Isaias
6 Iha tinan neʼebé Liurai Uzias mate,+ haʼu haree Jeová tuur hela iha ninia kadunan neʼebé iha fatin aas tebes,+ no ninia unuk ninin halo nakonu templu. 2 Iha ninia leten iha serafín sira; sira ida-idak iha liras neen. Sira ida-idak taka sira-nia oin ho liras rua no taka sira-nia ain ho liras rua, no sira ida-idak semo bá-mai ho liras rua.
3 No sira hatete ba malu ho lian makaʼas, hodi dehan:
“Jeová neʼebé ukun tropa lalehan nian mak santu, santu, santu.+
Mundu tomak nakonu ho ninia glória.”
4 No odamatan nia riin sira nakdoko tanba lian hakilar neʼe,* no uma neʼe sai nakonu ho suar.+
5 Tuirmai haʼu dehan: “Susar ba haʼu!
Haʼu sei mate duni,*
Tanba haʼu mak mane ida neʼebé ibun la moos,
No haʼu hela entre povu neʼebé ibun la moos;+
Tanba haʼu-nia matan rasik haree ona Liurai Jeová neʼebé ukun tropa lalehan nian!”
6 Iha tempu neʼe, serafín ida semo mai haʼu. Ninia liman kaer besi-habit nian neʼebé iha ahi-klaak lakan+ neʼebé nia foti husi altár.+ 7 Nia kona haʼu-nia ibun ho ahi-klaak neʼe no dehan:
“Ida-neʼe kona ona ó-nia ibun.
Ó-nia sala hasai tiha ona,
No ó-nia sala hamoos tiha ona.”
8 Tuirmai haʼu rona Jeová nia lian, dehan: “Sé mak haʼu sei haruka? Sé mak sei lori ami-nia lia-menon?”+ Haʼu hatán: “Haʼu mak neʼe! Haruka haʼu bá!”+
9 No nia hatán: “Bá, hatete ba povu neʼe:
‘Imi sei rona beibeik,
Maibé imi sei la komprende;
Imi sei haree beibeik,
Maibé imi sei la hetan koñesimentu ida.’+
10 Halo povu neʼe nia laran sai toos,+
Taka sira-nia tilun,+
No taka sira-nia matan,
Atu nuneʼe sira labele haree ho sira-nia matan
No mós labele rona ho sira-nia tilun,
Atu nuneʼe sira-nia laran labele komprende
No sira labele fila fali ba haʼu atu hetan kura.”+
11 Ho ida-neʼe, haʼu husu: “Oh Jeová, toʼo bainhira?” Nia hatán:
“Toʼo sidade sira sai rahun ona no ema la hela tan iha sidade sira-neʼe nia laran
No uma sira sai mamuk deʼit
No rai neʼe estraga tiha no sai fuik ona;+
12 Toʼo Jeová duni sai ema ba fatin dook+
No rai neʼe sai mamuk ona.
13 “Maski nuneʼe, povu uitoan* sei hela nafatin, no ahi sei han fali rai neʼe. Povu hanesan ai-hun boot ida no hanesan ai-karvallu; kuandu tesi tiha, sira husik hela ninia hun, no ai-tubun* santu sei mosu mai husi hun neʼe.”