Primeiru Korinto

14 Hakaʼas an bá atu hadomi malu, no kontinua hakaʼas an* atu hetan prezente espirituál, maibé liuliu atu hetan prezente hodi bele fó sai profesia.+ 2 Tanba ema neʼebé koʼalia língua oioin, nia la koʼalia ba ema, maibé ba Maromak, tanba la iha ema ida mak rona,+ maibé nia koʼalia segredu santu+ liuhusi Maromak nia espíritu. 3 Maibé, ema neʼebé fó sai profesia halo nuneʼe atu hametin ema, fó aten-brani, no fó kmaan ba ema liuhusi ninia koʼalia. 4 Ema neʼebé koʼalia língua oioin hametin ninia an rasik, maibé ema neʼebé fó sai profesia hametin kongregasaun. 5 Agora haʼu hakarak katak imi hotu koʼalia língua oioin,+ maibé diʼak liu imi hotu fó sai profesia.+ Tuir loloos, fó sai profesia mak diʼak liu duké koʼalia língua oioin. Tanba loloos, ema neʼebé koʼalia língua oioin sei la hametin kongregasaun se nia la tradús.* 6 Maibé maun-alin sira, se agora haʼu bá vizita imi hodi koʼalia língua oioin, oinsá mak ida-neʼe sei ajuda imi? Se haʼu hakarak ajuda imi, haʼu tenke fó sai ba imi liafuan ida husi Maromak,+ koʼalia ho koñesimentu,+ fó sai profesia ka hanorin buat ruma.

7 Tuir loloos, sasán sira neʼebé la iha moris hanesan flauta ka arpa bele hasai lian. Maibé, se ema huu flauta ka toka arpa ho lian ida deʼit, oinsá mak ema bele hatene múzika neʼe? 8 Neʼe duni, se trombeta ida nia lian la moos, sé mak sei sai prontu atu bá funu? 9 Nuneʼe mós, imi presiza koʼalia liafuan neʼebé fasil atu komprende, se lae oinsá mak ema bele hatene saida mak imi koʼalia? Tuir loloos, imi sei koʼalia deʼit ba anin. 10 Iha lian barak iha mundu neʼe, no sira hotu iha signifika. 11 Se haʼu la komprende signifika husi liafuan neʼebé ema koʼalia, haʼu sai hanesan ema estranjeiru ba ema neʼebé koʼalia daudaun, no ema neʼe sai hanesan ema estranjeiru ba haʼu. 12 Kona-ba imi, tanba imi hakarak tebes atu simu prezente espirituál, entaun buka bá atu simu prezente barak neʼebé sei hametin kongregasaun.+

13 Tan neʼe, ema neʼebé koʼalia língua seluk, harohan bá atu nia bele tradús.*+ 14 Se haʼu halo orasaun ho língua ida seluk, haʼu halo orasaun tanba prezente neʼebé haʼu simu liuhusi Maromak nia espíritu, maibé iha haʼu-nia neon haʼu la komprende. 15 Entaun, haʼu tenke halo saida? Haʼu sei halo orasaun ho prezente neʼebé haʼu simu liuhusi Maromak nia espíritu, maibé haʼu mós sei halo orasaun ho haʼu-nia neon. Haʼu sei kanta knananuk hahiʼi nian ho prezente liuhusi espíritu, maibé haʼu mós sei kanta knananuk hahiʼi nian ho haʼu-nia neon. 16 Se ó fó hahiʼi ho prezente husi espíritu, no ema la hatene saida mak ó koʼalia, oinsá mak ema baibain iha ó-nia leet bele dehan “Amen” ba ó-nia orasaun agradese nian? 17 Maski ó fó agradese iha dalan neʼebé diʼak, maibé ó la hametin ema neʼe. 18 Haʼu fó agradese ba Maromak tanba haʼu koʼalia língua barak liu fali imi hotu. 19 Maski nuneʼe, iha kongregasaun laran haʼu hakarak hanorin hodi uza deʼit liafuan lima atu nuneʼe ema bele komprende, duké uza liafuan rihun sanulu iha língua seluk.+

