Deuteronómio

30 “Bainhira liafuan sira-neʼe hotu sai loos ba imi, katak bensaun no malisan neʼebé haʼu tau ona iha imi-nia oin,+ no imi hanoin-hetan fali*+ ida-neʼe iha nasaun hotu nia leet, neʼebé Jeová, imi-nia Maromak, halo imi namkari bá,+ 2 no imi ho imi-nia oan sira fila fali ba Jeová, imi-nia Maromak,+ ho imi-nia laran tomak no ho imi-nia moris*+ tomak hodi rona ba ninia liafuan tuir buat hotu neʼebé haʼu fó sai ba imi ohin, 3 entaun Jeová, imi-nia Maromak, sei lori fali imi neʼebé sai ona dadur+ no hatudu laran-sadiʼa+ ba imi no halibur fali imi husi povu hotu neʼebé Jeová, imi-nia Maromak, halo imi namkari bá.+ 4 Maski imi namkari toʼo lalehan nia rohan, maibé husi neʼebá mak Jeová, imi-nia Maromak, sei halibur imi no lori imi fila.+ 5 Jeová, imi-nia Maromak, sei lori imi tama fali ba rai neʼebé imi-nia aman sira foti ona, no rai neʼe sei sai fali imi-nian; no nia sei halo imi moris diʼak no halo imi sai barak liu fali imi-nia aman sira.+ 6 Jeová, imi-nia Maromak, sei hamoos* imi-nia laran no imi-nia bei-oan sira-nia laran,+ atu nuneʼe imi bele hadomi Jeová, imi-nia Maromak, ho imi-nia laran tomak no ho imi-nia moris* tomak no imi bele kontinua moris.+ 7 Tuirmai Jeová, imi-nia Maromak, sei lori malisan sira-neʼe hotu ba imi-nia inimigu neʼebé odi no haterus imi.+

8 “Nuneʼe imi sei fila fali ba Jeová hodi rona ba ninia liafuan no halo tuir ninia mandamentu hotu neʼebé haʼu fó sai ba imi ohin. 9 Jeová, imi-nia Maromak, sei haraik bensaun barak tebes ba serbisu hotu neʼebé imi halo.+ Nia sei aumenta imi-nia oan, imi-nia animál-hakiak sira no rezultadu neʼebé imi hetan husi imi-nia toʼos, tanba Jeová sei sai kontente fali atu halo imi moris diʼak, hanesan uluk nia mós kontente atu halo imi-nia beiʼala sira moris diʼak.+ 10 Tanba iha tempu neʼebá imi sei rona ba Jeová, imi-nia Maromak, nia liafuan no halo tuir ninia mandamentu no lei sira neʼebé hakerek ona iha livru Ukun-Fuan neʼe, no imi sei fila fali ba Jeová, imi-nia Maromak, ho imi-nia laran tomak no ho imi-nia moris tomak.+

11 “Mandamentu neʼebé haʼu fó sai ba imi ohin mak laʼós buat neʼebé susar liu ba imi, ka dook liu husi imi.+ 12 Mandamentu neʼe laʼós iha lalehan, hodi imi dehan: ‘Sé mak sei saʼe ba lalehan no foti ida-neʼe ba ita, atu nuneʼe ita bele rona no halo tuir?’+ 13 No neʼe laʼós iha tasi sorin, hodi imi dehan: ‘Sé mak sei hakur ba tasi sorin no foti ida-neʼe ba ita, atu nuneʼe ita bele rona no halo tuir?’ 14 Tanba Maromak nia liafuan besik loos ba imi, ida-neʼe iha imi-nia ibun no iha imi-nia laran,+ atu nuneʼe imi bele halo tuir ida-neʼe.+

15 “Haree bá, ohin haʼu tau dalan rua iha imi-nia oin. Dalan ida mak lori ba moris no buat diʼak, no dalan seluk mak lori ba mate no buat aat.+ 16 Se imi rona ba Jeová, imi-nia Maromak, nia mandamentu neʼebé haʼu fó sai ba imi ohin, hodi hadomi Jeová, imi-nia Maromak,+ hodi laʼo iha ninia dalan sira, no hodi halo tuir ninia mandamentu, ukun-fuan no lei sira, imi sei kontinua moris+ no sai barak liután, no Jeová, imi-nia Maromak, sei haraik bensaun ba imi iha rai neʼebé imi sei foti.+

17 “Maibé se imi hadook imi-nia laran+ no lakohi rona, no imi-nia laran monu ba maromak sira seluk hodi hakruʼuk ba sira no serbí sira,+ 18 haʼu hatete ba imi ohin katak imi sei lakon mohu duni.+ Imi sei la moris naruk iha rai neʼebé imi sei foti nuʼudar imi-nian bainhira imi hakur ona Mota Jordaun neʼe. 19 No ohin haʼu halo lalehan no rai sai nuʼudar sasin hasoru imi katak haʼu tau moris no mate, bensaun no malisan iha imi-nia oin;+ no imi tenke hili moris atu nuneʼe imi bele moris,+ imi no imi-nia bei-oan sira,+ 20 hodi hadomi Jeová, imi-nia Maromak,+ rona ba ninia liafuan no kontinua laran-metin ba nia,+ tanba nia mak fó moris ba imi no liuhusi nia mak imi bele moris naruk iha rai neʼebé Jeová jura ona atu fó ba imi-nia beiʼala sira, Abraão, Isaac no Jacob.”+