Ezequiel

17 Jeová koʼalia tan mai haʼu, hodi dehan: 2 “Oan-mane husi ema, konta ai-sasiʼik no fó sai ai-knanoik kona-ba umakain Izraél.+ 3 Ó tenke hatete: ‘Jeová, Naʼi Ukun-Naʼin Boot Liu, dehan nuneʼe: “Manu-makikit boot+ neʼebé iha liras boot no naruk, fulun mahar ho kór oioin, mai toʼo Líbanu+ no kuʼu ai-dikin husi ai-sedru nia tutun.+ 4 Nia kuʼu ai-dikin husi ai-sedru tutun no lori ba negósiu-naʼin nia rai* no kuda iha negósiu-naʼin nia sidade.+ 5 Tuirmai nia foti fini balu iha rai neʼe+ no kuda iha rai neʼebé bokur. Nia kuda neʼe besik bee hanesan ema kuda ai-salgeiru. 6 Fini neʼe moris no sai uvas neʼebé ninia tahan nani besik rai,+ no ninia abut sira moris iha okos. Nuneʼe nia sai uvas-hun neʼebé iha dikin no sanak sira.+

7 “‘“No iha manu-makikit boot ida mai,+ nia iha liras boot no liras fulun mahar.+ Tuirmai uvas-hun neʼe lolo ninia abut ba manu neʼe, abut sira-neʼe nani dook husi fatin neʼebé nia moris, no uvas-hun neʼe lolo mós ninia tahan ba manu neʼe atu manu neʼe bele rega uvas neʼe.+ 8 Tuir loloos, uvas-hun neʼe moris ona iha rai neʼebé bokur besik bee barak, atu nuneʼe bele iha dikin, fuan, no sai uvas-hun neʼebé boot.”’+

9 “Ó tenke hatete: ‘Jeová, Naʼi Ukun-Naʼin Boot Liu, dehan nuneʼe: “Uvas-hun neʼe sei buras ka lae? Ema sei fokit sai nia+ no halo ninia fuan sira sai dodok no halo ninia tubun sai namlaek, loos ka lae?+ Uvas-hun neʼe sei sai maran loos, tan neʼe la presiza ema neʼebé forte ka ema-lubun atu fokit sai ninia abut. 10 Maski kuda fali uvas-hun neʼe, maibé nia sei buras ka lae? Lae. Nia sei sai maran bainhira anin huu husi parte leste.* Nia sei sai maran iha toʼos neʼebé nia moris bá.”’”

11 Jeová koʼalia tan mai haʼu, hodi dehan: 12 “Favór ida, koʼalia ba umakain neʼebé kontradór: ‘Imi la komprende buat sira-neʼe ka?’ Koʼalia ba sira: ‘Liurai Babilónia bá Jeruzalein no kaer liurai* iha sidade neʼe hamutuk ho ulun-naʼin sira no lori sira fila ba Babilónia.+ 13 Tuirmai, Liurai Babilónia hili liurai nia oan-mane ida+ no halo aliansa ho nia no haruka nia jura.+ Depois neʼe, nia lori sai mane naran-boot sira husi rai neʼe,+ 14 atu nuneʼe ukun neʼe sai folin-laek no labele hamriik fali. Povu tenke halo tuir aliansa neʼe hodi ukun neʼe bele iha nafatin.+ 15 Maibé ikusmai liurai Judá kontra hasoru liurai Babilónia+ hodi haruka ninia ema bá rai-Ejitu atu husu kuda+ no tropa barak husi ema Ejitu.+ Nia sei hetan susesu ka lae? Ema neʼebé halo buat sira-neʼe bele halai sees husi kastigu ka lae? Se nia kontra ona aliansa neʼe, nia bele halai sees husi kastigu ka lae?’+

16 “‘Jeová, Naʼi Ukun-Naʼin Boot Liu, dehan: “Haʼu jura hodi haʼu-nia moris rasik katak nia sei mate iha Babilónia, hela-fatin ba liurai Babilónia* neʼebé uluk halo nia* sai liurai. Nia kontra* ona ninia juramentu no la halo tuir ninia aliansa ho liurai Babilónia.+ 17 Bainhira inimigu sira ateru rai hodi halo aas no halo serku hodi harii moru haleʼu sidade atu ataka no halakon ema barak nia moris,* Faraó* nia tropa lubun boot sei la ajuda nia iha funu.+ 18 Nia la kumpre juramentu no la halo tuir aliansa neʼe. Maski nia promete ona,* maibé nia kontra hodi halo buat sira-neʼe. Nia sei labele halai sees husi kastigu.”’

19 “‘Tan neʼe Jeová, Naʼi Ukun-Naʼin Boot Liu, dehan nuneʼe: “Haʼu jura hodi haʼu-nia moris rasik katak haʼu sei halo nia lori todan ba ninia sala tanba nia kontra haʼu-nia juramentu+ no la halo tuir haʼu-nia aliansa. 20 Haʼu sei soe haʼu-nia rede ba nia no nia sei tama iha rede laran.+ Haʼu sei lori nia ba Babilónia no tesi-lia ba nia iha neʼebá tanba nia la hatudu laran-metin ba haʼu.+ 21 Ninia tropa hotu neʼebé halai sei mate ho surik, no sira neʼebé hela sei namkari ba fatin oioin.*+ Tuirmai imi sei hatene duni katak haʼu, Jeová, mak fó sai liafuan sira-neʼe.”’+

22 “‘Jeová, Naʼi Ukun-Naʼin Boot Liu, dehan nuneʼe: “Haʼu sei foti ai-dikin husi ai-sedru boot nia tutun+ no kuda. Sin, haʼu sei kuʼu ai-dikin husi ai-sedru nia tutun,+ no haʼu rasik sei kuda ida-neʼe iha foho aas neʼebé boot nia leten.+ 23 Haʼu sei kuda ida-neʼe iha foho aas ida iha Izraél. Ninia sanak sira sei moris, nia sei fó fuan no sai ai-sedru neʼebé boot. No manu oioin sei hela iha ai-hun neʼe nia okos no ninia tahan sei fó mahon ba manu sira. 24 No ai-hun hotu iha rai-luan sei hatene duni katak haʼu, Jeová, mak tesi tiha ai-hun neʼebé aas no halo boot ai-hun neʼebé badak,+ no haʼu mak halo maran tiha ai-hun neʼebé matak no halo ai-hun neʼebé maran fó funan.+ Haʼu, Jeová, mak fó sai no haʼu sei kumpre ida-neʼe.”’”