20 Maun-alin sira, keta sai hanesan labarik kiʼik kona-ba imi-nia kbiit atu komprende,+ maibé sai hanesan labarik kiʼik kona-ba hahalok aat,+ no sai boot ho imi-nia kbiit atu komprende.+ 21 Ukun-Fuan hakerek nanis ona: “‘Haʼu sei koʼalia ba povu neʼe ho língua ema estranjeiru nian no ho ibun ema oin-foun nian, maski nuneʼe sira lakohi rona haʼu’, Jeová* mak dehan.”+ 22 Tan neʼe, koʼalia língua oioin laʼós nuʼudar sinál ba fiar-naʼin, maibé ba sira neʼebé laʼós fiar-naʼin,+ no profesia laʼós ba sira neʼebé la iha fiar, maibé ba fiar-naʼin sira. 23 Entaun, se ema hotu iha kongregasaun halibur hamutuk iha fatin ida no ema hotu koʼalia língua oioin, maibé ema baibain ka ema neʼebé laʼós fiar-naʼin mai, sira sei dehan katak imi bulak, loos ka lae? 24 Maibé se imi hotu fó sai profesia no ema neʼebé laʼós fiar-naʼin ka ema baibain mai, imi-nia liafuan sira sei book nia laran no tesi-lia ba nia, atu nuneʼe nia bele haree didiʼak ninia an rasik. 25 Nia sei hatene buat neʼebé subar hela iha ninia laran, atu nuneʼe nia sei hakruʼuk hodi adora Maromak, no dehan sai: “Maromak iha duni imi-nia leet.”+

26 Neʼe duni maun-alin sira, imi presiza halo saida? Kuandu imi halibur hamutuk, ema ida fó sai salmo, ema ida hanorin, ema ida fali fó sai liafuan neʼebé nia simu husi Maromak, ema ida seluk koʼalia língua oioin, no ema seluk tan tradús.*+ Halo buat hotu atu hametin malu. 27 Kona-ba koʼalia iha língua seluk, diʼak liu atu ema naʼin-rua ka tolu deʼit mak koʼalia ida-neʼe no sira tenke troka malu, tuirmai ema seluk tenke tradús.*+ 28 Maibé se la iha ema atu tradús,* ema neʼe tenke nonook deʼit iha kongregasaun laran no koʼalia deʼit ba ninia an no ba Maromak. 29 Diʼak atu profeta naʼin-rua ka tolu+ mak koʼalia, no sira seluk buka-hatene liafuan sira-neʼe katak sá. 30 Maibé se ema ida simu liafuan husi Maromak bainhira nia tuur hela iha neʼebá, diʼak ba ema neʼebé koʼalia uluk atu nonook deʼit. 31 Tanba imi hotu bele troka malu hodi fó sai profesia, atu nuneʼe imi hotu bele aprende no bele hetan aten-brani.+ 32 Profeta sira tenke kontrola dalan neʼebé sira uza prezente espirituál. 33 Tanba Maromak laʼós Maromak runguranga nian, maibé Maromak dame nian.+

Hanesan iha ema santu* sira-nia kongregasaun hotu, 34 feto sira tenke kontinua nonook iha kongregasaun laran, tanba la iha lisensa ba sira atu koʼalia.+ Maibé sira tenke hakruʼuk+ hanesan Ukun-Fuan mós hatete ona. 35 Se sira hakarak atu aprende buat ruma, sira tenke husu sira-nia laʼen iha uma, tanba se feto ida koʼalia iha kongregasaun laran, neʼe la hatudu respeitu.

36 Maromak nia liafuan hahú husi imi ka? Ida-neʼe hatoʼo deʼit ba imi ka?

37 Se ema ruma hanoin katak nia mak profeta ida ka hetan prezente liuhusi Maromak nia espíritu, nia tenke rekoñese katak buat neʼebé haʼu hakerek ba imi mak Naʼi nia ukun-fuan. 38 Maibé se ema ruma lakohi simu, Maromak sei la simu nia.* 39 Tan neʼe haʼu-nia maun-alin sira, hakaʼas an atu hetan prezente hodi fó sai profesia,+ maibé keta bandu ema atu koʼalia língua oioin.+ 40 Halo buat hotu iha dalan neʼebé loloos no tuir arranju.+