Deuteronómio

22 “Se imi hetan imi-nia maluk nia karau ka bibi neʼebé lakon, keta husik deʼit ida-neʼe ho neon.+ Imi tenke lori fali ba imi-nia maluk. 2 Maibé se imi-nia maluk neʼe la hela besik imi ka imi la koñese nia, imi tenke lori animál neʼe ba imi-nia uma, no neʼe sei hamutuk ho imi toʼo imi-nia maluk mai buka ida-neʼe. Tuirmai imi tenke fó fali animál neʼe ba nia.+ 3 Neʼe mak buat neʼebé imi tenke halo ba imi-nia maluk nia kuda-burru, roupa no buat hotu neʼebé nia lakon no imi mak hetan fali. Imi labele husik deʼit ida-neʼe.

4 “Se imi haree imi-nia maluk nia kuda-burru ka karau monu latan iha dalan, imi labele husik deʼit ida-neʼe ho neon. Imi tenke ajuda nia hodi halo animál neʼe hamriik fali.+

5 “Feto ida labele hatais mane nia roupa, no mane ida labele hatais feto nia roupa. Tanba Jeová, imi-nia Maromak, hakribi ema hotu neʼebé halo ida-neʼe.

6 “Se imi laʼo iha dalan no hetan manu knuuk neʼebé iha manu-oan ka manu-tolun iha laran, maski knuuk neʼe mak iha ai leten ka iha rai, no manu-inan luut hela manu-tolun ka manu-oan, imi labele foti manu-inan neʼe hamutuk ho ninia oan.+ 7 Imi tenke husik deʼit manu-inan neʼe, maibé imi bele foti ninia oan. Hodi halo nuneʼe mak buat hotu sei sai diʼak ba imi no imi bele moris naruk.

8 “Se imi harii uma foun, imi mós tenke halo moru badak iha ninia kakuluk,+ atu nuneʼe ema la monu husi uma-leten no imi-nia umakain la hetan sala kona-ba ema nia raan.

9 “Imi labele kuda fini oin rua iha imi-nia toʼos-uvas.+ Se lae, buat hotu neʼebé imi koʼa husi fini neʼebé imi kuda no mós ai-fuan husi toʼos-uvas tenke entrega hotu ba fatin sagradu.

10 “Imi labele fila rai hodi uza karau no kuda-burru hamutuk.+

11 “Imi labele hatais hena neʼebé soru hamutuk hodi uza kabas husi bibi-malae fulun no kabas-liñu.+

12 “Imi tenke halo saren iha imi-nia roupa ninin neʼebé imi uza.+

13 “Se mane ida hola feto nuʼudar feen no halo relasaun ho nia maibé depois neʼe, odi fali nia* 14 no nia duun feto neʼe halo hahalok aat no hafoʼer feto neʼe nia naran, hodi dehan: ‘Haʼu hola feto neʼe, maibé kuandu haʼu halo relasaun ho nia, haʼu hetan katak nia laʼós virjen ona’, 15 entaun feto neʼe nia inan-aman tenke hatudu prova ruma katak sira-nia oan-feto mak virjen hela, no lori prova neʼe ba katuas sira iha sidade nia portaun. 16 Feto neʼe nia aman tenke koʼalia ba katuas sira dehan: ‘Haʼu entrega haʼu-nia oan-feto ba mane neʼe nuʼudar feen, maibé mane neʼe odi* nia 17 no duun katak haʼu-nia oan-feto halo hahalok aat, hodi dehan: “Haʼu hetan katak ó-nia oan-feto laʼós virjen ona.” Maibé agora, ida-neʼe mak prova katak uluk haʼu-nia oan-feto virjen hela.’ Tuirmai sira tenke nahe hena neʼe iha katuas sira husi sidade neʼe nia oin. 18 Depois neʼe, katuas sira husi sidade neʼe+ tenke lori mane neʼe no fó kastigu ba nia.+ 19 Sira sei haruka nia atu selu multa osan-mutin 100* no fó ba feto neʼe nia aman, tanba mane neʼe hafoʼer ona povu Izraél nia feto virjen ida,+ no feto neʼe sei kontinua sai nuʼudar ninia feen. Nia labele soe feto neʼe durante ninia moris tomak.

20 “Maibé se buat neʼebé mane neʼe dehan mak loos, no la iha prova katak feto neʼe mak virjen ida, 21 sira tenke lori feto neʼe ba iha ninia aman nia uma oin, no mane sira husi feto neʼe nia sidade tenke tuda mate feto neʼe, tanba nia halo ona hahalok foʼer+ iha Izraél hodi halo sala seksuál* iha ninia aman nia uma.+ Ho ida-neʼe, imi tenke hasai tiha buat aat husi imi-nia leet.+

22 “Se ema kaer toman mane ida toba ho mane seluk nia feen, entaun sira naʼin-rua tenke mate hamutuk, katak mane no feto neʼebé toba hamutuk neʼe.+ Ho ida-neʼe, imi tenke hasai tiha buat aat husi Izraél.

23 “Se feto virjen ida prenda ona ho mane ida, no mane seluk hasoru nia iha sidade no toba ho nia, 24 imi tenke lori sira naʼin-rua ba sidade neʼe nia portaun no tuda mate sira. Feto neʼe tenke mate tanba nia la hakilar iha sidade neʼe no mane neʼe mós tenke mate tanba nia hamoe ona ninia maluk nia feen.+ Ho ida-neʼe, imi tenke hasai tiha buat aat husi imi-nia leet.

25 “Maibé se mane neʼe hasoru feto ida iha rai-luan no feto neʼe prenda ona, no mane neʼe obriga nia hodi toba ho nia, mane neʼe deʼit mak tenke mate, 26 no imi labele halo buat ida ba feto neʼe. Feto neʼe la iha sala ida no nia la merese mate. Kazu neʼe mak hanesan deʼit ho bainhira mane ida ataka ninia maluk no oho nia.*+ 27 Tanba mane neʼe hasoru nia iha rai-luan, no feto neʼebé prenda ona neʼe hakilar, maibé la iha ema ida atu salva nia.

28 “Se mane ida hasoru feto virjen ida neʼebé seidauk troka prenda no nia kaer feto neʼe no toba ho nia no ema kaer toman sira,+ 29 mane neʼebé toba ho nia tenke selu osan-mutin 50* ba feto neʼe nia aman, no feto neʼe sei sai ninia feen.+ Tanba nia hamoe ona feto neʼe, entaun nia labele soe feto neʼe durante ninia moris tomak.

30 “Mane ida labele hola ninia aman nia feen, atu nuneʼe nia labele hamoe ninia aman.*+