Deuteronómio

7 “Bainhira Jeová, imi-nia Maromak, lori imi ba rai neʼebé imi besik ona atu tama no foti,+ nia mós sei halakon nasaun boot sira husi imi-nia oin.+ Sira mak: ema Hetes, ema Girgaseu, ema Amoreu,+ ema Kanaan, ema Perizeu, ema Heveu, no ema Jebus.+ Nasaun hitu neʼe boot liu no forte liu imi.+ 2 Jeová, imi-nia Maromak, sei entrega sira ba imi, no imi sei manán sira.+ Imi tenke halakon tiha sira.+ Imi labele halo aliansa ho sira no labele hanoin sira.+ 3 Imi labele halo aliansa kaben nian ho sira. Keta fó imi-nia oan-feto ba sira-nia oan-mane ka foti sira-nia oan-feto ba imi-nia oan-mane.+ 4 Tanba sira sei dada imi-nia oan sira atu la laʼo tuir tan haʼu hodi serbí fali maromak sira seluk;+ no Jeová sei sai hirus tebes hasoru imi, no nia sei halakon imi lalais.+

5 “Maibé, imi tenke halo buat tuirmai neʼe ba sira: Sobu sira-nia altár, harahun sira-nia fatuk lulik,*+ tesi sira-nia ai-riin lulik,*+ no sunu sira-nia estátua sira.+ 6 Tanba imi mak povu neʼebé santu ba Jeová, imi-nia Maromak, no Jeová, imi-nia Maromak, hili ona imi atu sai ninia povu neʼebé espesiál* husi nasaun hotu iha mundu.+

7 “Jeová hatudu domin ba imi no hili imi laʼós tanba imi mak nasaun neʼebé boot liu fali nasaun seluk;+ tuir loloos imi mak nasaun neʼebé kiʼik liu fali nasaun sira seluk.+ 8 Maibé Jeová hili imi tanba nia hadomi imi no tanba nia kumpre buat neʼebé nia jura ona ba imi-nia beiʼala sira.+ Tan neʼe mak Jeová lori sai imi ho liman neʼebé forte, no sosa fali imi husi uma atan nian,+ husi Faraó, liurai Ejitu, nia liman.* 9 Imi hatene ho didiʼak katak Jeová, imi-nia Maromak, mak Maromak neʼebé loos, Maromak neʼebé laran-metin, neʼebé kumpre ninia aliansa no hatudu domin neʼebé laran-metin ba ema neʼebé hadomi nia no halo tuir ninia mandamentu toʼo jerasaun rihun ba rihun.+ 10 Maibé ba ema neʼebé odi nia, nia sei selu fali kedas hodi halakon sira.+ Nia sei la demora atu fó kastigu ba ema neʼebé odi nia; nia sei selu fali kedas ba sira. 11 Tan neʼe, kumpre bá mandamentu, ukun-fuan no lei sira neʼebé haʼu fó sai ba imi ohin, hodi halo tuir buat sira-neʼe.

12 “Se imi kontinua rona ba ninia lei sira-neʼe, no halo tuir buat sira-neʼe, Jeová, imi-nia Maromak, sei kumpre ninia aliansa no hatudu domin neʼebé laran-metin tuir buat neʼebé nia jura ona ba imi-nia beiʼala sira. 13 Nia sei hadomi imi, haraik bensaun ba imi no halo imi sai barak+ iha rai neʼebé nia jura ona ba imi-nia beiʼala sira atu fó ba imi. Nia sei fó bensaun ba imi hodi iha oan* barak no imi-nia rai sei buras ho trigu,* tua-uvas foun, mina,+ imi-nia karau no bibi-malae sira mós sei iha oan barak.+ 14 Imi sei sai povu neʼebé hetan bensaun barak liu fali povu sira seluk hotu;+ mane no feto hotu iha imi-nia leet sei iha oan duni, no imi-nia animál sira mós sei iha oan.+ 15 Jeová sei halakon moras hotu husi imi, no nia sei la lori ba imi-nia leet moras aat hotu neʼebé imi hatene iha rai-Ejitu.+ Maibé, nia sei lori moras sira-neʼe ba ema hotu neʼebé odi imi. 16 Imi tenke halakon* ema hotu neʼebé Jeová, imi-nia Maromak, entrega ba imi.+ Imi* labele hanoin sira,+ no imi labele serbí sira-nia maromak sira,+ tanba neʼe sei sai lasu ida ba imi.+

17 “Se imi hanoin iha imi-nia laran: ‘Nasaun sira-neʼe boot liu fali ami. Oinsá mak ami bele duni sai sira?’+ 18 entaun imi labele taʼuk ba sira.+ Imi tenke hanoin-hetan buat neʼebé Jeová, imi-nia Maromak, halo ona ba Faraó no ba rai-Ejitu tomak,+ 19 no mós kona-ba kastigu boot neʼebé imi rasik haree ona no sinál sira, milagre sira,+ no oinsá Jeová, imi-nia Maromak, uza liman neʼebé forte no liman neʼebé iha kbiit atu lori imi sai.+ Neʼe mak buat neʼebé Jeová, imi-nia Maromak, sei halo ba nasaun hotu neʼebé imi taʼuk.+ 20 Jeová, imi-nia Maromak, sei halo sira sente taʼuk toʼo sira neʼebé sei moris hela+ no subar an husi imi lakon mohu tiha. 21 Keta sai taʼuk ba sira, tanba Jeová, imi-nia Maromak, hamutuk ho imi,+ nia mak Maromak neʼebé boot no kmanek tebes.*+

22 “Jeová, imi-nia Maromak, sei hasai duni nasaun sira-neʼe husi imi-nia oin neineik-neineik.+ Nia la husik imi atu halakon sira lalais deʼit, atu nuneʼe animál fuik sira iha rai-luan la sai barak liu no lori perigu ba imi. 23 Jeová, imi-nia Maromak, sei entrega sira ba imi no sei manán sira toʼo sira la iha tan.+ 24 Nia sei entrega sira-nia liurai ba imi-nia liman,+ no imi tenke halakon sira-nia naran husi mundu.*+ Ema ida sei la brani atu hamriik hasoru imi,+ toʼo imi halakon sira hotu.+ 25 Imi tenke sunu sira-nia estátua sira neʼebé reprezenta sira-nia maromak sira.+ Labele kaan osan-mutin no osan-mean iha estátua sira-neʼe no labele foti neʼe ba imi-nia an,+ atu nuneʼe buat sira-neʼe labele sai lasu ida ba imi, tanba neʼe mak buat neʼebé Jeová, imi-nia Maromak, hakribi.+ 26 Imi labele lori buat neʼebé Maromak hakribi ba imi-nia uma laran, atu nuneʼe Maromak la halakon imi hamutuk ho buat sira-neʼe. Imi tenke odi no hakribi buat sira-neʼe ho imi-nia laran tomak tanba buat sira-neʼe merese atu halakon tiha.