Primeiru Samuel
23 Liutiha tempu balu, ema hatete ba David: “Ema Filístia sira halo funu hasoru Keila,+ no sira hadau ai-han hotu husi fatin sama trigu nian.” 2 Entaun David husu ba Jeová:+ “Haʼu tenke bá oho ema Filístia sira-neʼe ka lae?” Jeová hatán ba David: “Bá, oho ema Filístia sira-neʼe hodi salva Keila.” 3 Maibé David nia ema sira dehan ba nia: “Agora ami taʼuk hodi hela iha neʼe iha Judá,+ sá tan se ami bá Keila hodi halo funu hasoru tropa Filístia!”+ 4 Nuneʼe David husu fali ba Jeová.+ No Jeová hatán ba nia: “Hamriik bá, tun ba Keila tanba haʼu sei entrega ema Filístia ba ó-nia liman.”+ 5 Entaun David tun ba Keila no halo funu hasoru ema Filístia. Nia foti sira-nia animál-hakiak no oho ema Filístia barak loos, nuneʼe David salva ema Keila.+
6 Uluk bainhira Ahimelec nia oan-mane Abiatar+ halai ba David iha Keila, nia mós lori efod* ida. 7 Ema fó-hatene ba Saul, dehan: “David bá ona Keila.” Entaun Saul dehan: “Maromak entrega ona nia ba haʼu,*+ tanba nia tau nia an iha lasu hodi tama iha sidade neʼebé iha portaun neʼebé xave ho ai-lolon.” 8 Entaun Saul halibur tropa hotu atu bá halo funu, atu tun ba Keila hodi halo serku ba David no ninia ema sira. 9 Bainhira David hatene katak Saul halo planu aat ba nia, nia dehan ba amlulik Abiatar: “Lori efod mai iha neʼe.”+ 10 Tuirmai David hatete: “Oh Jeová, Izraél nia Maromak, Ita-Boot nia atan rona ona katak Saul planu atu mai iha Keila hodi halakon sidade neʼe tanba haʼu.+ 11 Keila nia ulun-naʼin sira* sei entrega haʼu ba ninia liman ka lae? Saul sei tun duni mai hanesan Ita-nia atan rona ka lae? Oh Jeová, Izraél nia Maromak, favór ida, fó-hatene ba Ita-nia atan.” Ho ida-neʼe, Jeová dehan: “Nia sei tun mai.” 12 David husu: “Keila nia ulun-naʼin sira sei entrega haʼu no haʼu-nia ema sira ba Saul nia liman ka lae?” Jeová hatán: “Sira sei entrega imi ba nia.”
13 Ho ida-neʼe, David hamriik kedas ho ninia ema sira, maizumenus mane naʼin-600,+ no sira sai husi Keila no muda ba fatin oioin neʼebé seguru ba sira. Bainhira ema fó-hatene ba Saul katak David halai ona husi Keila, nia la duni tuir tan David. 14 David hela iha rai-fuik iha fatin sira neʼebé susar atu tama, iha área foho nian iha rai-fuik Zif.+ Saul nafatin buka nia,+ maibé Jeová la entrega nia ba Saul nia liman. 15 David hatene katak* Saul buka hela atu oho nia, durante tempu neʼebé nia hela iha rai-fuik Zif iha Hores.
16 Saul nia oan-mane Jonatan bá hasoru David iha Hores, no nia ajuda David atu hametin ninia fiar ba Jeová.+ 17 Jonatan hatete ba nia: “Keta taʼuk, tanba haʼu-nia aman Saul sei la hetan ó. Ó sei sai liurai hodi ukun Izraél,+ no haʼu sei sai ema segundu tuir ó. Haʼu-nia aman Saul mós hatene kona-ba neʼe.”+ 18 Tuirmai sira naʼin-rua halo aliansa+ iha Jeová nia oin, no David hela iha Hores, maibé Jonatan fila fali ba ninia uma.
19 Tuirmai ema Zif sira bá hasoru Saul iha Gibea+ no dehan: “David subar besik ami+ iha Hores+ iha fatin sira neʼebé susar atu tama, iha foho-oan nia leten iha Hakila+ neʼebé iha Jesimon* nia parte súl.*+ 20 Oh liurai, bainhira Ita hakarak tun bá neʼebá, Ita bele tun bá, no ami sei entrega nia ba liurai nia liman.”+ 21 Ho ida-neʼe, Saul dehan: “Haʼu hein katak Jeová sei haraik bensaun ba imi tanba imi hatudu laran-sadiʼa ba haʼu. 22 Favór ida, bá koko atu buka-hatene nia iha loos neʼebé no sé mak haree ona nia iha neʼebá, tanba ema fó-hatene mai haʼu katak nia matenek atu lohi. 23 Buka-hatene didiʼak fatin hotu neʼebé nia subar no mai fali ho prova. Tuirmai haʼu sei bá hamutuk ho imi, no se nia iha rai neʼebá, haʼu sei buka nia iha ema Judá rihun ba rihun nia leet.”
24 Entaun sira husik fatin neʼe no laʼo uluk liu Saul hodi fila fali ba Zif.+ Iha tempu neʼebá, David ho ninia ema sira iha rai-fuik Maon,+ iha área Araba+ neʼebé iha Jesimon nia parte súl. 25 Tuirmai Saul hamutuk ho ninia ema sira bá buka David.+ Bainhira ema fó-hatene ba David kona-ba neʼe, nia bá kedas atu subar iha fatuk boot nia kuak+ no hela nafatin iha rai-fuik Maon. Bainhira Saul rona kona-ba neʼe, nia duni tuir David ba rai-fuik Maon. 26 Bainhira Saul toʼo iha foho nia sorin ida, David ho ninia ema sira iha foho neʼe nia sorin seluk. David halai lalais+ husi Saul, maibé Saul ho ninia ema sira hakbesik liután ba David ho ninia ema sira atu kaer sira.+ 27 Maibé ema ida lori lia-menon ba Saul, hodi dehan: “Mai lalais, tanba ema Filístia ataka ona ita-nia rai!” 28 Rona tiha neʼe, Saul la duni tuir tan David+ no fila hodi halo funu hasoru ema Filístia. Tan neʼe mak sira hanaran fatin neʼe Fatuk Boot Haketak Malu.
29 Depois neʼe, David sai husi fatin neʼe no hela iha En-Gedi+ iha fatin sira neʼebé susar atu tama.