Apóstolu sira-nia atividade
19 Iha tempu neʼebá Apolo+ sei iha hela Korinto, no Paulo laʼo liuhusi área foho nian no tun ba Éfeso.+ Paulo hetan dixípulu balu iha neʼebá. 2 Nia dehan ba sira: “Imi simu ona espíritu santu kuandu imi sai fiar-naʼin ka lae?”+ Sira hatán: “Ami seidauk rona buat ida kona-ba espíritu santu.” 3 Entaun nia dehan ba sira: “Se nuneʼe, imi simu batizmu ida neʼebé?” Sira hatán: “João nia batizmu.”+ 4 Paulo hatete: “João fó batizmu ba ema atu hatudu katak sira arrepende sira-nia sala,+ no nia fó sai ba povu atu tau fiar ba ida neʼebé sei mai tuir nia,+ neʼe mak Jesus.” 5 Rona tiha ida-neʼe, sira hetan batizmu hodi Naʼi Jesus nia naran. 6 Kuandu Paulo tau liman ba sira, espíritu santu tun ba sira,+ no sira hahú koʼalia lian oioin no mós fó sai profesia.+ 7 Sira hotu maizumenus mane naʼin-12.
8 Durante fulan tolu nia laran, nia bá beibeik sinagoga+ hodi koʼalia ho aten-brani no fó diskursu iha dalan neʼebé book ema atu fiar kona-ba Maromak nia Ukun.*+ 9 Maibé kuandu ema balu ho ulun-toos* lakohi fiar no koʼalia aat kona-ba Naʼi nia Dalan*+ iha ema-lubun nia oin, Paulo sai husi sira-nia leet+ no haketak dixípulu sira husi ema sira-neʼe, no loroloron nia hatoʼo diskursu iha Tirano nia sala eskola nian. 10 Nia halo nuneʼe ba tinan rua, entaun ema Judeu no ema Gregu hotu neʼebé hela iha provínsia Ázia rona Naʼi nia liafuan.
11 Maromak kontinua halo hahalok kmanek oioin ho kbiit liuhusi Paulo,+ 12 tan neʼe, ema foti Paulo nia hena ka lensu no lori neʼe ba ema sira neʼebé moras,+ no sira-nia moras neʼe lakon kedas, no anju aat* sira mós sai husi ema.+ 13 Maibé ema Judeu balu neʼebé laʼo haleʼu atu duni sai anju aat sira, mós koko atu uza Naʼi Jesus nia naran hodi dehan ba ema neʼebé anju aat domina: “Haʼu haruka ó hodi Jesus nia naran, ida neʼebé Paulo haklaken.”+ 14 Iha tempu neʼebá, iha ulun-naʼin amlulik Judeu nian ida naran Seva. No Seva nia oan-mane naʼin-hitu mós halo nuneʼe. 15 Maibé anju aat hatán ba sira: “Haʼu hatene Jesus+ no mós hatene Paulo;+ maibé imi neʼe sé?” 16 Ho ida-neʼe, mane neʼebé anju aat domina haksoit ba sira-nia leten, no hanehan sira hotu, no sira halai sai husi uma neʼe ho isin-tanan no kanek. 17 Bainhira ema Judeu no ema Gregu hotu neʼebé hela iha Éfeso rona kona-ba neʼe, sira hotu sai taʼuk, no ema fó glória liután ba Naʼi Jesus nia naran. 18 Ema barak neʼebé sai ona fiar-naʼin mai hodi fó sai iha ema hotu nia oin kona-ba sala neʼebé sira halo. 19 Tuir loloos, ema barak neʼebé uluk halo masonik oioin, sira halibur sira-nia livru hamutuk no sunu iha ema hotu nia oin.+ Sira sura hamutuk no hatene katak livru sira-neʼe nia folin mak osan-mutin 50.000. 20 Tanba Jeová* nia kbiit mak ninia liafuan kontinua habelar no ema barak tan sai fiar-naʼin.*+
21 Liutiha buat sira-neʼe, Paulo deside katak bainhira nia laʼo liu tiha Masedónia+ no Akaia, nia sei bá Jeruzalein.+ Nia dehan: “Kuandu haʼu toʼo tiha neʼebá, haʼu mós tenke bá haree Roma.”+ 22 Entaun, nia haruka ema naʼin-rua husi sira neʼebé ajuda nia, Timóteo+ no Erasto,+ hodi bá Masedónia, maibé nia sei hela tan ba tempu balu iha provínsia Ázia.
