Segundu Samuel
2 Depois neʼe, David husu Jeová,+ hodi dehan: “Haʼu tenke bá Judá nia sidade ida ka lae?” Jeová hatán ba nia: “Bá.” Tuirmai David husu tan: “Haʼu tenke bá sidade ida-neʼebé?” Nia hatán: “Hebron.”+ 2 Entaun David saʼe ba Hebron hamutuk ho ninia feen naʼin-rua, Ahinoam+ ema Jezreel, no Abigail+ neʼebé kaben ho David bainhira Nabal, ema Karmel, mate ona. 3 David mós lori mane sira neʼebé hamutuk ho nia,+ sira ida-idak ho sira-nia família, no sira hela iha sidade sira neʼebé haleʼu Hebron. 4 Tuirmai mane Judá sira mai iha neʼebá, no sira foti* David nuʼudar liurai ba umakain Judá.+
Sira hatete ba David: “Mane sira iha Jabes-Gilead mak hakoi Saul nia mate-isin.” 5 Entaun David haruka ema ba mane sira iha Jabes-Gilead no dehan ba sira: “Haʼu hein katak Jeová sei haraik bensaun ba imi, tanba imi hatudu domin neʼebé laran-metin ba imi-nia naʼi Saul hodi hakoi nia.+ 6 Haʼu hein katak Jeová sei hatudu domin boot* no laran-metin ba imi. Haʼu mós sei hatudu laran-diʼak ba imi tanba imi halo ona nuneʼe.+ 7 Agora hametin imi-nia liman no sai aten-brani bá, tanba imi-nia naʼi Saul mate ona no umakain Judá hili* ona haʼu nuʼudar sira-nia liurai.”
8 Maibé Ner nia oan-mane Abner,+ neʼebé nuʼudar xefe ba Saul nia tropa, lori ona Saul nia oan-mane Is-Boset+ ba Manaim+ 9 no foti Is-Boset nuʼudar liurai hodi ukun Gilead,+ ema Asur, Jezreel,+ Efraim,+ Benjamim no Izraél tomak. 10 Saul nia oan-mane Is-Boset tinan 40 bainhira nia sai liurai, no nia ukun Izraél ba tinan rua. Maibé umakain Judá apoia David.+ 11 Tempu neʼebé David sai liurai iha Hebron hodi ukun umakain Judá hamutuk tinan hitu ho fulan neen.+
12 Liutiha tempu balu, Ner nia oan-mane Abner, no Saul nia oan-mane Is-Boset nia atan sira sai husi Manaim+ hodi bá Gibeão.+ 13 Zeruia+ nia oan-mane Joab+ no David nia atan sira mós sai hodi bá hasoru sira iha kolan iha Gibeão. Nuneʼe grupu ida tuur iha kolan nia sorin neʼe, no grupu ida seluk iha kolan nia sorin seluk. 14 Ikusmai Abner hatete ba Joab: “Husik mane joven sira-neʼe hamriik no kontra malu* iha ita-nia oin.” Ho ida-neʼe, Joab dehan: “Husik sira hamriik bá.” 15 Entaun sira hamriik no hili ema Benjamim naʼin-12 husi Is-Boset nia grupu no ema naʼin-12 husi David nia atan sira hodi kontra malu. 16 Sira kaer malu iha ulun no sona malu,* no sira hotu monu mate hamutuk. Tan neʼe mak fatin neʼe bolu nuʼudar Helkat-Hazurim, no neʼe iha Gibeão.
17 Tuirmai sira halo funu no funu neʼe sai boot tebes iha loron neʼebá. Ikusmai David nia atan sira manán Abner no ema Izraél. 18 Iha neʼebá iha Zeruia nia oan-mane naʼin-tolu,+ Joab,+ Abisai+ no Asael.+ Asael mak halai lalais hanesan bibi-rusa gazela iha rai-luan. 19 Asael duni tuir Abner, no Asael la fila ba liman-loos ka ba liman-karuk kuandu duni tuir nia. 20 Bainhira Abner fila oin, nia husu: “Ó mak Asael ka?” Nia hatán: “Sin, neʼe mak haʼu.” 21 Tuirmai Abner hatete ba nia: “Fila ba liman-loos ka ba liman-karuk, kaer mane joven ida, no hadau buat naran deʼit husi nia.” Maibé Asael lakohi para atu duni tuir Abner. 22 Entaun Abner dehan tan ba Asael: “Para, keta duni tuir tan haʼu. Se lae, haʼu sei oho ó. Se nuneʼe, haʼu sei moe atu haree ó-nia maun Joab nia oin.” 23 Maibé Asael lakohi para, entaun Abner sona ninia kabun ho diman nia rohan,+ no diman neʼe sona borus toʼo Asael nia kotuk, no nia monu iha neʼebá no mate iha fatin. Ema hotu neʼebé toʼo iha fatin neʼebé Asael mate, sira para kedas.
24 Tuirmai Joab no Abisai duni tuir Abner. Bainhira loro-matan tun daudaun, sira toʼo foho-oan iha Ammá, neʼebé iha Gia nia oin iha dalan ba rai-fuik Gibeão. 25 No ema Benjamim halibur hamutuk hodi laʼo tuir Abner. Sira forma nuʼudar grupu ida no hamriik iha foho-oan ida nia leten. 26 Tuirmai Abner hakilar ba Joab dehan: “Toʼo bainhira tan mak ita kontinua oho malu ho surik? Ó la hatene katak neʼe sei lori deʼit susar ka? Entaun, bainhira mak ó sei dehan ba ó-nia ema sira atu la duni tuir tan sira-nia maun-alin sira?” 27 Joab hatán: “Haʼu jura hodi Maromak loos neʼebé moris, se ó la koʼalia karik, ema sira-neʼe sei la para atu duni tuir sira-nia maun-alin sira toʼo dadeer.” 28 Nuneʼe Joab huu dikur, no ninia ema sira la duni tuir tan ema Izraél, no funu mós para kedas.
29 Abner no ninia ema sira laʼo liuhusi área Araba+ durante kalan tomak, sira hakur Mota Jordaun no laʼo liuhusi dalan kloot iha fatuk-leet,* no ikusmai sira toʼo iha Manaim.+ 30 Bainhira Joab fila fali hodi la duni tuir tan Abner, nia halibur ninia ema hotu hamutuk. Iha tempu neʼebá David lakon ninia atan naʼin-19, no lakon mós Asael. 31 Maibé David nia atan sira manán ema Benjamim no Abner nia ema sira, no sira neʼebé mate hamutuk naʼin-360. 32 Sira lori Asael+ no hakoi nia iha ninia aman nia rate, neʼebé iha Belein.+ Tuirmai Joab no ninia ema sira laʼo durante kalan tomak, no sira toʼo iha Hebron+ bainhira rai atu naroman ona.