Segundu Samuel

9 David husu: “Iha ema ida neʼebé sei moris hela husi Saul nia umakain ka lae? Haʼu hakarak hatudu domin neʼebé laran-metin ba nia tanba haʼu hanoin Jonatan.”+ 2 Uluk Saul nia umakain iha atan-mane ida naran Ziba.+ Entaun sira bolu nia bá hasoru David, no liurai husu ba nia: “Ó mak Ziba ka?” Nia hatán: “Haʼu mak Ita-nia atan.” 3 Liurai dehan tan: “Iha ema ruma neʼebé sei moris hela husi Saul nia umakain ka lae? Haʼu hakarak hatudu Maromak nia domin neʼebé laran-metin ba nia.” Ziba hatán ba liurai: “Jonatan nia oan-mane ida sei moris hela. Ninia ain rua kudeʼik.”+ 4 Liurai husu ba nia: “Nia iha neʼebé?” Ziba hatán ba liurai: “Nia hela iha Lo-Debar, iha Amiel nia oan-mane Makir nia uma.”+

5 Liurai David haruka kedas ema hodi lori nia mai husi Amiel nia oan-mane Makir nia uma iha Lo-Debar. 6 Bainhira Jonatan nia oan-mane Mefiboset, Saul nia bei-oan, tama bá hasoru David, nia hakneʼak kedas no hakruʼuk ho oin ba rai. David dehan: “Mefiboset!” Nia hatán: “Ita-nia atan mak neʼe.” 7 David hatete ba nia: “Keta taʼuk, haʼu sei hatudu domin neʼebé laran-metin+ ba ó tanba haʼu hanoin ó-nia aman Jonatan. Haʼu sei fó fali ó-nia avó Saul nia rai hotu, no ó sei han* nafatin iha haʼu-nia meza.”+

8 Rona tiha neʼe, Mefiboset hakruʼuk ho oin ba rai no dehan: “Tanbasá mak Ita hanoin* Ita-nia atan neʼe? Haʼu hanesan asu neʼebé mate ona.”+ 9 Liurai haruka ema bolu Saul nia atan Ziba, no dehan ba nia: “Buat hotu neʼebé Saul nian no ninia umakain nian haʼu sei fó fali ba ó-nia naʼi nia bei-oan.+ 10 Ó no ó-nia oan-mane sira no ó-nia atan sira tenke kuda fini iha rai neʼe ba nia. Ó tenke halibur ai-han neʼebé ó koʼa husi rai neʼe hodi fó ba ó-nia naʼi nia bei-oan nia ema sira atu sira bele han. Maibé ó-nia naʼi nia bei-oan Mefiboset sei han nafatin iha haʼu-nia meza.”+

Ziba iha oan-mane naʼin-15 no atan naʼin-20.+ 11 Ziba hatete ba liurai: “Ita-nia atan neʼe sei halo tuir haʼu-nia naʼi liurai nia mandamentu hotu.” Entaun Mefiboset han iha David nia* meza hanesan mós liurai nia oan-mane sira. 12 Mefiboset mós iha oan-mane joven ida naran Mika.+ Ema hotu neʼebé hela iha Ziba nia uma sai Mefiboset nia atan. 13 Mefiboset hela iha Jeruzalein tanba nia nafatin han iha liurai nia meza,+ maibé ninia ain rua kudeʼik.+