Ezequiel

38 Jeová koʼalia tan mai haʼu, hodi dehan: 2 “Oan-mane husi ema, hateke ba Gog husi rai-Magog,+ xefe boot* ba Mesek no Tubal,+ no fó sai profesia bá hodi kontra nia.+ 3 Ó tenke hatete: ‘Jeová, Naʼi Ukun-Naʼin Boot Liu, dehan nuneʼe: “Oh Gog, xefe boot* ba Mesek no Tubal, haʼu sei kontra ó. 4 Haʼu sei halo ó laʼo iha dalan seluk* no tau besi-kaʼit ba ó-nia hasan-ruin+ no lori ó sai hamutuk ho ó-nia tropa hotu,+ ó-nia kuda no tropa sira neʼebé saʼe kuda. Sira hotu hatais hena furak, sira mak grupu boot neʼebé kaer eskudu boot no eskudu kiʼik,* sira hotu kaer surik. 5 Ema husi Pérsia, Etiópia no Put+ hamutuk ho sira, ema hotu neʼe kaer eskudu kiʼik no taka kapasete. 6 Ema barak mak hamutuk ho ó,+ neʼe inklui mós ema Gomer nia tropa hotu, no umakain Togarma+ nia tropa hotu husi fatin dook liu iha parte norte.

7 “‘“Ó no ó-nia tropa hotu neʼebé halibur hamutuk ho ó, sai prontu bá, prepara imi-nia an. Ó sei sai sira-nia komandante.*

8 “‘“Liutiha tempu barak, haʼu sei buka-hatene didiʼak kona-ba ó.* Ikusmai, liutiha tinan barak, ó sei ataka rai ida. Povu iha rai neʼe mak povu neʼebé fila fali ona no hetan salvasaun husi surik. Povu neʼe halibur fali ona ba Izraél nia foho sira husi nasaun oioin, foho sira neʼebé uluk sai mamuk ba tempu kleur. Povu iha rai neʼe halibur husi nasaun oioin, sira hotu moris hakmatek.+ 9 Ó sei mai ataka sira hanesan anin-fuik. Ó no ó-nia tropa hotu no ema barak neʼebé hamutuk ho ó sei taka rai neʼe hanesan kalohan.”’

10 “Jeová, Naʼi Ukun-Naʼin Boot Liu, dehan nuneʼe: ‘Iha loron neʼebá, hanoin oioin sei mosu iha ó-nia neon, no ó sei halo planu aat. 11 Ó sei dehan: “Haʼu sei ataka rai neʼebé ninia knua sira la iha moru neʼebé fó protesaun.*+ Haʼu sei mai kontra ema sira neʼebé moris seguru no hakmatek. Sira hotu hela iha knua neʼebé la iha moru, portaun no besi-lolon sira atu xave portaun hodi fó protesaun.” 12 Ó-nia planu mak atu foti no hadau sasán barak, atu ataka fatin sira neʼebé uluk rahun maibé agora ema hela fali ona.+ Ema sira-neʼe halibur fali ona husi nasaun oioin,+ sira halibur rikusoin no sasán barak,+ sira hela iha rai nia klaran.

13 “‘Ema husi Sabá+ no Dedan,+ no negósiu-naʼin husi Tarsis+ no ninia funu-naʼin* hotu sei dehan ba ó: “Ó ataka atu foti no hadau sasán barak ka? Ó halibur ó-nia tropa atu lori osan-mutin no osan-mean atu foti rikusoin no sasán barak ka?”’

14 “Tan neʼe, oan-mane husi ema, fó sai profesia bá no dehan ba Gog: ‘Jeová, Naʼi Ukun-Naʼin Boot Liu, dehan nuneʼe: “Iha loron neʼebá, ó sei hatene duni katak haʼu-nia povu Izraél hotu moris ho hakmatek.+ 15 Ó sei mai husi ó-nia fatin, husi fatin dook liu iha parte norte.+ Ó sei mai hamutuk ho povu barak, sira neʼebé forte no tropa lubun boot, sira hotu saʼe kuda.+ 16 Ó sei mai ataka haʼu-nia povu Izraél hanesan kalohan neʼebé taka rai. Oh Gog, iha loron sira-neʼe nia rohan, haʼu sei lori ó hodi kontra haʼu-nia rai+ atu nuneʼe nasaun sira bele hatene haʼu bainhira haʼu halo santu* haʼu-nia an liuhusi ó iha sira-nia oin.”’+

17 “Jeová, Naʼi Ukun-Naʼin Boot Liu, dehan nuneʼe: ‘Haʼu koʼalia ona kona-ba ó husi tempu uluk katak haʼu sei lori ó atu kontra haʼu-nia povu, loos ka lae? Haʼu koʼalia liuhusi haʼu-nia atan profeta sira husi Izraél, neʼebé fó sai haʼu-nia liafuan sira-neʼe ba tinan barak ona.’

18 “Jeová, Naʼi Ukun-Naʼin Boot Liu, dehan: ‘Iha loron neʼebá, katak loron neʼebé Gog ataka rai-Izraél, haʼu-nia hirus sei lakan makaʼas.+ 19 Haʼu sei koʼalia ho laran-manas, no ho ahi husi haʼu-nia hirus. Iha loron neʼebá, sei mosu rai-nakdoko makaʼas iha rai-Izraél. 20 Ikan sira iha tasi, manu sira neʼebé semo iha lalehan, animál fuik sira iha rai-luan, animál* hotu neʼebé dolar iha rai, no ema hotu iha rai sei nakdedar tanba haʼu, no foho sira sei monu tun,+ foho-lolon sira sei monu, no moru hotu sei rahun toʼo rai.’

21 “Jeová, Naʼi Ukun-Naʼin Boot Liu, dehan: ‘Haʼu sei haruka surik ida ataka Gog iha haʼu-nia foho leten hotu. Tropa ida-idak nia surik sei kontra ninia maluk rasik.+ 22 Haʼu sei fó kastigu ba nia* hodi fó moras-peste*+ no mate. Haʼu sei halo udan boot, jelu-fatuk,+ ahi+ no enxofre*+ atu tun ba nia no ninia tropa no ema barak neʼebé hamutuk ho nia.+ 23 No haʼu sei fó duni glória ba haʼu-nia an iha nasaun barak nia oin, no halo santu haʼu-nia an, no mós halo sira hatene kona-ba haʼu. Nuneʼe sira sei hatene duni katak haʼu mak Jeová.’