Apóstolu sira-nia atividade
2 Iha loron Festa Pentekostes* nian,+ dixípulu hotu halibur hamutuk iha fatin ida deʼit. 2 Bainhira sira tuur hela, derrepente deʼit sira rona lian tarutu ida husi lalehan hanesan anin neʼebé huu makaʼas, no uma laran tomak sai nakonu ho lian neʼe.+ 3 Sira bele haree buat neʼebé hanesan ahi-lakan kiʼik-kiʼik,* no ahi ida tun hodi hela iha sira ida-idak nia leten, 4 no sira hotu sai nakonu ho espíritu santu,+ no sira hahú koʼalia lian oioin hodi tuir buat neʼebé espíritu fó ba sira atu koʼalia.+
5 Iha tempu neʼebá, ema Judeu sira neʼebé hamtaʼuk Maromak, mai husi nasaun hotu iha mundu tomak, no sira hela iha Jeruzalein.+ 6 Entaun, kuandu sira rona tiha lian tarutu neʼe, ema-lubun mai halibur hamutuk no sai bilán tanba sira rona dixípulu sira koʼalia iha sira ida-idak nia lian. 7 Loloos, sira sai hakfodak tebes no dehan: “Haree toʼok, ema hotu neʼebé koʼalia daudaun neʼe mak ema Galileia,+ loos ka lae? 8 Entaun, oinsá mak ita rona ita ida-idak nia lian rasik?* 9 Ita mak ema husi Pártia, Média,+ Elam,+ Mezopotámia, Judeia, Kapadósia, Pontus, provínsia Ázia,+ 10 Fríjia, Pamfília, Ejitu, área Líbia neʼebé besik Sirene, no ita balu mós mai husi Roma, inklui ema Judeu no mós ema neʼebé simu ona relijiaun Judeu nian,*+ 11 ema Kreta no Arábia. Ita rona sira koʼalia iha ita-nia lian kona-ba buat furak oioin neʼebé Maromak halo.” 12 Sin, ema sira-neʼe hotu hakfodak no bilán hodi dehan ba malu: “Ida-neʼe katak sá?” 13 Maibé, ema balu goza sira no dehan: “Ema sira-neʼe lanu ho tua-uvas.”*
14 Maibé Pedro hamriik hamutuk ho sira naʼin Sanulu-Resin-Ida+ no koʼalia ba sira ho lian makaʼas, dehan: “Imi ema Judeia sira no ema neʼebé hela iha Jeruzalein, rona didiʼak ba haʼu-nia liafuan sira no hatene bá. 15 Tuir loloos, ema sira-neʼe la lanu hanesan imi hanoin, tanba agora mak tuku 9 dadeer.* 16 Maibé, ida-neʼe fó sai ona liuhusi profeta Joel: 17 ‘“Iha loron ikus sira”, Maromak dehan, “Haʼu sei fakar haʼu-nia espíritu ba ema oioin, imi-nia oan-mane no oan-feto sira sei fó sai profesia, imi-nia mane joven sira sei haree vizaun, no imi-nia katuas sira sei hetan mehi.+ 18 Iha tempu neʼebá haʼu mós sei fakar haʼu-nia espíritu ba haʼu-nia atan-mane no atan-feto sira, no sira sei fó sai profesia.+ 19 No haʼu sei hatudu sai sinál sira iha lalehan no halo milagre sira iha rai, sei iha raan, ahi no suar barak. 20 Loro-matan sei sai nakukun no fulan sei sai raan antes Jeová* nia loron neʼebé boot no kmanek toʼo mai. 21 Ema hotu neʼebé bolu Jeová* nia naran sei hetan salvasaun.”’+
22 “Ema Izraél sira, rona liafuan sira-neʼe bá: Maromak hatudu sai ho momoos katak Jesus ema Nazaré mak mane neʼebé Maromak haruka mai. Maromak halo milagre, sinál no buat kmanek oioin iha imi-nia leet liuhusi nia,+ hanesan imi rasik hatene. 23 Imi kaer mane neʼe no entrega nia ba ema aat nia liman hodi prega nia ba ai-riin no oho nia.+ Neʼe tuir Maromak nia hakarak* no Maromak hatene nanis ona kona-ba neʼe.+ 24 Maibé Maromak halo nia livre husi mate hodi fó moris-hiʼas ba nia,+ tanba mate* la iha kbiit atu kontinua kaer metin nia.