23 Iha tempu neʼebá duni mak susar boot+ mosu ba Naʼi nia Dalan.*+ 24 Iha badaen osan-mutin nian ida naran Demétrio, neʼebé ajuda ninia maluk badaen seluk atu hetan osan barak+ hodi halo oratóriu Ártemis nian husi osan-mutin. 25 Nia halibur ninia maluk sira no mós badaen osan-mutin seluk no dehan: “Maluk sira, imi hatene ho didiʼak katak husi negósiu neʼe mak ita hetan moris diʼak. 26 Agora imi haree no rona ona oinsá iha Éfeso+ no mós besik fatin hotu iha provínsia Ázia, Paulo halo ema-lubun boot fiar no troka sira-nia hanoin, hodi dehan katak maromak sira neʼebé ema halo ho liman mak laʼós maromak tebes.+ 27 Liután neʼe, haʼu taʼuk katak ema sei koʼalia aat kona-ba ita-nia negósiu no ema mós sei haree templu husi ita-nia maromak-feto Ártemis neʼebé kmanek nuʼudar buat neʼebé la iha folin. No maski ema hotu iha provínsia Ázia no ema iha mundu tomak adora nia, maibé ninia kmanek sei lakon.” 28 Rona tiha ida-neʼe, ema sai hirus tebes no hahú hakilar dehan: “Ema Éfeso nia maromak-feto Ártemis mak boot!”
29 Nuneʼe sidade sai runguranga loos, no ema hotu halai hamutuk ba fatin teatru nian.* Sira kaer no lori Gaio no Aristarco,+ ema Masedónia, neʼebé laʼo rai hamutuk ho Paulo. 30 Kona-ba Paulo, nia hakarak atu tama ba fatin teatru nian hodi hasoru povu, maibé dixípulu sira la husik nia. 31 No mós ulun-naʼin balu neʼebé organiza festa no jogu sira, neʼebé respeitu Paulo, haruka lia-menon no husu atu nia la tau nia an iha perigu laran hodi tama ba fatin teatru nian.* 32 Tuir loloos, ema balu hakilar buat ida no balu hakilar buat seluk, tanba ema-lubun bilán no sira barak la hatene tanbasá mak sira mai halibur hamutuk. 33 Entaun, sira lori sai Alexandre husi ema-lubun nia leet no ema Judeu sira dudu nia ba oin. No Alexandre halo sinál ho ninia liman tanba hakarak atu koʼalia ba povu. 34 Maibé kuandu povu hatene katak nia mak ema Judeu ida, sira hotu hahú hakilar hamutuk maizumenus ba oras rua, hodi dehan: “Ema Éfeso nia maromak-feto Ártemis mak kmanek!”
35 Ikusmai, administradór sidade nian halo kalma ema-lubun no nia dehan: “Ema Éfeso sira, ema hotu hatene katak sidade Éfeso mak tau matan ba Ártemis boot nia templu no mós ninia estátua neʼebé monu husi lalehan, loos ka lae? 36 Tanba ema ida labele nega buat sira-neʼe, entaun imi tenke hakmatek nafatin no keta halo arbiru deʼit. 37 Tanba imi lori ema sira-neʼe mai maski sira la naʼok buat ida husi templu no la koʼalia aat ita-nia maromak-feto. 38 Tan neʼe, se Demétrio+ no mós badaen sira neʼebé hamutuk ho nia iha kazu ruma hasoru ema ida, tribunál bele rezolve ida-neʼe no iha mós governadór* sira. Husik sira mak koʼalia hasoru malu. 39 Maibé se imi buka buat seluk tan, ida-neʼe sei rezolve tuir lei iha tempu baibain neʼebé povu sidade nian halibur hamutuk. 40 Tuir loloos, ita iha perigu laran tanba ulun-naʼin sira bele foti kazu hasoru ita katak ita kontra governu tanba buat neʼebé akontese ohin, no ita la iha razaun ida atu hatudu tanbasá mak ema-lubun halibur iha neʼe ho runguranga.” 41 Koʼalia tiha buat sira-neʼe, nia haruka ema-lubun sira fahe malu.