Miqueias
Foho neʼebé Jeová nia uma harii bá+
Sei sai metin no aas liu fali foho-tutun sira seluk,
No foho neʼe sei sai aas liu fali foho-oan sira,
No ema sei laʼo nadodon bá neʼebá.+
2 Nasaun barak sei bá no dehan:
“Mai, mai ita saʼe ba Jeová nia foho
No ba Jacob nia Maromak nia uma.+
Nia sei hanorin ita kona-ba ninia dalan sira,
No ita sei laʼo iha ninia dalan sira.”
Tanba ukun-fuan* fó sai husi Siaun,
No Jeová nia liafuan sei fó sai husi Jeruzalein.
3 Nia sei sai juís iha ema barak nia leet+
No nia sei korrije* buat hotu kona-ba nasaun sira neʼebé kbiit boot no dook.
Sira sei tuku sira-nia surik sai xarrua
No tuku sira-nia diman sai sabit.+
Nasaun sei la foti tan surik hasoru nasaun seluk,
No sira mós sei la aprende tan funu.+
4 Sira ida-idak sei tuur* iha sira-nia uvas-hun okos no iha sira-nia ai-figeira hun okos,+
No sei la iha ema ida mak halo sira taʼuk,+
Tanba Jeová neʼebé ukun tropa lalehan nian, nia ibun mak fó sai ona kona-ba neʼe.
5 Tanba ema hotu sei laʼo tuir sira ida-idak nia maromak,*
Maibé ita sei laʼo tuir Jeová,* ita-nia Maromak,+ tinan ba tinan ba nafatin.
6 Jeová dehan: “Iha loron neʼebá,
Haʼu sei halibur ema* neʼebé laʼo kudeʼik,
No halibur ema neʼebé namkari,+
Hamutuk ho sira neʼebé haʼu hakanek ona.
7 Haʼu sei halibur fali ema restu husi povu neʼebé laʼo kudeʼik,+
No halo povu neʼebé uluk dadur sai nasaun forte ida.+
Jeová sei ukun nuʼudar liurai ba sira iha Foho Siaun,
Husi agora no ba nafatin.
8 Kona-ba ó, oh uma aas* ba bibi-lubun,
Foho-oan husi Siaun nia oan-feto,+
Ukun uluk* nian sei fila fali ba ó, sin, fila fali ba ó,+
Ukun neʼe mak Jeruzalein nia oan-feto nian.+
9 Tanbasá mak agora ó hakilar ho lian makaʼas?
Neʼe tanba ó la iha liurai ka?
Tanba ó-nia konsellu-naʼin mate ona ka?
Tanbasá mak ó sente moras hanesan feto neʼebé atu tuur-ahi?+
10 Oh Siaun nia oan-feto, ó sei hasoru terus boot
Hanesan feto neʼebé atu tuur-ahi,
Tanba agora ó sei sai husi sidade no hela iha rai-luan.
Ó sei laʼo dook toʼo rai-Babilónia,+
No iha neʼebá mak ó sei hetan salvasaun.+
Iha neʼebá mak Jeová sei sosa fali ó husi inimigu sira-nia liman.+
11 Agora nasaun barak sei halibur hamutuk hodi kontra ó.
Sira sei dehan: ‘Siaun sei hetan moe,
No ita-nia matan sei haree neʼe akontese ba Siaun.’
12 Maibé sira la hatene Jeová nia hanoin,
Sira la komprende ninia hakarak;*
Tanba nia sei halibur sira hanesan trigu-futun neʼebé ema foin koʼa no lori ba fatin sama trigu nian.
13 Oh Siaun nia oan-feto, hamriik no sama trigu bá.+
Tanba haʼu sei troka ó-nia dikur ho besi,
No haʼu sei troka ó-nia ain-kukun ho riti,
No ó sei harahun ema barak.+
Ó sei entrega ba Jeová buat neʼebé sira hetan ho laran-makerek,
No entrega sira-nia rikusoin ba Naʼi neʼebé loos, Maromak ba mundu tomak.”+