Primeiru Korinto

8 Kona-ba ai-han neʼebé hasaʼe ona ba estátua:*+ Ita hatene katak ita hotu iha koñesimentu kona-ba neʼe.+ Koñesimentu bele halo ema foti an, maibé domin hametin ema.+ 2 Se ema ida hanoin katak nia hatene buat ruma, tuir loloos nia seidauk hatene buat hotu hanesan nia tenke hatene kona-ba neʼe. 3 Maibé se ema ida hadomi Maromak, Maromak hatene ona nia.

4 Kona-ba han ai-han neʼebé hasaʼe ona ba estátua, ita hatene katak estátua la iha folin ida+ iha mundu neʼe, no la iha Maromak seluk maibé iha Maromak ida deʼit.+ 5 Ema dehan katak iha maromak barak iha lalehan no iha rai.+ Maski ba ema, iha “maromak” barak no “naʼi” barak, 6 maibé ba ita, iha Maromak loos ida deʼit+ no nia mak Aman,+ no husi nia mak buat hotu iha no ita moris ba nia.+ No iha Naʼi ida deʼit, Jesus Kristu, no liuhusi nia mak buat hotu iha,+ no ita moris liuhusi nia.

7 Maski nuneʼe, laʼós ema hotu hatene kona-ba neʼe.+ Maibé ba ema balu neʼebé uluk adora estátua, sira hanoin kona-ba ai-han balu nuʼudar buat neʼebé hasaʼe ona ba estátua,+ no tan neʼe se sira han ai-han neʼe, sira hafoʼer sira-nia konxiénsia neʼebé fraku.+ 8 Maibé ai-han sei la halo ita hakbesik liu ba Maromak.+ Se ita la han, ita la lakon buat ida, no, se ita han, ita la manán buat ida.+ 9 Maibé kontinua matan-moris atu nuneʼe imi-nia direitu atu hili la sai fali nuʼudar fatuk sidi nian ba sira neʼebé fraku.+ 10 Tanba, oinsá se ema ida haree ó neʼebé iha koñesimentu han iha templu neʼebé ema adora estátua? Ó-nia hahalok neʼe bele book ema fraku nia konxiénsia atu nia sai brani hodi han ai-han neʼebé hasaʼe tiha ba estátua, loos ka lae? 11 Entaun, liuhusi ó-nia koñesimentu mak ó halakon* ema neʼebé fraku; nia mak ó-nia maun-alin, no Kristu mate ba nia.+ 12 Kuandu imi halo sala hasoru imi-nia maun-alin iha dalan hanesan neʼe no hakanek sira-nia konxiénsia neʼebé fraku,+ imi halo sala hasoru Kristu. 13 Tan neʼe, se ai-han halo haʼu-nia maun-alin sidi, haʼu sei nunka han tan naʼan, atu nuneʼe haʼu sei la halo haʼu-nia maun-alin sidi.+