Primeiru Korinto
11 Halo tuir haʼu-nia ezemplu bá, hanesan haʼu mós halo tuir Kristu nia ezemplu.+
2 Haʼu gaba imi tanba imi sempre hanoin-hetan haʼu no imi kaer metin ba hanorin sira neʼebé haʼu fó ona ba imi. 3 Maibé, haʼu hakarak imi hatene katak mane ida-idak nia ulun mak Kristu,+ no feto nia ulun mak mane,+ no Kristu nia ulun mak Maromak.+ 4 Mane ida neʼebé halo orasaun ka fó sai profesia hodi taka ninia ulun, nia hamoe ninia ulun. 5 Maibé feto ida neʼebé halo orasaun ka fó sai profesia+ hodi la taka ninia ulun, nia hamoe ninia ulun, tanba ida-neʼe hanesan deʼit nia koi molik ona ninia ulun. 6 Tanba se feto ida la taka ninia ulun, diʼak liu ba nia atu tesi ninia fuuk. Maibé se tesi fuuk ka koi fuuk mak buat neʼebé hamoe feto, entaun diʼak liu ba nia atu taka ninia ulun.
7 Tanba mane ida labele taka ninia ulun, tanba nia mak Maromak nia ilas+ no Maromak nia glória, maibé feto mak mane nia glória. 8 Tanba mane la mai husi feto, maibé feto husi mane.+ 9 Laʼós neʼe deʼit, Maromak la kria mane ba feto, maibé feto ba mane.+ 10 Tan razaun neʼe no mós tan anju sira, mak feto tenke taka ninia ulun nuʼudar sinál hodi hatudu katak nia hakruʼuk ba ninia laʼen.+
11 Maski nuneʼe, iha Naʼi, mane la moris ketak husi feto no feto la moris ketak husi mane. 12 Tanba hanesan feto mai husi mane,+ nuneʼe mós mane mai husi feto; maibé buat hotu mai husi Maromak.+ 13 Imi deside rasik bá: Se feto ida halo orasaun ba Maromak hodi la taka ninia ulun, ida-neʼe loos ka lae? 14 Imi aprende ona husi dalan neʼebé Maromak kria ema, katak se mane ida nia fuuk naruk, ida-neʼe hamoe nia, 15 maibé se feto ida nia fuuk naruk, ida-neʼe fó glória ba nia, loos ka lae? Tanba Maromak fó fuuk naruk ba feto atu taka feto nia ulun, laʼós fó hena. 16 Maibé, se ema ida la simu hanorin neʼe tanba tuir toman seluk, imi tenke fó-hatene nia katak ita la iha toman seluk no Maromak nia kongregasaun sira mós la iha toman seluk.
17 Maibé kuandu haʼu hatoʼo liafuan sira-neʼe, haʼu la gaba imi, tanba bainhira imi halibur hamutuk, ida-neʼe lori susar ba imi laʼós lori buat diʼak. 18 Ulukliu, haʼu rona katak kuandu imi halibur hamutuk nuʼudar kongregasaun, imi-nia hanoin la tuir malu, no haʼu hanoin ida-neʼe loos. 19 Tanba tuir loloos sei mosu grupu relijiaun* oioin iha imi-nia leet,+ maibé ida-neʼe mosu atu hatudu sai sira neʼebé Maromak simu ona iha imi-nia leet.
20 Kuandu imi halibur hamutuk atu han Naʼi nia Han-Kalan, loloos imi halo nuneʼe ho objetivu neʼebé la loos.+ 21 Tanba bainhira imi han ida-neʼe, imi balu han uluk ona imi-nia han-kalan, entaun ema ida hamlaha maibé ema seluk hemu toʼo lanu. 22 Tuir loloos, imi iha uma atu han no hemu, loos ka lae? Ka imi la respeitu Maromak nia kongregasaun no hakarak atu hamoe ema kiak sira? Haʼu sei dehan saida ba imi? Haʼu presiza gaba imi ka? Kona-ba neʼe haʼu la gaba imi.
23 Tanba haʼu simu husi Naʼi no mós haʼu hatoʼo ona ba imi, katak iha kalan+ antes ema entrega Naʼi Jesus ba inimigu, nia foti paun ida, 24 no depois fó tiha agradese, nia silu, hodi dehan: “Neʼe reprezenta haʼu-nia isin+ neʼebé haʼu fó ba imi-nia diʼak. Kontinua halo ida-neʼe hodi hanoin haʼu.”+ 25 Depois sira han tiha, nia mós halo hanesan ho kopu neʼe,+ hodi dehan: “Kopu neʼe reprezenta aliansa foun+ liuhusi haʼu-nia raan.+ Kontinua halo ida-neʼe. No bainhira imi hemu, halo ida-neʼe hodi hanoin haʼu.”+ 26 Tanba kuandu imi han paun neʼe no hemu tua-uvas neʼe, imi kontinua fó sai kona-ba Naʼi nia mate, toʼo nia mai fali.
27 Tan neʼe, ema neʼebé han paun ka hemu Naʼi nia tua-uvas la ho respeitu, nia halo sala hasoru Naʼi nia isin no raan. 28 Entaun, ulukliu ema ida tenke buka-hatene didiʼak kona-ba ninia an se nia merese ka lae,+ no tuirmai mak nia bele han paun no hemu tua-uvas neʼe. 29 Tanba ema neʼebé han no hemu hodi la hatene buat neʼebé isin neʼe reprezenta, nia lori kastigu ba ninia an. 30 Tan razaun neʼe mak ema barak iha imi-nia leet agora fraku no moras, no mós ema barak tan husi imi mate ona.*+ 31 Maibé se ita hatene didiʼak ita-nia an karik, ita sei la hetan tesi-lia. 32 Maibé, bainhira ita hetan tesi-lia, ita simu dixiplina husi Jeová,*+ atu nuneʼe ita sei la simu kastigu-mate hamutuk ho mundu neʼe.+ 33 Tan neʼe, haʼu-nia maun-alin sira, kuandu imi halibur hamutuk atu han ida-neʼe, hein malu bá. 34 Se ema ida hamlaha, diʼak atu nia han iha ninia uma, atu nuneʼe imi sei la hetan tesi-lia kuandu imi halibur hamutuk.+ Maibé kona-ba buat sira seluk, haʼu sei hadiʼa bainhira haʼu toʼo iha neʼebá.