+ 25 Tanba David koʼalia kona-ba nia dehan: ‘Jeová* sempre iha haʼu-nia oin.* Haʼu sei nunka nakdedar tanba nia iha haʼu-nia liman-loos. 26 Tan neʼe mak haʼu-nia laran sai kontente no haʼu-nia ibun koʼalia ho haksolok. No haʼu sei moris ho esperansa, 27 tanba Ita sei la husik hela haʼu* iha rate* laran, no mós Ita sei la husik Ita-nia atan neʼebé laran-metin ba Ita atu ninia isin sai dodok.+ 28 Ita halo haʼu hatene ona dalan ba moris. Ita halo haʼu nakonu ho ksolok iha Ita-nia oin.’+
29 “Maun-alin sira, husik haʼu koʼalia nakloke ba imi kona-ba ita-nia beiʼala David, neʼebé mate no hakoi ona,+ no ninia rate sei iha ita-nia leet toʼo ohin loron. 30 Tanba nia mak profeta ida no nia hatene katak Maromak promete ona ba nia hodi jura katak ninia bei-oan ida sei tuur iha ninia kadunan.+ 31 Nia haree nanis ona no koʼalia kona-ba Kristu nia moris-hiʼas, katak Maromak sei la husik nia iha rate* laran no mós la husik ninia isin sai dodok.+ 32 Maromak fó moris-hiʼas ba Jesus, no ami hotu sai sasin kona-ba neʼe.+ 33 Nuneʼe, tanba nia saʼe ona ba lalehan no tuur iha Maromak nia liman-loos+ no simu ona espíritu santu neʼebé Aman promete,+ nia fakar ida-neʼe ba ami, no neʼe mak imi haree no rona. 34 Tanba David la saʼe ba lalehan, maibé nia rasik dehan: ‘Jeová* hatete ba haʼu-nia Naʼi: “Tuur iha haʼu-nia liman-loos 35 toʼo haʼu tau ó-nia inimigu sira iha ó-nia ain okos.”’*+ 36 Tan neʼe, umakain Izraél hotu hatene ho loloos bá katak Jesus neʼebé imi oho ona iha ai-riin,+ Maromak halo ona nia nuʼudar Naʼi+ no Kristu.”
37 Kuandu sira rona ida-neʼe, sira-nia laran kanek tebes no sira dehan ba Pedro no apóstolu sira seluk: “Maluk sira, ami tenke halo saida?” 38 Pedro hatete ba sira: “Arrepende an bá,+ no imi ida-idak hetan batizmu+ hodi Jesus Kristu nia naran atu imi-nia sala bele hetan perdua,+ no imi sei simu prezente neʼebé la presiza selu, neʼe katak espíritu santu. 39 Tanba promesa neʼe+ mak ba imi, ba imi-nia oan sira, no ba ema hotu iha rai neʼebé dook, sira hotu neʼebé Jeová,* ita-nia Maromak, hili.”+ 40 Pedro koʼalia liafuan barak tan hodi fó sasin ho momoos no kontinua husu ho laran ba sira, hodi dehan: “Salva imi-nia an bá husi jerasaun aat neʼe.”+ 41 Tan neʼe, ema hotu neʼebé simu ninia liafuan ho laran hetan batizmu,+ no iha loron neʼe maizumenus ema* naʼin-3.000 sai dixípulu.+ 42 Sira ho laran-manas kontinua aprende husi apóstolu sira no halibur hamutuk,* han hamutuk+ no halo orasaun.+
43 Tuir loloos, ema* hotu hahú hamtaʼuk Maromak. No apóstolu sira komesa halo milagre no sinál barak.+ 44 Sira hotu neʼebé sai fiar-naʼin halibur hamutuk no fahe ba malu buat hotu neʼebé sira iha. 45 Sira faʼan sira-nia sasán no rikusoin,+ no fahe neʼe ba ema hotu hodi tuir ema ida-idak nia presiza.+ 46 Loron ba loron, sira kontinua halibur iha templu ho hanoin ida deʼit, no sira han hamutuk iha sira-nia uma ida-idak. Sira fahe hahán ho haksolok boot no halo buat hotu ho laran-moos. 47 Sira hahiʼi Maromak no ema hotu kontente ho sira. No loroloron Jeová* kontinua aumenta ema barak tan neʼebé sei hetan salvasaun hodi hamutuk ho sira.+