Deuteronómio
21 “Se imi hetan ema nia mate-isin iha fatin ruma iha rai neʼebé Jeová, imi-nia Maromak, fó ba imi atu hela no imi la hatene sé mak oho nia, 2 imi-nia katuas no juís sira+ tenke bá atu sukat husi mate-isin ba sidade sira neʼebé haleʼu mate-isin neʼe. 3 Tuirmai katuas sira husi sidade neʼebé besik liu ba mate-isin neʼe tenke foti karau-inan* ida neʼebé nunka uza atu halo serbisu ruma, karau neʼebé seidauk lori naha todan ruma, 4 no katuas sira husi sidade neʼe tenke lori karau-inan neʼe tun ba foho-leet* neʼebé iha bee suli, neʼebé ema seidauk fila rai ka kuda fini, no sira tenke halo tohar karau neʼe nia kakorok iha foho-leet neʼe.+
5 “No amlulik Levi sira, tenke hakbesik, tanba Jeová, imi-nia Maromak, hili ona sira atu serbí nia+ no atu haraik bensaun hodi Jeová nia naran.+ Sira sei fó sai oinsá atu rezolve problema hotu kona-ba violénsia.+ 6 Tuirmai katuas hotu husi sidade neʼebé besik mate-isin neʼe tenke fase sira-nia liman+ iha karau-inan neʼe nia leten, katak karau neʼebé ninia kakorok halo tohar ona iha foho-leet neʼe, 7 no sira tenke hatete: ‘Ami-nia liman la fakar ema neʼe nia raan, no ami mós la iha neʼebá kuandu ida-neʼe akontese. 8 Oh Jeová, keta fó-sala kona-ba neʼe ba Ita-nia povu Izraél, neʼebé Ita sosa fali ona,+ no keta husik Ita-nia povu Izraél lori nafatin sala kona-ba ema laran-moos nia raan.’+ Nuneʼe mak sira sei la hetan sala kona-ba raan neʼe. 9 Ho ida-neʼe mak imi sei hamoos sala kona-ba ema laran-moos nia raan husi imi-nia leet tanba imi halo buat neʼebé loos tuir Jeová nia haree.
10 “Se imi bá halo funu hasoru imi-nia inimigu no Jeová, imi-nia Maromak, ajuda imi hodi manán sira no imi lori sira nuʼudar dadur,+ 11 no imi-nia mane ida haree feto bonita iha ema dadur sira-neʼe nia leet no laran-monu ba nia no hakarak atu hola nia nuʼudar feen, 12 entaun nia bele lori feto neʼe ba ninia uma. Feto neʼe tenke koi ninia fuuk, tesi ninia liman-kukun, 13 no hasai tiha ninia roupa dadur nian, no nia sei hela iha mane neʼe nia uma. Nia sei tanis ba ninia aman no inan ba fulan ida tomak,+ no depois neʼe mak mane neʼe bele halo relasaun ho nia; mane neʼe sei sai ninia laʼen no nia sei sai mane neʼe nia feen. 14 Se mane neʼe la kontente ona ho nia, mane neʼe tenke husik nia livre+ hodi nia bele bá fatin naran deʼit neʼebé nia gosta. Maibé mane neʼe labele faʼan nia hodi hetan osan ka halo aat ba nia, tanba mane neʼe hamoe ona nia.
15 “Se mane ida iha feen rua no nia hadomi feen ida liu fali ida seluk* no sira naʼin-rua iha oan-mane sira, no feen ida neʼebé nia la hadomi mak tuur-ahi oan-mane primeiru,+ 16 entaun iha loron neʼebé nia fahe liman-rohan ba ninia oan-mane sira, nia labele fó direitu nuʼudar oan primeiru ba oan-mane husi feen neʼebé nia hadomi liu hodi nega tiha oan primeiru husi feen neʼebé nia la hadomi. 17 Nia tenke rekoñese direitu nuʼudar oan-mane primeiru husi feen neʼebé nia la hadomi hodi fó parte rua husi buat hotu neʼebé nia iha ba oan-mane neʼe, tanba oan neʼe mak ninia oan primeiru husi ninia kbiit atu iha oan. Entaun direitu nuʼudar oan primeiru mak ninian.+
18 “Se mane ida iha oan-mane ida neʼebé ulun-toos no kontradór no nia lakohi halo tuir ninia aman no inan,+ no sira koko ona atu korrije nia maibé nia lakohi rona ba sira,+ 19 ninia aman no inan tenke kaer nia no lori nia ba katuas sira iha ninia sidade nia portaun 20 no sira sei dehan ba katuas sira iha sidade neʼe: ‘Ami-nia oan-mane neʼe ulun-toos no kontradór, no nia lakohi halo tuir ami. Nia kaan-teen+ no lanu-teen.’+ 21 Tuirmai mane hotu iha sidade neʼe tenke tuda mate nia. Ho ida-neʼe, imi tenke hasai buat neʼebé aat husi imi-nia leet, no ema Izraél hotu sei rona kona-ba neʼe no sai taʼuk.+
22 “Se ema ida halo sala no merese atu hetan kastigu-mate no imi oho nia+ no tara ona nia iha ai-riin ida,+ 23 ninia mate-isin labele husik iha ai-riin neʼe nia leten ba kalan tomak.+ Maibé, imi tenke hakoi nia iha loron neʼe kedas, tanba ema neʼebé tara iha ai-riin mak ema neʼebé hetan malisan husi Maromak,+ no imi labele halo foʼer imi-nia rai neʼebé Jeová, imi-nia Maromak, sei fó ba imi nuʼudar liman-rohan.+