Deuteronómio

13 “Se profeta ida ka ema ida neʼebé fó-hatene nanis kona-ba futuru liuhusi mehi mosu iha imi-nia leet no nia fó imi sinál ida ka siʼik kona-ba buat ruma, 2 no sinál neʼe ka buat neʼebé nia siʼik sai loos duni no nia dehan: ‘Mai ita laʼo tuir maromak sira seluk’, maromak neʼebé imi seidauk hatene, ‘no mai ita serbí sira’, 3 imi labele rona ba liafuan husi profeta neʼe ka ema neʼebé hetan mehi neʼe,+ tanba Jeová, imi-nia Maromak, koko imi+ atu hatene se imi hadomi Jeová, imi-nia Maromak, ho imi-nia laran tomak no ho imi-nia moris tomak ka lae.+ 4 Imi tenke laʼo tuir deʼit Jeová, imi-nia Maromak, imi tenke hamtaʼuk deʼit nia, imi tenke halo tuir ninia mandamentu sira, imi tenke rona deʼit ba ninia lian. Imi tenke serbí nia deʼit, no imi tenke kaer metin ba nia.+ 5 Maibé imi tenke oho tiha profeta neʼe ka ema neʼebé hetan mehi neʼe,+ tanba nia book imi atu kontra hasoru Jeová, imi-nia Maromak, ida neʼebé lori imi sai husi rai-Ejitu no sosa fali imi husi uma atan nian. Ema neʼe koko atu halo imi laʼo sees husi dalan neʼebé Jeová, imi-nia Maromak, haruka imi atu laʼo bá. Imi tenke hasai tiha buat neʼebé aat husi imi-nia leet.+

6 “Se ó-nia maun ka alin, katak ó-nia inan nia oan-mane, ka ó-nia oan-mane ka oan-feto, ka ó-nia feen neʼebé ó hadomi ka ó-nia belun diʼak liu mak koko atu dada ó subasubar, hodi dehan: ‘Mai ita bá serbí maromak sira seluk’,+ maromak sira neʼebé ó no ó-nia beiʼala sira la hatene, 7 maromak sira husi nasaun sira neʼebé haleʼu imi, husi fatin neʼebé besik ó ka dook husi ó, husi rai nia rohan ida toʼo rai nia rohan seluk, 8 ó labele tuir deʼit ema neʼe ka rona ba nia,+ no ó mós labele hanoin nia ka hatudu laran-sadiʼa ka proteje nia; 9 maibé ó tenke oho tiha nia.+ Ó mak tenke tuda uluk nia atu oho nia, no tuirmai mak povu tomak sei tuda nia.+ 10 No ó tenke tuda nia toʼo mate,+ tanba nia koko atu halo ó fila kotuk ba Jeová, ó-nia Maromak, neʼebé lori ó sai husi rai-Ejitu, husi uma atan nian. 11 Tuirmai ema Izraél tomak sei rona kona-ba neʼe no sai taʼuk, no sira sei la halo tan buat aat hanesan neʼe iha ó-nia leet.+

12 “Se iha imi-nia sidade neʼebé Jeová, imi-nia Maromak, fó ba imi atu hela, imi rona ema hatete: 13 ‘Ema folin-laek sira mosu ona iha imi-nia leet no halo ema iha sira-nia sidade fila ba dalan seluk, hodi dehan: “Mai ita bá serbí maromak sira seluk”, maromak sira neʼebé imi seidauk hatene’, 14 imi tenke haree didiʼak problema neʼe, buka-hatene didiʼak no husu tuir kona-ba neʼe.+ Se imi hatene ho loloos katak ema halo duni buat aat neʼe iha imi-nia leet, 15 imi tenke oho tiha povu iha sidade neʼe ho surik.+ Imi tenke halakon+ sidade neʼe no buat hotu neʼebé iha laran, no halakon mós animál-hakiak sira ho surik. 16 Tuirmai imi tenke halibur sasán hotu no tau iha fatin públiku nia klaran no sunu sidade neʼe, no sasán sira-neʼe sei sai hanesan sakrifísiu sunu nian ba Jeová, imi-nia Maromak. Sidade neʼe tenke rahun ba nafatin. Keta harii fali ida-neʼe. 17 Imi labele foti sasán sira neʼebé haketak ona atu halakon tiha,+ hodi nuneʼe Jeová sei la sai hirus makaʼas ba imi no sei hatudu laran-sadiʼa no laran-diʼak ba imi no halo imi sai barak, hanesan nia jura ona ba imi-nia beiʼala sira.+ 18 Imi tenke rona ba Jeová, imi-nia Maromak, nia lian hodi halo tuir ninia mandamentu hotu neʼebé haʼu fó sai ba imi ohin, hodi nuneʼe imi halo buat neʼebé diʼak iha Jeová, imi-nia Maromak, nia haree.+