Segundu Samuel

7 Bainhira liurai hela metin iha ninia palásiu+ no Jeová halo ona nia moris hakmatek husi ninia inimigu sira neʼebé haleʼu nia, 2 liurai dehan ba profeta Natan:+ “Haʼu hela daudaun iha uma neʼebé halo husi ai-sedru+ maibé Maromak loos nia Arka iha tenda laran.”+ 3 Natan hatán ba liurai: “Bá, halo tuir buat hotu neʼebé iha Ita-nia laran, tanba Jeová hamutuk ho Ita.”+

4 Iha kalan neʼe duni mak Jeová dehan ba Natan: 5 “Bá hatete ba haʼu-nia atan David: ‘Jeová dehan nuneʼe: “Ó hakarak harii uma ida ba haʼu atu hela ka?+ 6 Haʼu la hela iha uma ida husi loron neʼebé haʼu lori povu Izraél sai husi rai-Ejitu toʼo ohin loron,+ maibé haʼu muda* bá-mai iha tenda laran, neʼe katak iha tenda santu.*+ 7 Durante tempu hotu neʼebé haʼu laʼo hamutuk ho ema Izraél, haʼu nunka koʼalia liafuan ida ba ulun-naʼin sira husi Izraél nia suku sira neʼebé haʼu hili ona atu tau matan* ba haʼu-nia povu, hodi dehan: ‘Tanbasá mak imi la harii uma ida husi ai-sedru ba haʼu?’”’ 8 Agora hatete ba haʼu-nia atan David: ‘Jeová neʼebé ukun tropa lalehan nian dehan nuneʼe: “Haʼu mak foti ó husi rai-luan, husi serbisu atu hein bibi,+ hodi sai ulun-naʼin ba haʼu-nia povu Izraél.+ 9 Haʼu sei hamutuk ho ó iha fatin naran deʼit neʼebé ó bá,+ no haʼu sei halakon ó-nia inimigu hotu iha ó-nia oin.+ Haʼu sei halo ó sai naran-boot+ hanesan ema naran-boot sira iha mundu. 10 Haʼu sei hili fatin ida ba haʼu-nia povu Izraél no tau sira iha neʼebá. Sira sei hela iha neʼebá no ema sei la book tan sira. Ema aat sei la hanehan tan sira hanesan sira halo iha tempu uluk,+ 11 husi loron neʼebé haʼu hili juís sira+ atu tau matan ba haʼu-nia povu Izraél. Haʼu sei halo ó moris hakmatek husi ó-nia inimigu hotu.+

“‘“No mós, Jeová hatete ona ba ó katak Jeová sei harii umakain* ida ba ó.+ 12 Bainhira ó mate+ no ema hakoi ó hamutuk ho ó-nia beiʼala sira, haʼu sei foti ó-nia jerasaun ida, katak ó-nia oan-mane rasik, no haʼu sei hametin ninia pozisaun nuʼudar liurai.+ 13 Nia mak sei harii uma ida ba haʼu-nia naran,+ no haʼu sei hametin ninia kadunan iha ninia ukun ba nafatin.+ 14 Haʼu sei sai ninia aman, no nia sei sai haʼu-nia oan-mane.+ Kuandu nia halo sala, haʼu sei fó dixiplina ba nia* no fó kastigu ba nia hanesan ema halo.+ 15 Haʼu sei la hasai haʼu-nia domin neʼebé laran-metin husi nia hanesan haʼu hasai domin neʼe husi Saul,+ neʼebé haʼu halakon tiha husi ó-nia oin. 16 Ó-nia umakain no ó-nia ukun sei metin ba nafatin iha ó-nia oin, no ó-nia kadunan sei metin ba nafatin.”’”+

17 Natan fó sai liafuan hotu no vizaun tomak neʼe ba David.+

18 Entaun, Liurai David bá no tuur iha Jeová nia oin, hodi dehan: “Oh Jeová, Naʼi Ukun-Naʼin Boot Liu, haʼu neʼe sé? No haʼu-nia umakain mak hanesan saida hodi Ita halo buat hotu neʼe ba haʼu toʼo agora?+ 19 Oh Jeová, Naʼi Ukun-Naʼin Boot Liu, maski Ita halo ona buat barak loos ba haʼu, maibé Ita mós koʼalia tan kona-ba Ita-nia atan nia umakain iha futuru. Oh Jeová, Naʼi Ukun-Naʼin Boot Liu, neʼe mak ukun-fuan* ba ema hotu. 20 Oh Jeová, Naʼi Ukun-Naʼin Boot Liu, Ita hatene ona haʼu ho didiʼak,+ nuneʼe saida tan mak Ita-nia atan David sei dehan ba Ita? 21 Ita halo ona hahalok boot sira-neʼe hotu no hatudu sai ona buat sira-neʼe ba Ita-nia atan+ tanba Ita-nia promesa no tanba Ita-nia laran rasik mak book Ita.* 22 Tan neʼe Ita deʼit mak kmanek liu,+ oh Jeová, Naʼi Ukun-Naʼin Boot Liu. La iha Maromak seluk mak hanesan ho Ita,+ no la iha Maromak seluk, só Ita deʼit.+ Buat hotu neʼebé ami rona ona mak fó prova katak neʼe loos duni. 23 No la iha nasaun seluk iha mundu tomak mak hanesan Ita-nia povu Izraél.+ Oh Maromak, uluk Ita bá hodi salva* sira nuʼudar Ita-nia povu,+ no Ita halo Ita-nia naran sai boot+ hodi halo hahalok kmanek no buat boot oioin ba sira.+ Ita duni sai nasaun seluk no hasai sira-nia maromak sira, tanba Ita hanoin Ita-nia povu neʼebé Ita sosa fali ba Ita-nia an rasik husi rai-Ejitu. 24 Ita hametin ona Ita-nia povu Izraél nuʼudar Ita-nia povu ba nafatin,+ no Ita, oh Jeová, sai ona sira-nia Maromak.+

25 “Agora, oh Maromak Jeová, favór ida, kumpre bá promesa neʼebé Ita halo ona kona-ba Ita-nia atan neʼe no kona-ba ninia umakain ba nafatin, no halo tuir bá buat neʼebé Ita promete ona.+ 26 Haʼu hein katak Ita-nia naran sei simu hahiʼi ba nafatin,+ atu nuneʼe povu sira bele dehan: ‘Jeová neʼebé ukun tropa lalehan nian mak Izraél nia Maromak’, no haʼu hein katak Ita-nia atan David nia umakain sei metin ba nafatin iha Ita-nia oin.+ 27 Oh Jeová neʼebé ukun tropa lalehan nian, Izraél nia Maromak, Ita hatudu sai ona ba Ita-nia atan, hodi dehan: ‘Haʼu sei harii umakain* ida ba ó.’+ Tan neʼe mak Ita-nia atan neʼe ho aten-brani halo orasaun neʼe ba Ita. 28 Agora, oh Jeová, Naʼi Ukun-Naʼin Boot Liu, Ita mak Maromak neʼebé loos, no Ita-nia liafuan mak lia-loos,+ Ita promete ona buat diʼak sira-neʼe ba Ita-nia atan. 29 Entaun haʼu hein katak Ita sei kontente atu haraik bensaun ba Ita-nia atan neʼe nia umakain, no neʼe sei kontinua ba nafatin iha Ita-nia oin.+ Oh Jeová, Naʼi Ukun-Naʼin Boot Liu, Ita mak promete ona no ho Ita-nia bensaun mak Ita-nia atan nia umakain sei hetan bensaun ba nafatin.”+