Primeiru Korinto
3 Entaun maun-alin sira, haʼu labele koʼalia ba imi hanesan ema neʼebé moris tuir espíritu,+ maibé hanesan ema neʼebé hanoin tuir isin nian, hanesan labarik kiʼik+ iha Kristu. 2 Haʼu fó susubeen ba imi, laʼós ai-han neʼebé toos, tanba imi seidauk prontu atu han. Tuir loloos, toʼo agora imi mós seidauk prontu atu han ai-han neʼebé toos,+ 3 tanba imi sei iha hanoin isin nian.+ Tanba iha imi-nia leet imi laran-moras ba malu no istori malu, neʼe katak imi sei iha hanoin isin nian+ no moris hanesan ema iha mundu neʼe, loos ka lae? 4 Kuandu imi dehan: “Haʼu Paulo nian”, maibé balu seluk dehan: “Haʼu Apolo nian”,+ neʼe katak imi hanesan deʼit ho ema iha mundu neʼe, loos ka lae?
5 Entaun, sé mak Apolo? Sé mak Paulo? Tuir loloos, ami mak atan+ hodi halo serbisu neʼebé Naʼi fó ba ami, no liuhusi ami mak imi sai fiar-naʼin. 6 Haʼu kuda,+ Apolo rega,+ maibé Maromak mak kontinua halo moris. 7 Entaun laʼós ema neʼebé kuda ka ema neʼebé rega mak simu hahiʼi, maibé Maromak neʼebé halo moris.+ 8 Ema neʼebé kuda no mós ema neʼebé rega halo serbisu hanesan,* maibé sira ida-idak sei simu kolen tuir sira-nia serbisu rasik.+ 9 Tanba ita mak Maromak nia maluk serbisu-naʼin. Imi mak Maromak nia toʼos neʼebé nia kuda daudaun, no imi mak uma neʼebé Maromak harii daudaun.+
10 Maromak hatudu ona laran-diʼak neʼebé boot mai haʼu, hodi haʼu harii uma nia fundasaun+ hanesan badaen neʼebé matenek,* maibé ema seluk mak harii iha fundasaun neʼe nia leten. Maibé ema ida-idak tenke hanoin didiʼak kona-ba oinsá mak nia harii iha fundasaun neʼe nia leten. 11 Tanba ema ida labele harii uma nia fundasaun seluk hodi troka fali ida neʼebé harii tiha ona, neʼe mak Jesus Kristu.+ 12 Se ema ida harii uma iha fundasaun neʼe nia leten hodi uza osan-mean, osan-mutin, fatuk-murak, ai, ka duʼut-maran oioin, 13 tempu sei toʼo mai atu koko ninia serbisu neʼe, no ahi sei hatudu sai ema ida-idak nia serbisu,+ tanba ahi rasik sei hatudu sai kona-ba ema sira-neʼe harii husi saida. 14 Se ahi la han ema ida nia serbisu neʼebé nia halo iha fundasaun neʼe nia leten, nia sei simu kolen, 15 no se ahi han tiha ninia serbisu neʼebé nia halo, nia sei lakon buat barak, maibé nia rasik sei hetan salvasaun. Maski nuneʼe, nia sai hanesan ema ida neʼebé salva husi ahi.
16 Imi hatene ka lae, katak imi mak Maromak nia templu+ no Maromak nia espíritu hela iha imi?+ 17 Se ema ida harahun Maromak nia templu, Maromak sei harahun ema neʼe, tanba Maromak nia templu mak santu, no imi mak templu neʼe.+
18 Keta lohi imi-nia an rasik: Se ema ruma iha imi-nia leet hanoin katak nia matenek tuir mundu* neʼe, nia presiza sai beik, atu nuneʼe nia bele sai matenek. 19 Tanba matenek mundu neʼe nian mak buat beik ba Maromak, tanba hakerek nanis ona: “Nia halo ema matenek monu ba lasu neʼebé sira rasik tau.”+ 20 Dala ida tan: “Jeová* hatene katak ema matenek nia hanoin la iha folin.”+ 21 Tan neʼe, imi keta gaba an kona-ba ema, tanba buat hotu mak imi-nian. 22 Maski Paulo, Apolo, Cefas,*+ mundu neʼe, moris, mate, buat neʼebé iha neʼe ka buat neʼebé atu mai, buat hotu mak imi-nian, 23 no imi mak Kristu nian,+ no Kristu mak Maromak nian.