Apóstolu sira-nia atividade
25 Entaun, Festo+ toʼo iha provínsia neʼe no hahú atu ukun. Loron tolu liutiha, nia laʼo husi Sezareia hodi saʼe ba Jeruzalein. 2 Ulun-naʼin amlulik sira no ema-boot Judeu nian fó sai ba nia informasaun neʼebé kontra Paulo.+ Entaun, sira hahú husu Festo 3 atu rona sira no haruka Paulo mai Jeruzalein, tanba sira halo planu atu ema hein nia iha dalan hodi oho nia.+ 4 Maibé, Festo dehan katak Paulo tenke hela iha komarka laran iha Sezareia no mós katak lakleur tan, nia rasik sei fila fali bá neʼebá. 5 Nia dehan: “Tan neʼe, imi-nia ulun-naʼin sira neʼebé iha imi-nia leet tenke mai hamutuk ho haʼu, atu nuneʼe se mane neʼe halo sala ruma, sira bele duun nia.”+
6 Entaun, bainhira Festo hela hamutuk ho sira ba loron ualu ka sanulu, nia tun ba Sezareia, no iha loron tuirmai nia tuur iha kadeira tesi-lia nian no haruka ema atu lori Paulo mai. 7 Kuandu Paulo toʼo mai ona, ema Judeu sira neʼebé tun husi Jeruzalein hamriik haleʼu nia, no sira foti kazu hasoru nia no duun nia ho sala barak neʼebé todan maski sira labele hatudu prova ida atu apoia sira-nia liafuan.+
8 Maibé Paulo defende nia an, hodi dehan: “Haʼu la halo sala ida hasoru Ukun-Fuan Judeu nian ka hasoru templu ka hasoru César.”*+ 9 Tanba Festo hakarak atu ema Judeu sira gosta nia,+ nia hatán ba Paulo: “Ó hakarak atu saʼe ba Jeruzalein ka lae? Ó sei hetan tesi-lia iha neʼebá kona-ba buat sira-neʼe iha haʼu-nia oin.” 10 Maibé Paulo dehan: “Haʼu hamriik daudaun iha César nia kadeira tesi-lia nia oin, iha neʼe mak haʼu tenke hetan tesi-lia. Haʼu la halo sala ida hasoru ema Judeu, no Ita-Boot rasik mós hatene kona-ba neʼe. 11 Se haʼu halo duni sala no halo ona buat aat ruma neʼebé merese kastigu-mate,+ haʼu prontu atu mate; maibé se la iha buat ida atu apoia kazu neʼebé mane sira-neʼe duun hasoru haʼu, entaun ema ida la iha direitu atu entrega haʼu ba sira tan deʼit hakarak atu halo sira kontente. Haʼu husu atu lori kazu neʼe ba César!”+ 12 Bainhira Festo koʼalia tiha ho ema matenek sira, Festo hatán: “Tanba ó husu atu lori kazu neʼe ba César, neʼe duni ó sei bá César.”
13 Loron balu liutiha, liurai Agripa no Berenice toʼo iha Sezareia atu vizita Festo hodi fó parabéns. 14 Tanba sira hela iha neʼebá loron balu, entaun Festo konta ba liurai kona-ba Paulo, hodi dehan:
“Iha ema dadur ida neʼebé Félix husik hela, 15 no kuandu haʼu iha Jeruzalein, ulun-naʼin amlulik sira no ema Judeu nia katuas sira fó sai ba haʼu informasaun kona-ba nia,+ no sira husu haʼu atu tesi-lia kontra nia. 16 Maibé haʼu dehan ba sira katak laʼós ema Roma nia toman atu entrega ema ruma ba sira neʼebé duun nia tan deʼit halo sira kontente. Tanba ulukliu nia tenke hasoru ho sira oin ba oin atu nia iha oportunidade hodi defende nia an.+ 17 Entaun, kuandu sira toʼo iha neʼe, haʼu la demora tan, maibé iha loron tuirmai haʼu tuur iha kadeira tesi-lia nian no haruka ema atu lori mane neʼe mai. 18 Ema sira neʼebé duun nia hamriik hodi koʼalia, maibé sira la fó sai kona-ba buat aat ruma neʼebé haʼu hanoin nia halo ona.+ 19 Tuir loloos, sira haksesuk malu deʼit ho nia kona-ba sira-nia adorasaun ba maromak ida*+ no kona-ba mane ida naran Jesus neʼebé mate ona, maibé Paulo nafatin dehan katak nia moris ona.+ 20 Tanba haʼu ladún hatene oinsá atu rezolve sira-nia problema neʼe, haʼu husu nia se nia hakarak atu bá Jeruzalein no hetan tesi-lia kona-ba buat sira-neʼe iha neʼebá.+ 21 Maibé kuandu Paulo husu atu hela nafatin iha komarka hodi hein desizaun husi Liurai Boot,*+ haʼu fó mandamentu atu husik nia iha komarka laran toʼo haʼu tenke haruka nia ba César.”
22 Tuirmai Agripa dehan ba Festo: “Haʼu rasik mós hakarak atu rona ba mane neʼe.”+ Festo hatán: “Aban Ita sei rona ba nia.” 23 Entaun, loron tuirmai, Agripa no Berenice mai ho glória boot no tama iha tribunál hamutuk ho komandante sira no mós ema-boot sira husi sidade neʼe, no tuirmai Festo haruka atu lori Paulo mai. 24 Festo dehan: “Liurai Agripa no mós ema hotu neʼebé ohin hamutuk ho ami, imi haree bá mane neʼebé ema Judeu hotu hakilar hodi husu haʼu iha Jeruzalein no mós iha neʼe atu oho nia.+ 25 Maibé haʼu haree katak nia la halo sala ida neʼebé merese atu mate.+ Tan neʼe, kuandu mane neʼe rasik husu atu lori kazu neʼe ba Liurai Boot,* haʼu deside atu haruka nia bá. 26 Maibé haʼu la iha buat ida atu hakerek ba haʼu-nia Naʼi kona-ba mane neʼe. Tan neʼe, haʼu lori nia ba imi-nia oin, no liuliu ba Ita-Boot, Liurai Agripa, atu nuneʼe, kuandu buka-hatene didiʼak tiha kona-ba kazu neʼe, haʼu bele hetan buat ruma atu hakerek. 27 Tanba tuir haʼu-nia hanoin, kuandu haruka ema dadur ida bá, presiza mós atu hakerek kona-ba kazu neʼebé ema duun hasoru nia.”