Segundu Timóteo
1 Haʼu Paulo, Kristu Jesus nia apóstolu ida liuhusi Maromak nia hakarak hodi tuir promesa kona-ba moris neʼebé liuhusi Kristu Jesus,+ 2 haruka karta neʼe ba haʼu-nia oan doben Timóteo:+
Haʼu harohan katak Aman Maromak no ita-nia Naʼi Kristu Jesus sei haraik laran-diʼak neʼebé boot, laran-sadiʼa, no dame ba ó.
3 Haʼu fó agradese ba Maromak, neʼebé haʼu serbí ho konxiénsia neʼebé moos no haʼu halo serbisu sagradu ba nia hanesan haʼu-nia beiʼala sira halo ona, no loron-kalan haʼu la para atu hanoin-hetan ó iha haʼu-nia orasaun. 4 Haʼu hanoin-hetan ó-nia matan-been no haʼu hakarak tebes atu haree ó, atu nuneʼe haʼu bele sai nakonu ho ksolok. 5 Tanba haʼu hanoin-hetan ó-nia fiar neʼebé la laran-makerek,+ no ó-nia avó-feto Loide no ó-nia inan Eunice mak iha uluk fiar neʼe, no haʼu fiar metin katak ó mós iha fiar hanesan neʼe.
6 Tanba razaun neʼe mak haʼu fó-hanoin ó atu uza nafatin* Maromak nia prezente neʼebé ó simu ona bainhira haʼu tau liman ba ó.+ 7 Tanba espíritu neʼebé Maromak fó ba ita la hamosu hahalok taʼuk-teen,+ maibé fó ita kbiit,+ domin no hanoin neʼebé loos. 8 Nuneʼe, keta sai moe bainhira ó haklaken kona-ba ita-nia Naʼi,+ no keta sai moe kona-ba haʼu-nia situasaun nuʼudar dadur tanba Naʼi. Maibé, sai prontu atu hetan terus+ tanba liafuan diʼak hodi sadere ba Maromak nia kbiit.+ 9 Nia salva ita no bolu ona ita atu sai ema santu,+ laʼós tanba ita-nia hahalok rasik, maibé tanba ninia hakarak no ninia laran-diʼak neʼebé boot.+ Horiuluk kedas nia fó ona laran-diʼak neʼebé boot ba ita liuhusi Kristu Jesus, 10 maibé agora, laran-diʼak neʼe hatudu sai ona ho momoos kuandu ita-nia Salvadór hatudu ninia an, Salvadór neʼe mak Kristu Jesus,+ neʼebé halakon ona mate,+ no liuhusi liafuan diʼak+ nia hatudu ba ita oinsá atu hetan moris+ ho isin neʼebé labele dodok.+ 11 Tanba liafuan diʼak neʼe mak haʼu hetan knaar nuʼudar haklaken-naʼin no apóstolu no mestre.+
12 Tan neʼe mak haʼu mós hetan terus sira-neʼe,+ maibé haʼu la sai moe.+ Tanba haʼu hatene kona-ba Maromak neʼebé haʼu fiar ona, no haʼu fiar metin katak nia bele proteje buat neʼebé haʼu entrega ona ba nia toʼo loron neʼebá.+ 13 Kontinua kaer metin ba baze* husi liafuan neʼebé loos*+ neʼebé ó rona ona husi haʼu, no kontinua kaer metin ba ó-nia fiar no domin nuʼudar ema neʼebé ida deʼit ho Kristu Jesus. 14 Ó tenke proteje buat folin-boot sira-neʼe neʼebé entrega ona ba ó ho ajuda husi espíritu santu neʼebé hela iha ita.+
15 Ó hatene katak ema hotu iha provínsia Ázia+ fila kotuk ona ba haʼu, neʼe inklui mós Figelo no Hermógenes. 16 Haʼu harohan atu Naʼi hatudu ninia laran-sadiʼa ba Onesíforo nia umakain,+ tanba dala barak nia fó kmaan ba haʼu, no nia la sai moe tanba haʼu kesi hela ho korrente iha komarka laran. 17 Tuir loloos, bainhira nia iha Roma, nia hakaʼas an atu buka haʼu no hetan duni haʼu. 18 Haʼu harohan katak Naʼi Jeová* haraik laran-sadiʼa ba nia iha loron neʼebá. No ó hatene ho didiʼak serbisu hotu neʼebé nia halo iha Éfeso.