Primeiru Korinto
2 Entaun maun-alin sira, uluk kuandu haʼu vizita imi, haʼu fó sai Maromak nia segredu santu+ ba imi hodi la uza liafuan aas+ ka hatudu matenek. 2 Tanba bainhira haʼu iha imi-nia leet, haʼu deside atu la koʼalia kona-ba buat seluk, maibé koʼalia deʼit kona-ba Jesus Kristu no ninia mate iha ai-riin.+ 3 Kuandu haʼu vizita imi, haʼu sente taʼuk, fraku, no laran-nakdedar tebes. 4 Haʼu la koʼalia no haklaken ho liafuan matenek oioin atu dada imi maibé ho Maromak nia espíritu no kbiit,+ 5 atu nuneʼe imi bele fiar ba Maromak nia kbiit, laʼós ba ema nia matenek.
6 Agora ita koʼalia kona-ba matenek ba sira neʼebé maduru,+ maibé laʼós matenek husi mundu* neʼe ka husi ukun-naʼin sira mundu neʼe nian neʼebé sei lakon.+ 7 Maibé ita koʼalia kona-ba segredu santu ida,+ katak Maromak nia matenek neʼebé subar hela. Maromak deside nanis ona antes mundu* aat neʼe iha atu ita hetan glória. 8 Ukun-naʼin sira iha mundu* aat neʼe la hatene matenek neʼe,+ tanba se sira hatene, karik sira la fó kastigu-mate* ba Naʼi neʼebé kmanek boot. 9 Maibé hanesan hakerek nanis ona: “Matan seidauk haree no tilun seidauk rona, no nunka mosu iha ema ida nia hanoin kona-ba buat neʼebé Maromak prepara ona ba sira neʼebé hadomi nia.”+ 10 Tanba Maromak hatudu sai ona buat sira-neʼe ba ita+ liuhusi ninia espíritu,+ espíritu neʼe buka didiʼak buat hotu, inklui mós buat kleʼan husi Maromak.+
11 La iha ema ida neʼebé hatene ema seluk nia hanoin, só ema neʼe rasik* mak hatene buat neʼebé iha ninia laran. Nuneʼe mós la iha ema ida mak hatene buat neʼebé husi Maromak, só Maromak nia espíritu mak hatudu sai buat sira-neʼe. 12 Agora ita simu ona espíritu husi Maromak,+ laʼós espíritu mundu neʼe nian, atu nuneʼe ita bele hatene buat sira neʼebé Maromak haraik ona mai ita ho laran-diʼak. 13 Ita mós koʼalia buat sira-neʼe, laʼós ho liafuan husi ema nia matenek,+ maibé ho liafuan neʼebé ita aprende husi Maromak nia espíritu.+ Ita esplika buat espirituál nian ho liafuan neʼebé ita simu husi ninia espíritu.
14 Maibé ema neʼebé moris tuir deʼit hakarak isin nian lakohi simu* buat neʼebé mai husi Maromak nia espíritu, tanba nia haree buat sira-neʼe hanesan buat neʼebé beik. Nia la hatene buat neʼebé Maromak nian, tanba nia tenke buka-hatene buat sira-neʼe ho ajuda husi Maromak nia espíritu. 15 Maibé, ema neʼebé moris tuir Maromak nia espíritu buka-hatene didiʼak buat hotu,+ no ema ida la iha kbiit atu bele tesi-lia ba nia. 16 Tanba “sé mak hatene ona Jeová* nia hanoin atu bele hanorin nia?”+ Maibé ita iha Kristu nia hanoin.+