Isaias
47 Oh Babilónia nia oan-feto virjen,+
Tun mai no tuur iha rai-rahun.
Oh ema Kaldeia nia oan-feto,
Tuur iha rai neʼebé la iha kadunan,+
Tanba ema sei nunka bolu tan ó nuʼudar feto neʼebé ema estima.
2 Foti fatuk dulas trigu nian no halo uut trigu bá.
Hasai tiha ó-nia veu.
Kolu tiha ó-nia saia, hatudu sai ó-nia kelen.
Hakur mota sira.
3 Ó sei hatudu sai ó-nia isin-tanan.
Ó sei hatudu sai ó-nia moe.
Haʼu sei selu fali ba ó,+ no la iha ema ida mak sei hanetik haʼu.*
4 “Ida neʼebé sosa fali ita
Mak Izraél nia Maromak neʼebé Santu.+
Ninia naran mak Jeová, neʼebé ukun tropa lalehan nian.”
5 Oh ema Kaldeia nia oan-feto,+
Tuur nonook iha neʼebá no tama ba nakukun laran;
Ema sei la bolu tan ó nuʼudar Liurai-Feto ba nasaun sira.+
6 Haʼu sai hirus ba haʼu-nia povu.+
Maibé ó la hatudu laran-sadiʼa ba sira.+
Ó mós haruka sira neʼebé idade boot liu atu lori naha todan.+
7 Ó dehan: “Haʼu sei sai Liurai-Feto ba nafatin.”+
Ó la tau atensaun ba buat sira-neʼe;
Ó la hanoin kona-ba buat sira-neʼe nia rohan.
8 Agora rona ida-neʼe bá, ó neʼebé hadomi ksolok,+
Neʼebé tuur ho hakmatek no hanoin iha ó-nia laran:
“Haʼu deʼit mak kmanek liu, la iha ida mak hanesan haʼu.+
Haʼu sei la sai feto-faluk.
Haʼu sei nunka lakon haʼu-nia oan sira.”+
9 Maibé iha loron ida nia laran, buat rua tuirmai neʼe sei akontese ba ó derrepente deʼit:+
Ó sei lakon ó-nia oan sira no ó sei sai feto-faluk.
Susar sira-neʼe hotu sei kona duni ó+
Tanba* ó-nia hahalok matan-dook nian barak no ó-nia ai-moruk fekit neʼebé makaʼas.+
10 Ó tau fiar ba ó-nia hahalok aat.
Ó dehan: “La iha ema ida mak haree haʼu.”
Ó-nia matenek no koñesimentu mak lori ó laʼo sala dalan,
No ó hanoin iha ó-nia laran: “Haʼu deʼit mak kmanek liu, la iha ida mak hanesan haʼu.”
11 Maibé susar sei kona ó,
No ó-nia biru mós sei la hapara ó-nia susar.
Terus sei kona ó; no ó sei labele hasees an husi terus.
Susar sei kona ó derrepente deʼit; susar neʼebé ó seidauk hatene.+
12 Kontinua uza ó-nia ai-moruk fekit no halo hahalok matan-dook nian barak,+
Neʼebé ó halo ona husi ó-nia tempu joven kedas.
Karik ó bele hetan buat diʼak husi ida-neʼe;
Karik ó bele halo ema hakfodak.
13 Ó sai kole ona hodi buka konsellu-naʼin barak.
Agora husik sira hamriik no salva ó,
Sira neʼebé adora lalehan,* neʼebé hateke ba fitun sira,+
Sira neʼebé fó sai koñesimentu iha tempu fulan-foun
Kona-ba buat neʼebé atu akontese ba ó.
14 Haree bá! Sira mak hanesan duʼut-maran.
Ahi sei han sira.
Sira labele salva sira-nia an husi ahi nia kbiit.
Neʼe laʼós ahi-klaak neʼebé ema uza atu halo manas sira-nia an,
No neʼe laʼós ahi neʼebé ema bele tuur besik hodi haneruk an.
15 Ó-nia matan-dook sira mós sei sai hanesan neʼe,
Katak sira neʼebé ó serbisu hamutuk husi ó-nia tempu joven.
Sira sei laʼo-lemo, sira ida-idak sei laʼo iha ninia dalan rasik.*
No la iha ida mak sei salva ó.+