Ezequiel

6 Jeová koʼalia tan mai haʼu, hodi dehan: 2 “Oan-mane husi ema, fila oin hodi hateke ba Izraél nia foho sira no fó sai profesia hodi kontra sira. 3 Ó tenke dehan: ‘Oh Izraél nia foho sira, rona ba liafuan husi Jeová, Naʼi Ukun-Naʼin Boot Liu: Jeová, Naʼi Ukun-Naʼin Boot Liu, dehan nuneʼe ba foho, foho-oan, mota no foho-leet: “Haree bá! Haʼu sei lori surik atu ataka imi, no haʼu sei halakon imi-nia fatin aas* sira. 4 Haʼu sei harahun imi-nia altár, halo aat imi-nia altár insensu nian,+ no haʼu sei oho imi no soe imi-nia mate-isin iha imi-nia estátua sira neʼebé haʼu hakribi* nia oin.+ 5 Haʼu sei soe povu Izraél nia mate-isin iha sira-nia estátua sira neʼebé haʼu hakribi* nia oin, no haʼu sei halo namkari imi-nia ruin sira haleʼu imi-nia altár sira.+ 6 Iha fatin hotu neʼebé imi hela bá, haʼu sei harahun imi-nia sidade sira.+ Haʼu sei harahun imi-nia fatin aas sira no husik neʼe rahun deʼit.+ Imi-nia altár sira sei rahun toʼo uut, imi-nia estátua sira neʼebé haʼu hakribi* sei lakon mohu, imi-nia altár insensu nian sei rahun tiha, no haʼu sei halakon buat hotu neʼebé imi halo. 7 No sira neʼebé ema oho sei monu iha imi-nia leet.+ Nuneʼe imi sei hatene duni katak haʼu mak Jeová.+

8 “‘“Maibé haʼu sei husik ema balu moris. Ema balu iha imi-nia leet sei la mate ho surik bainhira haʼu halo imi namkari iha nasaun sira-nia leet.+ 9 No sira neʼebé la mate sei hanoin-hetan haʼu iha nasaun sira-nia leet, iha fatin neʼebé sira sai dadur.+ Sira sei hatene katak sira halo haʼu laran-kanek tanba sira la hatudu laran-metin* hodi fila kotuk ba haʼu+ no tanba sira-nia matan kaan estátua sira neʼebé haʼu hakribi.*+ Sira sei sai moe no hakribi hahalok aat no buat foʼer hotu neʼebé sira halo ona.+ 10 Sira sei hatene duni katak haʼu mak Jeová no haʼu-nia avizu atu lori susar ba sira laʼós bosok.”’+

11 “Jeová, Naʼi Ukun-Naʼin Boot Liu, dehan nuneʼe: ‘Basa liman no tebe rai ho laran-triste no halerik kona-ba hahalok aat no buat foʼer hotu neʼebé umakain Izraél halo, tanba sira sei mate ho surik, hamlaha boot no moras-peste.*+ 12 Sira neʼebé hela dook sei mate ho moras-peste, sira neʼebé besik sei mate ho surik, no sira seluk sei mate ho hamlaha boot. Haʼu sei hasai hotu haʼu-nia hirus hasoru sira.+ 13 Sira* sei hatene duni katak haʼu mak Jeová,+ bainhira sira-nia ema nia mate-isin latan entre sira-nia estátua sira neʼebé haʼu hakribi,* latan haleʼu sira-nia altár,+ latan iha foho-oan hotu neʼebé aas, iha foho-tutun hotu, iha ai-hun buras hotu nia okos, no iha ai-hun boot nia sanak okos neʼebé uluk sira hasaʼe sakrifísiu neʼebé morin hodi halo kontente sira-nia estátua hotu neʼebé haʼu hakribi.*+ 14 Haʼu sei lolo haʼu-nia liman kontra sira hodi halo sira-nia rai sai fuik, no halo sira-nia hela-fatin hotu sai mamuk liu fali rai-fuik besik Dibla. Nuneʼe sira sei hatene duni katak haʼu mak Jeová.’”