Ezequiel

10 Bainhira haʼu hateke ba palku iha kerubín sira-nia leten, haʼu haree buat ida neʼebé haree hanesan fatuk-safira mosu iha sira-nia leten, no neʼe hanesan kadunan ida.+ 2 Tuirmai nia dehan ba mane neʼebé hatais hena-liñu:+ “Tama ba roda sira-nia leet,+ bá iha kerubín sira-nia okos. Halo nakonu ó-nia liman ho ahi-klaak lakan+ husi kerubín sira-nia leet no soe namkari ba sidade neʼe.”+ Haʼu haree hela bainhira nia tama.

3 Kerubín sira hamriik hela iha templu nia sorin loos bainhira mane neʼe tama, no pátiu* kiʼik laran sai nakonu ho kalohan. 4 No Jeová nia glória+ hiʼit saʼe husi kerubín sira-nia leten hodi muda ba templu nia odamatan, no neineik-neineik templu sai nakonu ho kalohan,+ no templu nia pátiu nabilan ho Jeová nia glória. 5 Husi pátiu boot bele rona lian husi kerubín nia liras, lian neʼe rona hanesan Maromak neʼebé Kbiit Boot Liu Hotu nia lian bainhira nia koʼalia.+

6 Tuirmai nia haruka mane neʼebé hatais hena-liñu, hodi dehan: “Foti ahi husi roda sira-nia leet, husi kerubín sira-nia leet.” Entaun nia tama no hamriik besik roda. 7 Tuirmai kerubín ida lolo liman ba ahi neʼebé iha kerubín sira-nia leet.+ Nia foti ahi balu no tau iha mane neʼebé hatais hena-liñu nia liman sira,+ no mane neʼe lori ahi sira-neʼe sai. 8 Kerubín sira-neʼe iha liman hanesan ema nian iha sira-nia liras okos.+

9 Bainhira haʼu hateke, haʼu haree roda haat iha kerubín sira-nia sorin. Roda ida iha kerubín ida-idak nia sorin, no roda sira-neʼe nabilan hanesan fatuk-krizólitu.+ 10 Roda haat neʼe haree hanesan deʼit. Roda sira-neʼe nia modelu hanesan roda ida iha roda seluk nia laran. 11 Bainhira sira muda, sira bele muda ba diresaun naran deʼit entre diresaun haat, maibé la presiza dulas fila ba sorin. Sira tuir deʼit ba fatin neʼebé kerubín nia ulun hateke bá,* no la presiza dulas fila ba sorin. 12 Matan mak nakonu iha kerubín sira-nia isin tomak, sira-nia kotuk, liman no liras. Roda haat neʼebé iha sira-nia sorin mós haleʼu ho matan.+ 13 No haʼu rona lian neʼebé bolu roda sira-neʼe: “Oh roda sira!”

14 Sira* ida-idak iha oin haat. Sira-nia oin primeiru mak kerubín nia oin, segundu mak ema nia oin, terseiru mak leaun nia oin, no ida ikus mak manu-makikit nia oin.+

15 Kerubín sira-neʼe mak kriatura moris neʼebé haʼu haree ona besik Mota Kebar.+ Bainhira kerubín sira-neʼe hiʼit an saʼe, 16 no bainhira kerubín sira-neʼe muda, roda sira mós muda hamutuk ho sira; bainhira kerubín sira hiʼit sira-nia liras atu saʼe aas liu rai, roda sira mós la fila ka la muda husi sira-nia sorin.+ 17 Bainhira kerubín sira-neʼe hamriik metin, roda sira mós hamriik metin; no bainhira sira hiʼit an saʼe, roda sira mós hiʼit an saʼe, tanba espíritu neʼebé book kriatura moris sira-neʼe* mós iha roda sira-neʼe.

18 Tuirmai Jeová nia glória+ muda husi templu nia odamatan no para iha kerubín sira-nia leten.+ 19 Haʼu haree kerubín sira hiʼit sira-nia liras no saʼe husi rai. Bainhira sira muda, roda sira mós muda hamutuk ho sira. Sira para iha portaun leste nia oin husi Jeová nia uma, no glória husi Izraél nia Maromak iha sira-nia leten.+

20 Sira mak kriatura moris* neʼebé haʼu haree ona iha Izraél nia Maromak nia kadunan okos besik Mota Kebar,+ tan neʼe mak haʼu hatene katak sira mak kerubín. 21 Sira naʼin-haat hotu iha oin haat, liras haat, no liman hanesan ema nian iha sira-nia liras okos.+ 22 No kerubín sira-neʼe nia oin hanesan deʼit ho kriatura moris nia oin neʼebé haʼu haree ona besik Mota Kebar.+ Sira ida-idak bá loos deʼit oin.+