Salmo
LIVRU SEGUNDU
(Salmo 42-72)
Ba dirijente. Maskil* husi Kora nia oan-mane sira.+
42 Hanesan bibi-rusa neʼebé hakarak tebes bee neʼebé suli,
Nuneʼe mós haʼu hakarak tebes Ita, oh Maromak.
2 Haʼu hamrook ba Maromak, Maromak neʼebé moris.+
Bainhira mak haʼu sei bá* hamriik iha Maromak nia oin?+
3 Haʼu-nia matan-been mak haʼu-nia ai-han loron no kalan;
Loron tomak ema sadik haʼu, hodi dehan: “Ó-nia Maromak iha neʼebé?”+
4 Haʼu hanoin fali tempu uluk, no haʼu fó sai haʼu-nia sentimentu hotu,
Tanba uluk haʼu laʼo hamutuk ho ema-lubun;
Uluk haʼu dirije sira, haʼu laʼo neineik iha sira-nia oin hodi bá Maromak nia uma,
Ho lian ksolok nian no agradese,
No ho lian husi ema-lubun neʼebé selebra festa.+
5 Tanbasá mak haʼu neon-susar?+
Tanbasá mak haʼu laran-taridu?
6 Oh haʼu-nia Maromak, haʼu neon-susar.+
Tan neʼe mak haʼu hanoin-hetan Ita,+
Bainhira haʼu iha área Mota Jordaun nian no iha Foho Hermon nia tutun sira,
Iha Foho Mizar.*
7 Ita-nia bee-tudak suli tun ho lian makaʼas,
No bee kleʼan bolu bee kleʼan seluk.
Ita-nia laloran sira hotu neʼebé baku makaʼas halo haʼu atu mout.+
8 Durante loron, Jeová sei fó mai haʼu ninia domin neʼebé laran-metin,
No durante kalan, haʼu sei kanta kona-ba nia, no hasaʼe orasaun ba Maromak neʼebé fó moris ba haʼu.+
9 Haʼu sei husu ba Maromak, haʼu-nia fatuk boot:
“Tanbasá mak Ita haluha ona haʼu?+
Tanbasá mak haʼu tenke laʼo bá-mai ho triste tanba haʼu-nia inimigu neʼebé hanehan haʼu?”+
10 Ho odi* mak haʼu-nia inimigu sira sadik haʼu;
Loron tomak sira sadik haʼu, hodi dehan: “Ó-nia Maromak iha neʼebé?”+
11 Tanbasá mak haʼu neon-susar?
Tanbasá mak haʼu laran-taridu?