iha ninia kama iha kuartu laran, no sira sona nia no oho nia, depois neʼe, sira tesi ninia ulun. Tuirmai sira lori ninia ulun no laʼo kalan tomak iha dalan ba área Araba. 8 Bainhira sira toʼo tiha Hebron, sira lori Is-Boset+ nia ulun ba Liurai David no hatete: “Neʼe mak Saul nia oan-mane Is-Boset nia ulun, Ita-Boot nia inimigu.+ Uluk Saul buka atu oho Ita.+ Ohin Jeová apoia haʼu-nia naʼi liurai hodi selu fali ba Saul no ninia jerasaun sira.”

9 Maibé David dehan ba Rimon ema Beerot nia oan-mane naʼin-rua, Recab no Baaná: “Haʼu jura hodi Jeová neʼebé moris, neʼebé salva haʼu* husi susar hotu,+ 10 uluk ema ida lori lia-menon mai haʼu, dehan: ‘Saul mate ona’,+ no nia hanoin katak nia hatoʼo liafuan diʼak, maibé duké fó kolen ba nia, haʼu kaer nia no oho nia+ iha Ziklag. 11 Sá tan se ema aat sira oho ema laran-loos ida iha ninia uma rasik iha ninia kama leten! Haʼu tenke husu imi atu hatán ba ninia raan+ no halakon imi husi rai.” 12 Tuirmai David haruka mane joven sira atu oho ema sira-neʼe.+ Sira tesi ema sira-neʼe nia liman no ain no tara sira+ besik kolan iha Hebron. Maibé sira foti Is-Boset nia ulun no hakoi iha Abner nia rate iha Hebron.